დროებითი საგამოძიებო კომისიამ, ხორავას ქუჩაზე მოკლული არასრულწლოვნების მშობლებს მოუსმინა. დაზარალებულები პარლამენტში ადვოკატთან ერთად მივიდნენ. ხორავას ქუჩაზე მომხდარი მკვლელობის შემსწავლელი საგამოძიებო კომისიის სხდომაზე ახსნა-განმარტებისთვის დასაბარებელ პირთა სიაში არიან - ხორავას ქუჩაზე მომხდარი ინციდენტის უშუალო მონაწილეები, გამომძიებელ-პროკურორები, ექსპერტები, 51-ე საჯარო სკოლის ხელმძღვანელები, ასევე ყოფილი მთავარი პროკურორი ირაკლი შოთაძე, შს მინისტრი გიორგი გახარია, იუსტიციის მინისტრი თეა წულიკიანი და სხვა პირები.
მოკლული დათო სარალიძის ოჯახის ადვოკატს, ნესტან ლონდარიძეს მოლოდინი აქვს, რომ კომისიის ფორმატში კონკრეტული შედეგი იქნება მიღწეული.
კომისიის სხდომაზე ირმა ნადირაშვილის შეკითხვას - სასამართლო პროცესის დროს იყო თუ არა უხეში ჩარევა პროკურორების მხრიდან მოწმეების, ან ბრალდებულების დაკითხვისას და თუ იყო ჩვენების შეწყვეტის მცდელობა, ლონდარიძემ უპასუხა:
„მოწმეების დაკითხვისას ისეთი უხეში ჩარევა, რომ ვთქვათ გაეწყვეტინებინოთ სხვა მიმართულებით წაეყვანათ, მე ასეთ ფაქტებს ვერ დავასახელებ. კიდევ ვიმეორებ არ მინდა, რომ არასწორი ინფორმაცია მოგაწოდოთ, მაგრამ ჩემთვის მთავარი იყო ერთი გარემოება, როდესაც პროცესის მიმდინარეობის დროს, რამდენიმე მოწმემ, როდესაც ჩვენებას აძლევდნენ, ითხოვა გაეყვანათ ბრალდებულები დარბაზიდან. საგულისხმო იყო ის დეტალი, როდესაც საუბრობდნენ იმაზე, ეკავათ თუ არა მათ ხელში რაიმე იარაღი, ამ ბავშვებმა გადახედეს ბრალდებულებს“, - განცხადა ნესტან ლონდარიძემ.
საგამოძიებო კომისიის ფარგლებში ხმაურის ფონზე დაიწყო დავით სარალიძის მამის, ზაზა სარალიძის მოსმენა. დაზარალებულმა თავდაპირველად კითხვები დასვა უმრავლესობის ლიდერის, არჩილ თალაკვაძესთან მიმართებაში, რომელიც საგამოძიებო კომისიის წევრია, თუმცა სხდომას არ ესწრებოდა. ზაზა სარალიძე დაინტერესდა რა თანამდებობას იკავებდა არჩილ თალაკვაძე იმ დრო, როდესაც სასჯელაღასრულების დეპარტამენტში მუშაობდა და აქვს თუ არა ინფორმაცია, თუ რა კადრებს ფლობს მირზა სუბელიანი ყოფილი შს მინისტრის, ვანო მერაბიშვილის საკნიდან გაყვანასთან დაკავშირებით.
ამის შემდეგ, ზაზა სარალიძემ აღნიშნა, რომ კომისიის წევრს, დეპუტატ ეკა ბესელიას უნდობლობას უცხადებს. როგორც სარალიძემ განაცხადა, დეპუტატმა ის დაადანაშაულა იმაში, რომ პოლიტიკურ პარტიას მისცა თავის შვილით მანიპულირების საშუალება. საპასუხოდ ეკა ბესელიამ მიმართა, რომ მას მსგავსი ტერმინოლოგიით არასდროს უსაუბრია და ვერ ნახავს ვერც ერთ ეთერს, ინტერვიუს ან განცხადებას, სადაც მსგავსი სიტყვებითა და ტერმინოლოგიით გამოხატავდა პოზიციას.
„ამ საქმეში არავითარი პერსონალური ინტერესი არავის არ გააჩნია. მეც და ჩემს კოლეგებსაც ნამდვილად გვაქვს მზაობა, გაირკვეს, მართლაც რა მოხდა და ვინ ვის აფარებს ხელს, ან რატომ აფარებს და აფარებს თუ არა და საერთოდ, რასთან გვაქვს საქმე“, - მიმართა ეკა ბესელიამ.
ზაზა სარალიძემ საგამოძიებო კომისიაზე რამდენიმე მნიშვნელოვან დეტალზე ისაუბრა. როგორც სარალიძემ აღნიშნა, საქმის პროკურორები ამტკიცებდნენ, რომ მისი შვილი გ.ჯ-მ მოკლა, ხოლო პროკურორმა ზვიად ფხაკაძემ აღწერა კიდეც დაახლოებით როგორ შეეძლო დაერტყა მას დანა 12-ჯერ.
„თავიდან საქმის პროკურორებთან ჩვეულებრივი ურთიერთობა მქონდა. ერთ-ერთ პირველ შეხვედრაზე თან მახლდა მამაჩემი - ფრიდონ სარალიძე. ამტკიცებდნენ, რომ ჩემი შვილი მხოლოდ გ.ჯ-მ მოკლა. მამაჩემი მწყობრიდან გამოიყვანა სიტყვებმა, რომ ჩემი შვილის მკვლელი მხოლოდ გ.ჯ. იყო. ვსაუბრობდი, რომ მხოლოდ ერთი ადამიანი არ შეიძლება ყოფილიყო ჩემი შვილის მკვლელი.
გუგუშვილის მომართვა იყო - „თქვენ თუ ბევრს ილაპარაკებთ, ამათაც გარეთ გამოვუშვებთ!“ ამაზე ჩემი პასუხი იყო - „გამოუშვით, პრობლემა არ არის. თუკი დანარჩენი მკვლელები გარეთ უნდა იყვნენ, ერთი ან ორი ადამიანის დაკავებას რა აზრი აქვს?!“ ამ ინფორმაციას მამაჩემიც დაადასტურებს. ამ სიტყვების შემდეგ მივხვდი, რომ რთულად იყო საქმე, არ აპირებდნენ საქმის სრულფასოვნად გამოძიებას ან რაღაც ხდებოდა. ამის მიუხედავად, მაინც იმედი არ დამიკარგავს და მაინც ვენდობოდი პროკურატურას“, - განაცხადა ზაზა სარალიძემ.
მისივე ინფორმაციით, მაისის თვეში გამართულ შეხვედრაზე მან პროკურორ გუგუშვილს უთხრა, რომ თუკი სიმართლე არ დადგინდებოდა „მალალეტკების ომი დაიწყებოდა“, რაზეც მისი პასუხი იყო, რომ „დაიწყოს, არ არის პრობლემა“. ამასთან როგორც სარალიძემ აღნიშნა, ეძებს სამ გოგოს, რომლებიც უნდა შესწრებოდნენ ხორავას ქუჩაზე ჩხუბს და საქმის მასალებში არ ფიგურირებენ.
„ვეძებ სამ გოგოს, რომლებიც უნდა შესწრებოდნენ ჩხუბს. სამწუხაროდ, არ ვიცი სახელები და გვარები. ამ ბავშვებზე მეზობლები ამბობენ, რომ ეს გოგოები დარბოდნენ და წიოდნენ და კიოდნენ. გამოძიებას სათანადოდ არ გამოუკვლევია ა.ს.-მ რა მისწერა მიხეილ კალანდიას ჩხუბის წინ. ასევე, სათანადოდ არ მოხდა თ.ნ.-ის და ციბაძის გამოკითხვა.
გარდა ამისა, საქმეზე დართულ ფარულ ვიდეოჩანაწერებს შორის ა.ს და მიხეილ კალანდიას ჩანაწერი არ არის, რის მიზეზადაც პროკურატურა ზემოაღნიშნული ბავშვების მიერ გამოძიებასთან თანამშრომლობას ასახელებს. პროკურატურის არგუმენტი საეჭვოდ მიმაჩნია“, - აღნიშნა ზაზა სარალიძემ.
გარდა ამისა, სარალიძემ შს მინისტრთან შეხვედრის დეტალები გაიხსენა და განაცხადა, რომ როდესაც მან, დაუსახელა პოლიციის მაღალჩინოსანი, ვინც მკვლელობის ადგილზე მდებარე ფარდულის დანგრევის ბრძანება გასცა, მინისტრმა უთხრა, რომ არ იცოდა ამ პიროვნების ვინაობა.
„ქალაქის მკვლელობის განყოფილების უფროსის სახელი და გვარი არ იცის მინისტრმა. კახა სირაძეზე მაქვს საუბარი. გაუკვირდა ეს კაცი ვინ არისო. ვერავინ ვერ დამარწმუნებს იმაში, რომ წულუკიანმა ეს საქმე არ იცოდა, გახარიამ ეს საქმე არ იცოდა და კვირიკაშვილზე პირდაპირ მინდა ვთქვა, რომ ამ კაცმა ეს საქმე არ იცოდა“, - განაცხადა ზაზა სარალიძემ, რომლემაც დასძინა, რომ სამთავრობო გუნდის მხარდამჭერებმა შავი პიარის აგორება დაიწყეს მისი შვილის მიმართ.
როგორც მან აღნიშნა, გარკვეული პირების მხრიდან ბრალის გადატანა ხდება მოკლულ დათო სარალიძეზე. ამის მაგალითად ზაზა სარალიძემ დავით ოქიტაშვილის განცხადება დაასახელა.
„თუნდაც დავით ოქიტაშვილი, რომელმაც განაცახდა, რომ ლევან დადუნაშვილი მოკლეს დავით სარალიძის გამო. რას ნიშნავს ეს განცხადება? ამ საკითხთან დაკავშირებით შსს-ს მივმართე და იმედი მაქვს, რომ მიივიღებ განმარტებას, თუ რას გულისხმობდა ოქიტაშვილი. ყველა ვინც გამოდის და ლანძღავს ჩემს შვილს პირდაპირ სტატუსებში, ყველას აცვია „ოცნების“ მაიკა და ყველა არის „ოცნების“ წარმოამდგენელი“, - აღნიშნა ზაზა სარალიძემ.
ზაზა სარალიძის შემდეგ კომისიამ მოკლული ლევან დადუნაშვილის დედას, ნათია საყვარელიძეს და ოჯახის ადვოკატს მოუსმინა. სარალიძისგან განსხვავებით დადუნაშვილის ოჯახს პრეტენზია არ აქვს გამოძიებასთან, მაგრამ კითხვები აქვთ დამოუკიდებელ ექსპერტთან, მაია ნიკოლეიშვილთან.
„იმდენი ხანი გასტანა ჩემმა მდუმარებამ, მგონი, ბოლოს ყველას დაავიწყდა, რომ მეც დაზარალებული ვიყავი. ლევან დადუნაშვილი, ჩემი შვილი ვფიქრობ, რომ ასეთ ჩხუბში ლევანი ასე ბრმად არ შევიდოდა, ალბათ, ვინმე დაინახა ან ძმაკაცი, ან ნაცნობი. დათო სარალიძესთან დაკავშირებით თქვეს, რომ კონკრეტულად სასიკვდილო ჭრილობა არის არტერიაში.
მე ამას არ დავეთანხმებოდი, იმიტომ რომ 12 ჭრილობიდან არ შეიძლება ერთი კონკრეტული გამოყო. არტერია არის ძალიან სწრაფი და შეიძლება მან დაასწრო, ეს ერთი, მეორეც, ე.ი. რა გამოდის, რომ ვინც არტერია გადაჭრა, ის არის მარტო მკვლელი? ესეც არ მესმის. არ ვიცი შეიძლება იურისტები ამას რაღაც სხვა თვალით უყურებთ, მე ვთვლი რომ დათო სარალიძის მკვლელობა ეს ჯგუფური მკვლელობაა“, - განაცხადა ნათია საყვარელიძემ.
საქმეში არსებულ მასალებზე ისაუბრა ლევან დადუნაშვილის ოჯახის ადვოკატმაც. მისი თქმით, საქმის მასალებიდან გამომდინარე, სასამართლო გადაწყვეტილებას იზიარებს და აცხადებს, რომ მისთვის გაუგებარია, რატომ გაჩნდა კითხვები მათი მიმართულებით, როდესაც აცხადებენ, რომ გამოძიებას ენდობიან. ხათუნა მაღლაკელიძემ კომისიაზე ექსპერტ მაია ნიკოლეიშვილის მიმართ მისი და დაზარალებული ოჯახის უნდობლობის მიზეზები განმარტა და აღნიშნა, რომ სასამართლოს ნიკოლეიშვილის დასკვნა რომ გამოეყენებინა და გაეზიარებინა, არასრულწლოვნების მკვლელობის საქმეში ორივე ბრალდებულის მიმართ გამამართლებელი განაჩენი დადგებოდა.
„ნიკოლეიშვილის ჩატარებულ ექსპერტიზაში ყველაფერი ვარაუდებზე იყო აგებული. შეეძლო გამოეკვლია კანის პრეპარატები, რომელზეც ბრძანა, რომ ჩათვალა, არ იყო მისთვის ინფორმატიული. ასევე მაია ნიკოლეიშვილმა ბრძანა, რომ მას არ ჩაუტარებია ტანსაცმლის კვლევა, რომ ის არ არის ტრასოლოგი. როდესაც ტრასოლოგი დავკითხეთ, მან ბრძანა, რომ მხოლოდ ტანსაცმელი გამოიკვლია და შედარება არ გაუკეთებია, რადგან ის არ არის სამედიცინო ექსპერტი.
შესაბამისად, რატომ უნდა გაგვჩენოდა ნდობა ამ დასკვნის მიმართ, როდესაც ის არ იყო სრულყოფილი. ვფიქრობთ სასამართლო სწორად მოიქცა, რომ არ გამოიყენა მისი დასკვნა, როგორც მტკიცებულება და არ გაიზიარა, სადაც ის ამბობდა, რომ საერთოდ სასიკვდილო ჭრილობებეზე არ იყო დანა გამოყენებული“, - განაცხადა ხათუნა მაღლაკელიძემ.
დაზარალებულების დაკითხვის დასრულების შემდეგ, საგამოძიებო კომისიის სხდომაზე უმრავლესობის წევრმა ეკა ბესელიამ და „ევროპული საქართველოს“ წევრმა გიგა ბოკერიამ იკამათეს. კამათის მიზეზი კომისიის მიერ კონკრეტული ექსპერტების მოწვევის წესთან დაკავშირებული საკითხი გახდა. როგორც ბოკერიამ აღნიშნა, კომისია მიიღებს გადაწყვეტილებას, რა წესით მოხდება ექსპერტების დაქირავება. „ევროპულმა საქართველომ“ საგამოძიებო კომისიაში ექსპერტის სტატუსით ირაკლი ქადაგიძე და ზაზა ჭაია მიიწვია, რაც კამათის და ხანგრძლივი დისკუსიის საგანი გახდა.
„მესმის, რომ ქალბატონ ეკას მაშინაც კი, როდესაც უმცირესობაშია, სურს, რომ უმრავლესობის კანდიდატების დაბლოკვის საშუალება ჰქონდეს. ჩვენ არ აგყვებით ქალბატონო ეკა. ჩვენ არ გვსურს წესი, სადაც ჩვენ თქვენს კანდიდატურებს დავბლოკავთ. არც კი შევალ დისკუსიაში, რომ ავხსნა როგორებად მიმაჩნია ესა თუ ის ექსპერტი. არა იმიტომ, რომ ამაზე საუბარი არ შეგვიძლია, არამედ იმიტომ, რომ პრინციპულად არასწორად მიმაჩნია“, - განაცხადა გიგა ბოკერიამ.
დეპუტატმა ეკა ბესელიამ კომისიის წევრებს მიმართა, რომ მათ მოწვევაზე პასუხისმგებლობა „ევროპულ საქართველოს“ აეღო და საკითხი კენჭისყრის გზით გადაწყვეტილიყო. როგორც ბესელიამ განმარტა, თუკი კომისია ექსპერტებსა და სპეციალისტებს იწვევს, ამის თაობაზე კომისიის ყველა წევრმა უნდა იცოდეს და მათი მოწვევის გადაწყვეტილებაც კენჭისყრით იყოს მიღებული.
„ბატონო გიგა, ძალიან ნუ გაერთობით და იმ ხიბლში ნუ ჩავარდებით, რომ მართლა უმრავლესობაში გეგონოთ თავი. ეს დროში ძალიან შემოსაზღვრული მოცემულობაა. ეს ხშირად გაიხსენეთ ხოლმე. შეიძლება ისე დაიჯეროთ, რომ მერე სულ აგერიოთ ხოლმე ვერტიკალები. ამიტომ გახსოვდეთ, რომ დროებითია ეს თქვენთვის. პირდაპირ წერია, რომ ეს სამი თვით არის“, - უპასუხა ეკა ბესელიამ.
როგორც დეპუტატი აცხადებს, კომისიის თავმჯდომარემ ექსპერტად ჭაია და ქადაგიძე მოიწვია, რომელთა გვარებიც კარგად იცის საზოგადოებამ. მათი მოწვევის თაობაზე კომისიის წევრები ინფორმირებული არ იყვნენ. ეკა ბესელიას განმარტებით, კომისიამ ისეთი ექსპერტები უნდა მოიწვიოს, რომელთაც შეუძლიათ კომისიას ღირებული და მნიშვნელოვანი დახმარება გაუწიონ.
„ირაკლი ქადაგიძე იყო კრიმინალური პოლიციის უფროსი და ერთ-ერთი პასუხისმგებელი პირი, როცა კორტების სპეცოპერაცია ჩატარდა და ადამიანები ქუჩაში ჩაცხრილეს, ხოლო ჭაია მსჯავრდებულია ერთ-ერთ საკმაოდ გახმაურებულ საქმეზე. პარლამენტის რეგლამენტის გათვალისწინებით, კომისიის თავმჯდომარეს ასეთი გადაწყვეტილების ერთპიროვნულად მიღების უფლება არა აქვს“, - აღნიშნა ეკა ბესელიამ.
