მრეწველები შესაძლოა, რომელიმე „პროქართულ“ პარტიასთან გაერთიანდნენ და 8 ოქტომბრის საპარლამენტო არჩევნებისთვის ბრძოლა ბლოკის სახით დაიწყონ. თუ რომელ პარტიასთან აპირებენ ურთიერთობას, ამას პარტიის ლიდერები ჯერჯერობით არ აკონკრეტებენ, თუმცა, ხმამაღლა იმას ამბობენ, რომ მომავალი მოწვევის პარლამენტში ყოფნის და „ქართულ ოცნებასთან“ თანამშრომლობის სურვილი აქვთ.

პარტიულ გეგმებზე, for.ge ფრაქცია „მრეწველების“ თავმჯდომარეს, გოგი თოფაძეს ესაუბრა:

წინასაარჩევნო კამპანია ოფიციალურად უკვე დაწყებულია. მრეწველები ჯერჯერობით არ აქტიურობთ და არც საარჩევნო პროგრამა არ წარგიდგენიათ. რას აპირებთ?

- NDI-სა და სხვა კვლევითი ორგანიზაციების დასკვნებს ირონიული ღიმილით ვუყურებ. ჩვენი პარტია უკვე ძალიან აქტიურად მუშაობს და 73 ოლქში მაჟორიტარული დეპუტატობის კანდიდატი გვეყოლება. სხვათა შორის, წინა არჩევნებში არც ერთი კანდიდატი არ მოგვცეს. არჩევნებისთვის ვემზადებით და გვსურს, რომ არჩევნებზე მარტო გავიდეთ, რადგან ხალხის განწყობას ვხედავთ. საზოგადოებაში ჩვენი ფრაქციის მიერ წამოწეული თემების მიმართ დადებითი ემოციებია. არა მხოლოდ 5 პროცენტზე ვზრუნავთ, არამედ მეტს გვინდა მივაღწიოთ.

თქვენ ფიქრობთ, რომ 5 პროცენტიან ბარიერს გადალახავთ და უფრო მეტ პროცენტსაც აიღებთ?

- შვიდ, რვა, 12 პროცენტს მივიღებთ თუ მეტს, არ ვიცი, მაგრამ არც იმას გამოვრიცხავ, რომ პროქართულ პარტიებთან გავერთიანდეთ, თუკი ეს ქვეყანას უფრო წაადგება. პარლამენტში ცალ-ცალკე პარტია რომ შევიდეთ, გაცილებით მეტს მივაღწევთ, მაგრამ თუკი საჭირო იქნება და სტრატეგია შემუშავდება, რომელიმე პარტიასთან ბლოკის შექმნას არ გამოვრიცხავ.

„პროქართულობის“ პოლიტიკა გაცხადებული აქვთ „პატრიოტთა ალიანსს“ და თამაზ მეჭიაურის პარტიას. რომ დააკონკრეტოთ, თანამშრომლობას ამ პარტიებთან არ გამორიცხავთ?

- თამაზ მეჭიაურს ძალიან დიდ პატივს ვცემ, რადგან ის პირდაპირი, მთიული, ქართველი კაცია, რომელიც არავისზე დამოკიდებული არ არის, რომ საკუთარი პოზიცია დააფიქსიროს. თუკი მეჭიაური სურვილს თავად გამოთქვამს, მასთან არანაირი პრობლემა არ მექნება. ნეტა, მეჭიაურმა პარლამენტში შესვლა შეძლოს, მაგრამ მას უცებ, სამ-ოთხ თვეში ჩამოყალიბება და მყარი პოლიტიკური ძალის შექმნა შეიძლება გაუჭირდეს. ამის მიუხედავად, მას როგორც პატრიოტ ადამიანს პატივს ვცემ. რაც შეეხება „პატრიოტთა ალიანსს“, ირმა ინაშვილს საკმაოდ კარგი ისტორია აქვს და კარგი პოზიცია უჭირავს, „ობიექტივიც“ მართლა ობიექტურია და შედარებით, რეალობას ასახავს, რასაც ზოგიერთ სხვა ტელეარხზე ვერ ვიტყვი. როგორც ვიცი, „პატრიოტთა ალიანსმა“ ექვსი პარტია მიიერთა. ერთ ბლოკში 14 პარტია ხომ არ ვიქნებით?

თქვენი პარტიის განახლებას გეგმავთ? ახალი სახეები გეყოლებათ?

- რა თქმა უნდა. პარტიაში 1999 წლიდან არიან და რაც მაშინ გავაშუქეთ, არაფერი შეგვიცვლია. ალბათ, ის დრო გახსოვთ, საარჩევნო ყუთებში ბიულეტინები ტომრებით რომ იყრებოდა. მაშინ, შვიდპროცენტიანი საარჩევნო ბარიერი იყო, რომელიც გადავლახეთ. 2004 წელს, როცა სააკაშვილი გაჰკიოდა, რომ ერთპარტიული პარლამენტი სურდა, ჩვენზე საშინელი ზეწოლა იყო და ბარიერი მაინც გადავლახეთ. მაშინ, პარლამენტი დავტოვე, როცა ვნახე, რომ 235 დეპუტატში 24 დეპუტატი ვერაფერს გავაკეთებდით. ბევრი მონაცემი გააყალბეს და ჩემი მხრიდან პარლამენტის დატოვება პროტესტის ფორმა იყო. ჩემი მოსაზრებით, 8 ოქტომბრის არჩევნებს ხუთი-ექვსი პარტია გადალახავს.

შეგიძლიათ, ის პარტიები დაასახელოთ, რომლებიც თქვენი წარმოსახვით ბარიერს გადალახავენ?

- ამას ზუსტად ვერ გეტყვით. „ნაცმოძრაობას“ სერიოზული ფინანსური წყაროები გააჩნია, რომელიც ოთხ ნაწილად დაიშალა. ეს რატომ ხდება, არ ვიცი. მათ შორის შიდა განხეთქილება მოხდა, თუ სხვა სტრატეგიაა, ვერ გეტყვით. არ მგონია, რომ მათ დიდ წარმატებას მიაღწიონ. ძალიან გამიხარდება, რომ პროქართულმა პარტიებმა საარჩევნო ბარიერი გადალახონ.

ყოფილმა პრემიერმა, ბიძინა ივანიშვილმა ივარაუდა, რომ „ქართული ოცნება“ დაახლოებით 95 მანდატს მოიპოვებს. მათ ამის შანსი და რესურსი აქვთ?

- ალბათ, ამ თემაზე „ქართულ ოცნებაში“ დიდი ანალიზი კეთდება. არ გამოვრიცხავ, რომ „ქართულ ოცნებას“ წარმატება მაჟორიტარი დეპუტატების მხრივ ჰქონდეს. „ქართულ ოცნებას“ 95 მანდატი ექნება თუ 75, ეს მხოლოდ გამიხარდება. მართალი გითხრათ, კოალიცია არჩევნების შემდეგ უნდა იქმნებოდეს და არა ისე, როგორც ეს ჩვენ გავაკეთეთ. მაშინ, სხვა მიზანი იყო. ოღონდ, ის ჭირი მოგვეცილებინა და ყველაფერზე მივდიოდით, თორემ, კოალიციაში სხვადასხვა მსოფლმხედველობის პარტიებიც ვიყავით. მთავარი მიზანი იყო, რომ ქვეყანა „ნაცმოძრაობისგან“ გადაგვერჩინა.

თუმცა, ბიძინა ივანიშვილმა თქვა, რომ კოალიციური მთავრობა შესაძლოა, აღარც იყოს...

- კოალიციური მთავრობა დიდად ეფექტური არ არის და ამაში ივანიშვილს ვეთანხმები, მაგრამ 113 ხმა - საკონსტიტუციო უმრავლესობა უნდა მივიპოვოთ. თუნდაც, პარლამენტის გადმოტანის საკითხი გადაწყდება. სჯობს, რომ საკანონმდებლო ორგანო თბილისში დაბრუნდეს.

თქვენ ჩვენთან ერთ-ერთ ინტერვიუში აღნიშნეთ, რომ ბიძინა ივანიშვილს ურჩიეთ, კოალიცია დაშლილიყო და ყველა პარტია ცალ-ცალკე წასულიყო. პოლიტიკური პროცესები სწორედ ამ სცენარით განვითარდა და შეიძლება ითქვას, რომ ყოფილმა პრემიერმა თქვენი რჩევა გაითვალისწინა?

- 2012 წელს, სხვა ამოცანა და მიზანი იყო. მაშინ, ის პარტიები გავერთიანდით, ვისაც რაღაც პოტენციალი გვქონდა. კოალიცია შეიქმნება თუ არა, პარლამენტში თანამოაზრეები ვიქნებით და ხმას იმ კანონებს მივცემთ, რომელიც ჩვენს ქვეყანას წაადგება. არ მგონია, ქვეყნის მომავალზე ჩვენი შეხედულებები „ქართული ოცნებისგან“ განსხვავდებოდეს.

ვინაიდან, არჩევნებზე ვსაუბრობთ, გკითხავთ. რესპუბლიკელი მინისტრები პოსტებს ისევ ინარჩუნებენ და for.ge-სთან საუბარში ლევან ბერძენიშვილმა აღნიშნა, რომ მისი პარტიის სურვილია, რესპუბლიკელმა მინისტრებმა თანამდებობები არჩევნების დღემდე დაიკავონ. ამას მიესალმებით?

- არჩევნების ბოლოს, ახალი მინისტრთა კაბინეტი შეიკრიბება და მეეჭვება, რომ იქ რესპუბლიკელი მინისტრები გათვალისწინებული იყვნენ. ვიცოდი, რომ რესპუბლიკელი მინისტრები თანამდებობების დატოვებას არჩევნებამდე აპირებენ და მათ აზრი თუ შეეცვალათ, მაშინ, სხვადასხვა პარტიები არათანაბარ პირობებში ჩადგებიან. „რესპუბლიკურ პარტიას“ სამი მინისტრი ჰყავს. დარწმუნებული ვარ, რომ ვარშავის სამიტის შემდეგ იმაზე საუბარი იქნება, რომ კიდევ წინ წავიწიეთ. ვინც ნატოს გაფართოებას წყვეტს, ის ხალხი გვეუბნება, რომ თქვენ ნატოში ვერ მიგიღებთო და მიზეზებს ძალიან კარგადაც ასაბუთებენ. აჟიოტაჟის შექმნა, რომ ვარშავის სამიტის შემდეგ წინ წავიწევთ, თვითდამაჯერებელი არ არის. მინისტრების საკითხი პრემიერ-მინისტრის კომპეტენციაა, რომელშიც არ ჩავერევი.

რაც შეეხება ვანო მერაბიშვილის საქმეზე სტრასბურგის გადაწვეტილებას. როგორ აფასებთ, ევროპის სასამართლოს განაჩენს?

- როგორც ვიცი, სტრასბურგის სასამართლომ ქართულ სამართალდამცავ სისტემას გარკვეული დარღვევები მოუნახა. ის პოლიტპატიმარი რომ არ არის და მას დანაშაული ჩადენილი ჰქონდა, ეს ევროპის სასამართლოს მიერ დადგენილია. იურისტი არ ვარ და საქმის დეტალებზე ვერ ვისაუბრებ, მაგრამ სტრასბურგის სასამართლომ ხაზი გაუსვა, რომ მერაბიშვილი დაკავებულია არა პოლიტიკური მიზეზით, არამედ იმ დანაშაულების შესაბამისად, რაც მინისტრის რანგში ჩაიდინა.

ქვეყანამ მერაბიშვილს 12 ათასს ევროიანი კომპენსაცია რომ უნდა გადაუხადოს, ეს ვისი ბრალია?

- კომპენსაცია იმ დარღვევების გამო უნდა გადავიხადოთ, რაც გადაწყვეტილებაში აღნიშნულია, მაგრამ თავად ფაქტი, რომ მერაბიშვილი დამნაშავეა, ამას არ უარყოფენ. ასე რომ არ იყოს, ჯარიმის სახით რამდენიმე ასიათასი დაგვემატებოდა კიდევ.

რამდენად მოსალოდნელია, რომ პრეზიდენტმა ყოფილი ძალოვანი მინისტრი შეიწყალოს?

- ბოკერიას და პრეზიდენტის საუბარს არ ვესწრებოდი და არ ვიცი, მაგრამ „ნაციონალური მოძრაობის“ პირველი მცდელობა არ არის, რომ ყოფილი შს მინისტრი გაამართლოს. ბუნებრივია, რომ ეს გუნდური თამაშია.

გუნდური თამაშის მონაწილეებად ვის გულისხმობთ - პრეზიდენტსა და ნაციონალებს?

- ამას რატომ გამორიცხავთ? როცა სასამართლომ დაადასტურა, რომ მერაბიშვილი დამნაშავეა, პრეზიდენტი მის შეწყალებას ვერ გაბედავს. სათანადო რეაგირება იქნება. თუ ევროკავშირს ყველაფერში ვენდობით, მან დასკვნა გამოიტანა, რომ მერაბიშვილი დამნაშავეა. ამის შემდეგ, პრეზიდენტის მხრიდან შეწყალების აქტის განხორციელება ძნელი გასაკეთებელი იქნება.