11 აგვისტოს დილიდან ხალხმრავლობა იყო თბილისის მერიასთან. ორშაბათი თბილისის მერმა დავით ნარმანიამ მოქალაქეების მიღების დღედ გამოაცხადა. დავით ნარმანიასთან შეხვედრის მსურველები დილიდან თბილისის მერიასთან შეიკრიბნენ და რიგში ჩადგნენ. რა საკითხების გადაწყვეტას მოითხოვდა ხალხი მერთან მიღების პირველ დღეს და რას დაჰპირდა მათ დავით ნარმანია?

ლეილა შამოიანი თბილისის მერთან შეხვედრის მსურველთა სიაში 162-ეა. მას შინ სამი შვილი ჰყავს დატოვებული. ამბობს, რომ რადაც არ უნდა დაუჯდეს, დედაქალაქის მერს უნდა შეხვდეს და თავისი გასაჭირის შესახებ მოუთხროს. ლეილა ვარკეთილის დასახლებაში, ე.წ. სვანების ბაზრობის მიმდებარე ტერიტორიაზე, გაურემონტებელ შენობაში ცხოვრობს.

„დღეს კონკრეტულად ვითხოვ, ან ის ფართი დაგვიმტკიცონ, სადაც ახლა ვართ, რომ რაღაც ელემენტარული პირობები შევქმნათ, - წყალი არ გვაქვს, სინათლე, გაზი,კანალიზაცია, - ან, თუ არ დაგვიმტკიცბენ, სხვა ფართით დაგვაკმაყოფილონ. ავადმყოფი შვილის დედა ვარ, უმძიმეს პირობებში ვზრდი გონებრივად ჩამორჩენილ ბავშვს. ახლაც ჯანდაცვის სამინისტროში დავტოვე საბუთები, რომ იქნებ როგორმე ტვინის ენცეფალოგრამის საფასური - 250 ლარი - დამიფინანსონ. არ ვიცი, მომცემენ კი? დავდივართ მოწყალებაზე და იქაც მუშაკები გვიშლიან, არ იაროთო. ვერ ვცხოვრობთ ჩვენი სოციალური დახმარებით მხოლოდ, ვერ ვარსებობთ“...

თბილისის მერიასთან მისული ხალხის უმრავლესობას ბინის საკითხი აქვს გადასაწყვეტი, ზოგი აპირებს მერს დასაქმება მოსთხოვოს. ასეთია, მაგალითად, პაატა რაზმაძე - ლტოლვლი გორის რაიონიდან, უმუშევარი. ამბობს, რომ მშობლების სარჩენი ფული არ გააჩნია და დავით ნარმანიასთან სამსახურის სათხოვნელად მიდის:

„მინდა დავსაქმდე, იქნებ ორი კაპიკი ფული მქონდეს, აქეთ-იქით ასე უაზროდ არ ვიარო. თავი ადამიანდ ვიგრძნო“.

თავად დედაქალაქის მერი დავით ნარმანია აცხადებს, რომ მსგავსი შეხვედრების მიზანი არის ის, რომ მოქალაქეებმა თავად გააცნონ საკუთარი პრობლემა თუ საჩივარი გადაწყვეტილების მიმღებ თანამდებობის პირებს:

„მიზანი სწორედ ესაა, რომ მთავრობამ და მოქალაქეებმა ერთად განიხილონ ის საკითხები, რაც მხოლოდ წერილის შემოტანით შესაძლოა ვერ გადაწყდეს.ამას ვპირდებოდით კიდეც ჩვენს ამომრჩეველს, რომ ასეთი შეხვედრები მოსახლოებასთან დაწესდებოდა“.

მერიის ადმინისტრაციის უფროსი მარიამ შელეგია ამბობს, რომ მოქალაქეების მიღების დღედ  ორშაბათი დაწესდა. მერი და მისი მოადგილეები მოქალაქეებს დღის ორიდან ექვს საათამდე მოუსმენენ. მოქალაქეებს შესაძლებლობა ექნებათ აიღონ რიგის ნომერი, როგორც ეს, მაგალითად, მიღებულია ბანკებსა თუ სადაზღვევო კომპანიებში და თავის რიგს დაელოდონ.

„რეაგირებას მოვითხოვთ, არ გვინდა სახლის გარეშე დავრჩეთ. ჩემი ოთხი შვილით ქუჩაში თუ გამოგვყრი, სად წავიდეთ?“.

როლანდ თოდუას მსგავსად, მერიისგან საკუთარი პრობლემების გადაჭრას კიდევ ასობით ადამიანი ელის. მერიაში განსახილველად ამ დროისათვის მოქალაქეთა 1800 განცხადებაა შესული.