გიორგი ბაჩიაშვილმა სომხეთის საზღვარი რუსული პასპორტით გადაკვეთა. პასპორტის გაცემის თარიღი არის 2024 წელი, მაშინ, როდესაც ბაჩიაშვილი ხელისუფლებას პრორუსულობაში ადანაშაულებდა და ამ მოტივით აფინანსებდა ქუჩის აქციებს, თავად დაკავებული იყო იმით, რომ თავშესაფარი რუსეთის ტერიტორიაზე მიეღო და ამ მოტივით მიიღო რუსეთის პასპორტიც, მაგრამ შემდეგ გეგმა შეცვალა და, დიდი ალბათობით, ის თავს საფრანგეთს აფარებს. არსებობს ინფომარმაცია, რომ სომხეთიდან ის გაემგზავრა სომხეშთი საფრანგეთის საელჩოში, სადაც მიიღო უსაფრთხობის ქოლგა, ანუ გარანტია. ბაჩიაშვილი ახლა იმალება და მას, როგორც ჩანს, უცხო ქვეყნის სპეცსამსახურები უწევენ მფარველობას.

რაც შეეხბა შოთა ქარუმაძეს, რომელიც ბაჩიაშვილის საზღვრის უკანონოდ გადაკვეთაში დაეხმარა, სანაცვლოდ 30 000 დოლარი გადაუხადა. წარსულში ნასამართლევ ქარუმიძეს აღკვეთის ღონისძიების სახით პატიმრობა შეეფარდა. საქმის პროკურორის ანი ხახანაშვილის განმარტებით, დასადგენია დანაშაულთან შემხებლობაში მყოფი სხვა პირები.

ბრალდებულის ადვოკატის ალექსანდრე ამირხანაშვილის თქმით, აუცილებლობას არ წარმოადგენდა უმკაცრესი აღკვეთის ღონისძიების პატიმრობის გამოყენება, ვინაიდან ის ბრალდებასაც ეთანხმება. ამირხანაშვილის განმარტებით, ბრალდების მხარის მიერ გაჟღერებულ ინფორმაციაში ლომის წვლილი სწორეს ბრალდებულმა შეიტანა. ადვოკატმა შოთა ქარუმიძის მიმართ 80 000-ლარიანი გირაოს გამოყენება იშუამდგომლა. სიტყვით ისარგებლა ბრალდებულმაც და აღნიშნა, რომ ის გამოძიებასთან თანამშრომლობს.

„დედაჩემი არის ცუდად, ამასაც თუ გაითვალისწინებთ, კარგი იქნება. უჩემოდ უჭირს გადაადგილება. ვთანამშრომლობ და ვითანამშრომლებ, რომ არ მდომოდა თანამშრომლობა, დუმილის უფლებით ვისარგებლებდი. პირიქით, წავედი თანამშრომლობაზე. მიმალვის საშიშროება არ არის“, - განაცხადა შოთა ქარუმიძემ.

ქარუმიძე პატიმრობაშია, გამოძიებასთან თანამშრომლობს და ახლა მან უნდა თქვას, ვინ იყო მასსა და ბაჩიაშვილს შორის შუამავალი, ვინ იყო კოორდინატორი და ვინ აგვარებდა ტექნიკურ საქმეებს. საქმეში ფიგურირებს ბაჩიაშვილის მამაც და არ არის გამორიცხული, რომ გამოძიებამ მას ბრალი წაუყენოს.

პარლამენტის თავმჯდომარის განცხადებით, ვნახეთ, ბაჩიაშვილს როგორი კრიმინალური ენერგია ჰქონია. მისი თქმით, ასე ცივსისხლიანად დაგეგმავდა იმ ადამიანის ღალატს და ზურგში დანის ჩარტყმას, რომელმაც კაცად აქცია და გზაზე დააყენა. შალვა პაპუაშვილმა აღნიშნა, რომ ბაჩიაშვილის საქმე ოპოზიციის არიფობის მხილებაა, რადგან ოპოზიციამ ჩაიხუტა ჩვეულებრივი კრიმინალი ადამიანი.

„კაცური და მამაცური საზღვრის კვეთა რა არის. გასაგებია, საზღვარს რომ კვეთს ადამიანი, ასე დამცირებულად აკეთებს... ლიტერატურაშიც ასეა აღწერილი, ჯერ კიდევ „ყვარყვარეს“ დროიდან ვიცით ეს ამბები, შემდეგ სააკაშვილმა გაიმეორა ეს ყველაფერი და ახლა ბაჩიაშვილი ვნახეთ. ეს ერთადერთი რამის მაგალითია, თუ რამხელა კრიმინალური ენერგია ჰქონია ამ ადამიანს. ამდენი ხანი გეგმავდა. ვინმეს ეჭვი ეპარება მის კრიმინალობაში სხვა საქმეებთან დაკავშირებით?! ვნახეთ, ადამიანს როგორი კრიმინალური ენერგია ჰქონია. გაირკვა, რომ მანქანა აყიდინა, თავად გადააკეთა. ასეთი გეგმები რომ ჩამოაყალიბა, ამით საკუთარი თავის წინააღმდეგ მისცა ჩვენება სხვა სასამართლო პროცესებთან დაკავშირებით, რომ კი, რა თქმა უნდა, იზამდა იმას, რასაც პროკურატურა ედავება.

კიდევ ერთი მხილებაა ჩვენი ოპოზიციის არიფობის. იცით, რომ გმირად გამოაცხადეს ადამიანი, რომელიც აღმოჩნდა, რომ რუსეთის მოქალაქეა. თავად რომ ჰკითხოთ, გაკარება არ უნდათ, რაც „რ“ ზე იწყება არაფერი მოსწონთ, აღიზიანებთ და რუსეთის მოქალაქე აღმოჩნდა გიორგი ბაჩიაშვილი. ოპოზიციას რომ აფინანსებდა და ამით ამაყობდა, იმ დროს გეგმავდა კრიმინალს. სალომე ზურაბიშვილი მას გადაეხვია აქციაზე, თუ ასე შემდეგ, ოპოზიციამ ჩაიხუტა ჩვეულებრივი კრიმინალი ადამიანი. „ბაჩიაშვილები“ და „კეზერაშვილები“ ყველა საზოგადოებაში იქნებიან, კარგია, რომ ჩვენი უსაფრთხოების სამსახურები ძალიან აქტიურად მუშაობენ და ბევრი დეტალი გავიგეთ“, - აღნიშნა შალვა პაპუაშვილმა.

ახლა მთავარი და მნიშვნელოვანია ვინ მიწვდება პირველი ბაჩიაშვილს - მართლმსაჯულების ხელი, თუ ქურდული სამყარო. ექსპერტების ნაწილი თვლიან, რომ ბაჩიაშვილი კონკრეტული ქვეყნის სპეცსამსახურებმა გაიყვანეს ქვეყნიდან, ისევე როგორც შექნეს თავის დროზე და გახადეს ივანიშვილის გუნდის გავლენიანი წევრი. პოლიტოლოგ ირაკლი გოგავას განცხადებით, თუ ვინმე არის ბიძინა ივანიშვილის გარშემო, აბსოლუტურად ყველასთან მიდის რამდენიმე სპეცსამსახური და ცდილობენ, რომ გადაიბირონ. მინიმუმ, ინფორმატორობა დაავლონ, მაქსიმუმ კიდევ სხვა დავალებებიც მისცენ.

„ვინც კი არის საქართველოს მთავრობაში, ივანიშვილის გარემოცვაში, მის ბიზნეს-სტრუქტურებში, ყველასთან მიდიან და ცდილობენ, რომ გადაიბირონ. ეუბნებიან ასეთ რამეს - „შენ ივანიშვილთან ხარ, „ქართუ ბანკში“ მუშაობ თუ „თანაინვესტირების ფონდში“ 2-3 წელი იმუშავებ და მერე რას აკეთებ? ჩვენთან თუ იქნები, მოგხედავთ მთელი ცხოვრება და პლუს, მოგცემთ უსაფრთხოების გარანტიებს. ასეთი შეთავაზებას აკეთებენ სხვადასხვა სპეცსამსახურები. არ გამოვრიცხავ, რომ ბაჩიაშვილიც ასეთი პერსონაჟი იყო, რომელსაც დაელაპარაკენ.

ჩემთვის მთავარი არის ზნეობა და მორალი. მერე არის კანონი. მე, როგორც მითხრეს, ეს ადამიანი იყო ავტოდილერი. გერმანიიდან ჩამოჰყავდა მანქანები. მერე აღმოჩნდა ბიძინას კართან, როგორც ხდება საქართველოში, მივიდნენ ივანიშვილთან და სთხოვეს მის შესახებ და დაასაქმეს. როგორც ჩანს, თვითონაც სხარტი გონება აქვს“, - აცხადებს გოგავა.

გადაიბირეს თუ არა სპეცსამსახურება არ იცის, ვერ დაადასტურებს, მაგრამ, დიდი ალბათობით, თვლის, რომ გადაიბირეს, რადგან მოქმედების ალგორითმი ამას ადასტურებს.

„ავტოდილერი ხარ, ადამიანმა თავის ყველაზე დიდ კომერციული სტრუქტურის უფროსად დაგნიშნა. მილიარდიან პროექტებს ხელმძღვანელობ, მაღალი ხელფასი გაქვს, ავტორიტეტი გაქვს საზოგადოებაში ბიძინას გამო, გაქვს დიდი მომავალი, რომ ქვეყნისთვის კარგი საქმე აკეთო და მართლა კარგი რამე გააკეთეს თანაინვესტირების ფონდიდან, მაგრამ გამოიჩინა აბსოლუტური უმადურობა, მოუტეხა ფული. პირდაპირი გეგმა ჰქონდა, რომ გადაეგდო. გაიპარა ამ თავისი 8 ათასი ბიტკოინით და ეს იყო ყველაზე დიდი შეცდომა, რაც დაუშვა.

ახლა მთელი კრიმინალური სამყარო დაწყებული იაკუძადან, დამთავრებული რუსული მაფიით და ქუთაისელი ქურდებით, გადასულია ყველაზე მაგის ძებნაზე. კაცი დარბის და 700 მილიონი აქვს ჯიბეში, რომელიც გაქცეულია ქვეყნიდან. ახლა მოუწვეს ამ კრიმინალებს დაემალოს, მაგრამ სად დაემალება? კრიმინალი ეს არაა საქართველოს პოლიცია და სასამართლო, სულ სხვა სისტემაა. მიწიდან ამოიღებენ. გაიჩალიჩა და თავის ოჯახსაც გაუჩაილიჩა“, - აცხადებს for.ge-სთან საუბრისას ირაკლი გოგავა.