თბილისის მერი კახა კალაძე მედიასთან ნაციონალური მოძრაობის მიერ ახალი ლობისტური კომპანიის დაქირავების ფაქტს გამოეხმაურა.

მისივე განცხადებით, მსგავსი ტიპის ლობისტური კომპანიები ავრცელებენ სიცრუეს და თავს ესხმიან ქართულ სახელმწიფოს.

„ეს არ არის პირველი შემთხვევა. ხშირად ვხვდებით ამ ტიპის დოკუმენტებს. სხვათა შორის ამიტომ არის გამჭვირვალობა მნიშვნელოვანი, რომ საზოგადოებას ჰქონდეს ყველაფერზე ხელმისაწვდომობის შესაძლებლობა. ზუსტად „ფარას“ დოკუმენტებით გავიგეთ, რომ უილსონი 80 000-ს იღებს იმაში, რომ სიცრუე ილაპარაკოს და თავს დაესხას ქართულ სახელმწიფო. „ფარას“ დოკუმენტებით გავიგეთ, როგორ ხდებოდა ევროპარლამენტარების მოსყიდვა, რომ რეზოლუციები მიეღოთ იმ ტიპის, რომელსაც ბოლო თვეებისა და წლების განმავლობაში ვხედავდით. ახალი ხელშეკრულებაც მიმართული იქნება ქვეყნის წინააღმდეგ, უნდა დაკავდნენ სიცრუით და ცილისწამებით“, - განაცხადა კახა კალაძემ.