ბოლო პერიოში აქტიურად მიდის საუბარი საქართველოს მეხუთე პრეზიდენტის, სალომე ზურაბიშვილის ირგვლივ პლატფორმის ჩამოყალიბებასა და გაერთიანებაზე. ამ დროისთვის, ზურაბიშვილი „საერთო დოკუმენტზე“ მუშაობს, თუმცა, ჯერჯერობით, შინაარსი ცნობილი არ არის. როგორც ოპოზიციაში ამბობენ, დოკუმენტი უახლოეს პერიოდში გასაჯაროვდება. მანამდე კი, ყოფილი პრეზიდენტი კონსულტაციებს მართავს როგორც ელჩებთან და არასამთავრობო ორგანიზაციებთან, ასევე აქტივისტებთან და ოპოზიციონერებთან. ანალიტიკური და პოლიტიკური წრეების ერთი ნაწილისთვის გაუგებარია, კონკრეტულად რა იგულისხმება ამ პლატფორმაში. მეორე ნაწილი კი აცხადებს, რომ მზად არიან შეუერთდნენ და მონაწილეობა მიიღონ ამ პლატფორმის შექმნაში, რათა „გაერთიანდნენ მომავლისთვის“.
ანალიტიკოსი, ვახტანგ ძაბირაძე For.ge-სთან საუბარში აღნიშნავს, რომ ზურაბიშვილის მიერ წამოწყებულ ინიციატივებს არც გაგრძელება და არც რაიმე კონკრეტული შედეგი არ მოჰყოლია. მისი შეფასებით, აუცილებელია საზოგადოებამ იცოდეს, კონკრეტულად რა პლატფორმის ჩამოყალიბებაზეა საუბარი.
„ამაზე საუბარი ხშირად მიდის, თუმცა რა იგულისხმება მასში, ეს არის მთავარი - გაუგებარია, რა პლატფორმაზეა ლაპარაკი. ზურაბიშვილი ხან რაღაც ინიციატივებით გამოდის, ბოლოს იყო 5-პუნქტიანი ინიციატივა, მანამდე იყო ქარტია, მაგრამ ამ ინიციატივებს, როგორც წესი, არანაირი შედეგი ან გაგრძელება არ მოყოლია. ამიტომ, როდესაც ახალი პლატფორმის შექმნაზეა საუბარი, ეს ჩემში საკმაოდ სკეპტიკურ განწყობას იწვევს, რადგან არ ვიცი, კონკრეტულად რა მოიაზრება, ან ვინ რას მოიაზრებს ამ პლატფორმაში“, - განაცხადა ძაბირაძემ.
როგორც ანალიტიკოსმა თქვა, ზურაბიშვილს ქვეყნის გარეთ რეიტინგი და გავლენები აქვს, თუმცა რთულია იგივე ითქვას უშუალოდ ქვეყნის შიგნით მის მიმართ დამოკიდებულებაზე.
„ზურაბიშვილს საზოგადოებაში რეიტინგი ნამდვილად აქვს, მაგრამ მისი გაზომვა ცოტა რთულია, განსაკუთრებით მას შემდეგ, რაც ზურაბიშვილი, ფაქტობრივად, გადავიდა ოპოზიციაში. რაც შეეხება ქვეყნის გარეთ, ის ოპოზიციის უპირობო ლიდერია - მას ხვდებიან, ელაპარაკებიან და ღებულობენ ისე, როგორც საქართველოს ხელისუფლების უმაღლეს წარმომადგენელს. ამიტომ, მას რაღაც გავლენები და მექანიზმები ნამდვილად აქვს, მაგრამ ქვეყნის შიგნით რამდენად შეძლებს ოპოზიციური, პოლიტიკური საზოგადოების მობილიზებას და გაერთიანებას, ეს ცოტა რთული სათქმელია. ეს პროცესია და როგორც ჩანს, ჯერ ვერ ხედავს თავის ადგილს და როლს ქვეყნის შიგნით“, - დასძინა ვახტანგ ძაბირაძემ.
ანალიტიკოსი ედიშერ გვენეტაძე თვლის, რომ ზურაბიშვილის მიერ დაწყებულ ინიციატივას რაიმე შედეგი არ მოჰყვება.
„ზურაბიშვილი იქნება „პოპულარული“ იმ დრომდე, ვიდრე სჭირდებათ გვარამიასთან, მელიასთან, მაჭუტაძესთან და ასეთ ხალხთან. სხვა მხრივ, საზოგადოებაში მისი რეიტინგი არის მინუსებში გადასული. ეს არის თავშივე განწირული, აქედან არაფერი გამოვა“, - აღნიშნა ედიშერ გვენეტაძემ.
„ნაციონალური მოძრაობის“ თავმჯდომარემ თინა ბოკუჩავამ განაცხადა, რომ „თუ პლატფორმა შედგება სალომე ზურაბიშვილის ირგვლივ, მზად ვიქნებით, მივიღოთ მონაწილეობა“. მისი თქმით, ყველაფერი უნდა გადადონ გვერდზე და მომავლისთვის გაერთიანდნენ.
„ვფიქრობ, რომ გადაწყვეტილებები ძალიან არ უნდა გაიწელოს. რამდენი ხანია ამ მდგომარეობაში ვართ. ასი დღეა ადამიანები ქუჩაში არიან, ამდენი ხანია ადამიანები საპყრობილეებში არიან, შიმშილობენ, არიან არაადამიანური მოპყრობის მსხვერპლი, რა უნდა მოხდეს მეტი ქვეყანაში, რომ პოლიტიკურმა ძალებმა გადაწყვეტილება მიიღონ აღნიშნულზე? თუ არ არის გაერთიანების რესურსი, ახლაც არასწორი და არაგულწრფელი გადაწყვეტილება იქნება მიღებული, „ნაციონალური მოძრაობა“ იბრძოლებს მომავალშიც ივანიშვილის რეჟიმის წინააღმდეგ“, - განაცხადა თინა ბოკუჩავამ.
აღნიშნულ საკითხს ასევე პარლამენტის პირველი ვიცე-სპიკერი, გია ვოლსკი გამოეხმაურა. მისი განმარტებით, „სალომე ზურაბიშვილი ხან „ქარტიას“ აქვეყნებს, ხან ევროპულ „ვოიაჟს“ ისე აჩვენებს, თითქოს მან გადაწყვიტა საქართველოს ბედი, მაგრამ ამას შედეგი არ აქვს“.
„სალომე ზურაბიშვილი დაიტანჯა თავისი პიროვნების აქტუალობის წამოწევის მცდელობებით. 2022 წლიდან მოყოლებული, ყოველდღიურად ცდილობს, რომ როგორმე ოპოზიციას ჩაუდგეს სათავეში და სააკაშვილი ჩაანაცვლოს, როგორც ამ კოლექტიური „ნაცმოძრაობის“ ლიდერმა. მან პრაქტიკულად, ზურგი შეაქცია ადამიანებს, ვინც იგი აირჩია და დღეს არის ადამიანებთან დაკავშირებული, რომლებმაც მას უკიდურესად მძიმე შეურაცხყოფები მიაყენეს. დღეს, ეს შეურაცხყოფები, რასაკვირველია, დღის წესრიგშია, თუმცა ხმამაღლა არ ისმის. ამ მცდელობებშია სალომე ზურაბიშვილი. ხან „ქარტიას“ აქვეყნებს, ხან ევროპულ „ვოიაჟს“ ისე აჩვენებს, თითქოს, მან გადაწყვიტა საქართველოს ბედი, მაგრამ ამას შედეგი არ აქვს, იმიტომ რომ ყველამ კარგად იცის, რას წარმოადგენს, რა უნდა და რა მიზანს ემსახურება. ეს მიზანი უცვლელია, იგივეა, რაც გააჩნია ლევან ხაბეიშვილს, თინა ბოკუჩავას, ზურაბ გირჩი ჯაფარიძეს თუ თეონა აქუბარდიას. აქედან გამომდინარე, მისი ეს მცდელობები, რაღაც ფინტების ტარება პოლიტიკურ ველზე, არის უშედეგო. ახლა კიდევ ახალ ქარტიას გამოაქვეყნებს, მერე ვიღაცები დაიწყებენ მცდელობებს, რომ როგორმე ამ ქარტიაზე ხელი მოაწერინონ ადამიანებს, ვინც გუშინ სალომე ზურაბიშვილს დამამცირებელ სიტყვებს უწოდებდა. ეს ღლიცინი, ეს ფუთფუთი არის მუდმივად მახასიათებელი აი, ამ ყოფილი პრეზიდენტის“, - განაცხადა ვოლსკიმ.
