აშშ უკრაინის პრეზიდენტის, ვოლოდიმირ ზელენსკის შემცვლელს ეძებს. როგორც Politico წერს, აშშ-ის პრეზიდენტ დონალდ ტრამპის ადმინისტრაციის ოთხმა მაღალჩინოსანმა ბოლო პერიოდში „საიდუმლო მოლაპარაკებები“ გამართა ზელენსკის მთავარი პოლიტიკური ოპონენტების ნაწილთან. ვაშინგტონი ცდილობს, გაიგოს, შესაძლებელია თუ არა სწრაფი საპრეზიდენტო არჩევნების ჩატარება კიევში, რათა ზელენსკი ხელისუფლებიდან ჩამოაშორონ.
აშშ-ის ოფიციალური პირები ესაუბრნენ რამდენიმე უკრაინელ პოლიტიკოსს, მათ შორის ყოფილ პრემიერ-მინისტრ იულია ტიმოშენკოსა და პარტია „ევროპული სოლიდარობის“ ხელმძღვანელობას, რომელსაც ზელენსკის წინამორბედი, პეტრო პოროშენკო უდგას სათავეში.
პრეზიდენტ ტრამპის მრჩევლები დარწმუნებულნი არიან, რომ ზელენსკი ნებისმიერ არჩევნებს წააგებს, რადგან უკრაინაში „ომის დაღლილობა და კორუფციით გამოწვეული საზოგადოებრივი უკმაყოფილება“ მზარდია. ამ კამპანიის კულმინაცია გახდა გასულ კვირას თეთრ სახლში გამართული მწვავე კამათი ტრამპს, ზელენსკის და აშშ-ის ვიცე-პრეზიდენტ ჯეი დი ვენსს შორის.
ტრამპის განცხადება, რომ ზელენსკი „არჩევნების გარეშე მმართველი დიქტატორია“, ისევე ტულსი გაბარდისა და ილონ მასკის მტკიცება, რომ ზელენსკიმ არჩევნები გააუქმა.
ამ დაძაბულობის ფონზე კი ზელენსკისა და ტრამპს შუამავლობას საფრანგეთის პრეზიდენტი და ბრიტანეთის პრემიერი სთავაზობენ. თუმცა ჯერჯერობით უცნობია, წავლენ თუ არა ისინი ვაშინგტონში და მოხდება თუ არა ზელენსკის ტრამპთან შერიგება. უკრაინის ომის და ზელენსკის მიმართ ტრამპის პოზიცია უცვლელია. მიუხედავად იმისა, რომ მან ზელენსკისგან ბოდიშის წერილი მიიღო, ტრამპს ჯერ კიდევ არ უთქვამს როდის აპირებს შეჩერებული დახმარების აღდგენას უკრაინისთვის. ასევე ცნობილი ხდება, რომ ამერიკამ უკრაინასთან სადაზვერვო ინფორმაციის გაზიარებაც შეაჩერა, რომელიც კიევს რუსეთის ტერიტორიაზე სამიზნეების დაბომბვაში ეხმარებოდა. საპასუხოდ, ვოლოდიმირ ზელენსკიმ თავდაცვის მინისტრს, სადაზვერვო სამსახურების ხელმძღვანელებსა და დიპლომატებს ამერიკელ კოლეგებთან კომუნიკაცია და ინფორმაციის მიღება დაავალა. ვიდეომიმართვაში კი აღნიშნა, რომ მოლაპარაკებებისთვის მზად არის.
აშშ-ს პრეზიდენტის ადმინისტრაცია გეგმავს გააუქმოს დროებითი სამართლებრივი სტატუსი დაახლოებით 240,000 უკრაინელისთვის, რომლებმაც სამშობლო ომის გამო დატოვეს. ამის შესახებ ინფორმაციას reuters ავრცელებს. აღნიშნული გადაწყვეტილების მიღება მოსალოდნელია აპრილში. ასევე, სააგენტო reuters წერს, რომ აპრილიდან შესაძლოა ტრამპის ადმინისტრაციამ დროებითი სამართლებრივი სტატუსი მილიონ 800 000-ზე მეტ მიგრანტს მოუხსნას.
„ხალხის ძალის“ წევრი და ანალიტიკოსი თამარ ჩიბურდანიძე for.ge-სთან ამბობს, რომ უკრაინას და ევროპას სხვა გამოსავალი არა აქვთ და ისინი ტრამპის სამშვიდობო გეგმას დათანხმდებიან. მისი აზრით, უკრაინის პრეზიდენტის თავხედური ქცევა ოვალურ კაბინეტში კარგად დაგეგმილი პროვოკაცია იყო, რომელიც მან ევროპელებთან ერთად დაგეგმა და განახორციელა.
„ზელენსკი მარტო რომ არ მოქმედებს, ეს უკვე ძალიან ნათლად ჩანს. მან რაც ოვალურ კაბინეტში ჩაიდინა, ეს იყო კარგად დაგეგმილი პროვოკაცია ევროპელებთან ერთად. რაც შეეხება ზელენსკის ე.წ. შერიგებას, მან ტრამპს ბოდიში წერილით უკვე შეუთვალა. თუმცა არ მგონია, რომ ტრამპს მისი ბოდიშები და მასთან შერიგება საერთოდ ანაღვლებდეს. არც ის მჯერა, რომ მაკრონის და სტრამერის დახმარების მიუხედავად, ის ზელენსკის აპატიებს იმ საქციელს, რომელიც მან ოვალურ კაბინეტში ჩაიდინა. ევროპის მცდელობა, რომ ზელენსკი დარჩეს, რა თქმა უნდა, მათი ინტერესებით არის განპირობებული. მათი განცხადებები სამხედრო დახმარების შესახებ ირონიული და მთელი მსოფლიოსთვის სასაცილო გახდა.
ყველამ კარგად იცის, რა სამხედრო რესურსი გააჩნიათ. რუსეთის აგრესიას თავად ევროპა ამერიკის გარეშე ვერ გაუძლებს. ამერიკა თავის პოზიციას არ შეცვლის და ის არ განაახლებს უკრაინის დახმარებას, სანამ ზელენსკი და მისი პატრონები ევროპაში მის სამშვიდობო გეგმას არ მიიღებენ. აქედან გამომდინარე, ზელენსკი და ევროპა ჩიხში არიან. ამიტომ არ გამოვრიცხავ, რომ თავად უკრაინის ოპოზიციის მხრიდან ხდება აშშ ადმინისტრაციასთან დაკავშირება და შეთავაზება გეგმის, როგორ შეიძლება უკრაინა გადარჩეს. პოროშენკო და ტიმოშენკო ნამდვილად არიან ის ნეიტრალური ფიგურები, რომელთა მეშვეობითაც არ არის გამორიცხული მოლაპარაკების მაგიდასთან დაჯდომა. ისინი რუსეთისთვისაც არ იქნებიან მიუღებელი ფიგურები, რადგან მათთან საუბარი შესაძლებელი იქნება. ისინი არავისთან ვალდებულები არ არიან ზელენსკისგან განსხვავებით, გარდა უკრაინელი ხალხისა“,-ამბობს ჩიბურდანიძე.
მისივე თქმით, ორივე ეს ფიგურა რუსეთთან დაბალანსებული პოლიტიკის მომხრეა და მშვიდობა სურთ. ანალიტიკოსი ამბობს, რომ უკრაინაში არჩევნები გარდაუვალია.
„ზელენსკის სხვა გამოსავალი არა აქვს, მას უნდა თუ არა, არჩევნების ჩატარება მოუწევს. ამიტომ დარწმუნებული ვარ, რომ ეს პროცესი დაწყებულია და გარდაუვალი იქნება. შესაბამისად, მიდის უკვე ისეთი პოლიტიკური ფიგურების მოძიება, რომელთანაც აშშ და რუსეთიც დაილაპარაკებენ. ზელენსკის ევროპელებთან ერთად არ ასცდება სასამართლო, რადგან მას იმ გამქრალ მილიარდებს არავინ შეარჩენს, რომელიც დახმარების სახით აშშ-ან მიიღო. ამ კვალს ტრამპის ადმინისტრაცია უკვე დაადგა და მას მალე მოუწევს ბევრ კითხვაზე პასუხის გაცემა. ამიტომ ცოტახანს ჯერ ევროპის წაქეზებით ფეხების ბაკუნს ზელენსკი გააგრძელებს, მაგრამ როდემდე?
ტრამპის გარემოცვა პირდაპირ საუბრობს ფულის გათეთრების სქემაზე და იმაზე, როგორ მიითვისეს ზელენსკის გარემოცვამ მილიარდები. იციან, რომ ტრამპი ამ ფაქტს არ დატოვებს ასე და თუ მას გამოსავალს არ დაუტოვებენ, ომის პოლიტიკის ხელმძღვანელობას, თავის ზელენსკიანას პასუხს აგებინებენ. მათ აქვთ ორი არჩევანი, ან წაჰყვებიან ტრამპს სამშვიდობო გეგმაში, ან ფულის გაფლანგვის ბრალდებით პასუხისმგებლობა მოუწევთ“, - ამბობს ჩიბურდანიძე.
