სააფთიაქო ქსელში სარეალიზაციოდ დარჩენილი ნარკოტიკის შემცველი აბების ინვენტარიზაცია მოხდება. ამას ჯანდაცვის სამინისტრო გააკეთებს. პარლამენტის წევრებს და სხვა დაინტერესებულ ადამიანებს ამის თაობაზე ინფორმაცია დეპუტატმა ზაქარია ქუცნაშვილმა მიაწოდა.

სხდომაზე შინაგან საქმეთა და ჯანდაცვის სამინისტროები საკანონმდებლო ინიციატივას იხილავდნენ, რომლის თანახმად, კოდეინის, ეფედრინის, ფსევდოეფედრინისა და ნორეფედრინის შემცველი საშუალებების ლეგალურ ბრუნვაზე - კონტროლი, ხოლო მათ რეალიზაციასთან დაკავშირებული წესების დარღვევაზე პასუხისმგებლობა მკაცრდება.

პროექტის ფარგლებში ერთ-ერთი სიახლეა ის, რომ კოდეინის, ეფედრინის, ფსევდოეფედრინისა და ნორეფედრინის შემცველი ფარმაცევტული პროდუქტების იმპორტ-ექსპორტის დროს, საქართველოს წლიური მოთხოვნის გათვალისწინებით, სახელმწიფოს შიდა კვოტა განისაზღვრება, რომელიც შინაგან საქმეთა და ჯანდაცვის მინისტრების ერთობლივი ბრძანებით დადგინდება.

„სააფთიაქო ნარკომანიის მასშტაბებიდან გამომდინარე, ვერ დავადგინეთ სააფთიაქო ქსელში რამდენი აბი არსებობს, რომელთა რეალიზაციაც შეიძლება მოხდეს. აქედან გამომდინარე, ჯანდაცის სამინისტრო მოახდენს ინვენტარიზაციას, თუ რამდენი აბია ქსელში დარჩენილი, რაც ნარკოტიკულ შემადგენელს შეიცავს. ამის შემდეგ განისაზღვრება 2014 წლის კვოტის ოდენობა, გამომდინარე საჭიროებიდან. შიდა კვოტირების განსაზღვრის საშუალებას ინვენტარიცაზიის შედეგები მოგვცემს“, - განაცხადა ქუცნაშვილმა პარლამენტის სხდომაზე.

ჯანდაცვის სამინისტროს მონაცემებით, 2012-13 წლებში 2 მილიონზე მეტი ასეთი აბია იმპორტირებული.

ფარმაცევტული ბიზნესით დაკავებული კომპანიები იმ ახალ ცვლილებს მიესალმებიან, რომელიც სულ ახლახნ დაიგეგმა. მათ არც რეცეპტებთან დაკავშირებულ საკითხებთან აქვთ დიდ შენიშვნები, მაგრამ ე.წ. ჯენერიკებთან დაკავშირებით სხვა შეხედულებები აქვთ. ფარმაცევტები თვლიან, რომ მომხმარებელს ჯენერიული პრეპარატის არჩევის საშუალება უნდა ჰქონდეს.

სააგენტო „ბიპიენის“ ინფორმაციით, ფარმაცევტული ნაწარმის რეალიზაციის წესებში ცვლილებების თაობაზე ბათუმში შეხვედრა გაიმართა, რომელსაც ფარმაცევტული კომპანიების წარმომადგენლები და სამედიცინო საქმიანობის სახელმწიფო რეგულირების სააგენტოს თანამშრომლები დაესწრნენ.

როგორც სააგენტოს ფარმაცევტული საქმიანობის ინსპექტირების სამმართველოს უფროსმა, ნანა შაშიაშვილმა განმარტა, საუბარი იყო რეცეპტის ეტაპობრივი დანერგვის საკითხზე. რიგი პრეპარატების რეცეპტის გარეშე გაცემა უკვე სისხლის სამართველბრივ პასუხისმგებლობას ითვალისწინებს.

„ვსაუბრობთ საკანონმდებლო ცვლილებებზე, რომელიც ითვალისწინებს ცალკეულ სამკურნალო საშუალებებზე კონტროლის რეჟიმის გამკაცრებას. ჯენერიული დასახელების მქონე ფარმაცევტული პროდუქტები უკვე ექვემდებარება კონტროლს, მათ შორის, გაბაპენტინი, ბაკლოფენი, დექსტრომეტორფანის შემცველი პროდუქტები, ტროპიკამიდი, ზოპიკლონი.

პარლამენტში მეორე მოსმენით გადის კოდეინზე, ფსევდოეფედრინზე და ეფედრინის შემცველ ფარმაცევტულ პროდუქტზე გამკაცრების რეჟიმი. აღნიშნული ნივთიერებების რეცეპტის გარეშე გაცემის შემთხვევა დაექვემდებარება სისხლის სამართლებრივ პასუხისმგებლობას“, - აღნიშნა ნანა შაშიაშვილმა.

როგორც ფარმაცევტული კომპანია შპს „ირინა შანიძის“ დამფუძნებელი ირინა შანიძე აცხადებს, რეცეპტის გაცემა აუცილებელია, თუმცა მომხმარებელს ჯენერიული პრეპარატის არჩევის საშუალება უნდა ჰქონდეს.

„რეცეპტით გაცემას მივესალმები, ეს აუცილებლობას წარმოადგენს, მაგრამ თუ ხალხზე ვზრუნავთ, პაციენტს უნდა ჰქონდეს არჩევანის საშუალება. წამლები არის დაბალფასიანი, საშუალოფასიანი და მაღალფასიანი. „ჯენერიკით“ უნდა დაიწეროს რეცეპტი და ფარმაცევტს საშუალება უნდა ჰქონდეს, მომხამარებელს შეთავაზოს პრეპარატი მისი ღირებულებიდან გამომდინარე“, - აღნიშნა ირინა შანიძემ.