აშშ-ის პრეზიდენტის და გერმანიის კანცლერის განხილვის თემა უკრაინის დახმარების საკითხია. ასევე, თეთრ სახლში ჯო ბაიდენის და ოლაფ შოლცის განხილვის თემა გახდა ჩინეთის მიერ რუსეთისთვის ლეტალური დახმარების შესაძლო გაწევა. გერმანიის კანცლერი პეკინს მოუწოდებს, რუსეთს უკრაინის ომში დახმარების გაწევის მიზნით იარაღი არ გაუგზავნოს და ამის ნაცვლად ზეწოლა მოახდინოს მოსკოვზე, რომ უკრაინის ტერიტორიიდან საკუთარი ძალები გაიყვანოს.

ამასთან ოლაფ შოლცი აცხადებს, რომ გერმანია და მისი დასავლელი მოკავშირეები უსაფრთხოების სამომავლო გარანტიების შესახებ უკრაინასთან მოლაპარაკებებს აწარმოებენ. უსაფრთხოების ასეთი გარანტიები გამომდინარეობს იმ ვარაუდიდან, რომ უკრაინა წარმატებით დაიცავს თავს ამ ომში. აქვე შოლცი ადასტურებს, რომ გერმანია გააგრძელებს კიევის მხარდაჭერას იარაღის მიწოდებით. გერმანიის კანცლერის თქმით, ვლადიმირ პუტინი ამჟამად არ არის ღია მოლაპარაკებებისთვის უკრაინაში ომის დასასრულებლად.

შეგახსენებთ აშშ-ის ხელისუფლებაში აცხადებენ, რომ ჩინეთი რუსეთისთვის, უკრაინის ომში გამოსაყენებლად, იარაღისა და საბრძოლო მასალის მიწოდებას განიხილავს. აშშ-ის სახელმწიფო მდივნის, ენტონი ბლინკენის მტკიცებით, ჩინური კომპანიები რუსეთს უკვე უწევენ არალეტალურ მხარდაჭერას და არსებული ინფორმაციით, პეკინმა მოსკოვს, შესაძლოა, ლეტალური მხარდაჭერაც აღმოუჩინოს.

მიუხედავად მოწოდებებისა ჩინეთის ლიდერი, სი ძინპინი აცხადებს, რომ ჩინეთის პოზიცია უკრაინაში კრიზისთან დაკავშირებით თანმიმდევრული და მკაფიოა, ეს არის მშვიდობისა და მოლაპარაკებების ხელშეწყობა.

„ჩვენ უნდა მივყვეთ პოლიტიკური მოგვარების მიმართულებას, დავივიწყოთ ცივი ომის მენტალიტეტი, პატივი ვცეთ უსაფრთხოების სფეროში ყველა ქვეყნის ლეგიტიმურ შეშფოთებას და ავაშენოთ ევროპული უსაფრთხოების დაბალანსებული, ეფექტური და მდგრადი არქიტექტურა“, - აღნიშნა ჩინეთის ლიდერმა, რომელსაც უახლოეს მომავალში მოსკოვში ელოდებიან.

სი ძინპინის მოსკოვში ვიზიტამდე ცნობილი ხდება, რომ აშშ უკრაინას 400 მილიონი დოლარის სამხედრო დახმარების ახალ პაკეტს გამოუყოფს. სამხედრო დახმარების ახალი პაკეტი მოიცავს საბრძოლო მასალას HIMARS-ის სარაკეტო სისტემისა და სხვადასხვა საარტილერიო სისტემისთვის. იგი ასევე მოიცავს ჯავშანტექნიკისთვის გასაშვებ ხიდებს, პირველ სისტემას, რომელიც გამოიყენება თხრილებისა და ვიწრო წყლის დაბრკოლებების გადაკვეთისთვის. შეგახსენებთ, რამდენიმე დღის წინ, ჯო ბაიდენის ადმინისტრაციამ უკრაინისთვის დახმარების კიდევ ერთი, 2-მილიარდი დოლარის ღირებულების პაკეტი გამოაცხადა.

პარალელურად, უკრაინამ კუპიანსკიდან და ჩრდილო-აღმოსავლეთით მიმდებარე ტერიტორიიდან ოჯახებისა და მოქალაქეების სავალდებულო ევაკუაციის განკარგულება გასცა. უკრაინის ხელისუფლებამ ეს გადაწყვეტილება რუსული ძალების მიერ ქალაქის ხელახლა აღების საფრთხის ფონზე მიიღო. შეგახსენებთ, უკრაინამ კუპიანსკი ოკუპაციიდან გასული წლის სექტემბერში გაათავისუფლა.

რუსული აგრესიის შესაჩერებლად უკრაინის პრეზიდენტი არტილერიას და დიდი რაოდენობით ჭურვებს ითხოვს. ვოლოდიმირ ზელენსკის განცხადებით, საჭიროა როგორც სისტემები, ამუნიცია და დიდი რაოდენობით საბრძოლო მასალა, რათა რუსეთი გააჩერონ.

„მათ ტერიტორიას კი არ ვესროლოთ, არამედ ჩვენიდან გავაგდოთ. უკრაინის შეიარაღებული ძალებისთვის იარაღის გადაცემის დასაჩქარებლად საჭიროა საჯაროდ საუბარი იმაზე, რა არ გვყოფნის. სახელმწიფოებს, რომლებიც უკრაინას ეხმარებიან, შეუძლიათ სრულიად საჯაროდ მხარი დაუჭირონ ამა თუ იმ იარაღის გადაცემას.

გვჭირდება ასევე თვითმფრინავები, თვითმფრინავების დეფიციტია. ამაზე ვისაუბრეთ და თანხმობა გვაქვს დიდი ბრიტანეთის, პოლონეთის მხრიდან. დღეს ვესაუბრეთ ჩვენს პარტნიორებს ლატვიიდან, ლიეტუვიდან და ესტონეთიდან სად შეუძლიათ მოსამზადებელ მისიებში დაგვეხმარონ. დარწმუნებული ვარ, რომ უკრაინა თავის სატანკო არმიას მალე მიიღებს“, - განაცხადა ვოლოდიმერ ზელენსკიმ.

ვითარება რთულია. უკრაინა ისევ შეიარაღებას ითხოვს, ჩინეთი კი რუსეთის მთავარი მოკავშირე აღმოჩნდა, რომელიც ოკუპანტებს ეხმარება. ანალიტიკოს სოსო მანჯავიძის განცხადებით, უკრაინასთან მიმართებაში სტრატეგიული გადაწყევილებების მიღება შეუძლია რამდენიმე ადამიანს და ეს ადამიანები არიან აშშ-ში, ინგლისში და რუსეთში. მისი თქმით, ზელენსკის და ევროპელ ლიდერებს გავლენის მოხდენა შეუძლიათ, მაგრამ სტრატეგიული თვალსაზრისით, არაფერი არ შეუძლიათ. ანალიტიკოსის განცხადებით, უფრო დიდი მნიშვნელობა აქვს იმ პოზიციას, რომელსაც იკავებს ჩინეთი.

„სი ძინპინის ვიზიტი მოსკოვში იქნება გარდამტეხი მნიშვნელობის. გარდამტეხი მნიშვნელობა ექნება სწორედ იმას, რამდენად ჩათვლის ჩინეთი რუსეთს იმის შესაძლებლობის მქონედ, რომ მან გააგრძელოს ეფექტურად დაპირისპირება დასავლეთთან. ჩინეთის ინტერესებშია დასავლეთის რაც შეიძლება დიდი რესურსის დახარჯვა აღმოსავლეთ ევროპაში.

ფაქტობრივად, თუ დასავლეთი იყენებს უკრაინას რუსეთის წინააღმდეგ, ჩინეთი ანალოგიურად და უფრო დიდ მასშტაბში შეეცდება რუსეთი მყარი გახადოს დასავლეთის წინააღმდეგ. არავისთვის დამალული არაა, რომ ანგლოსაქსების სტრატეგიაში მთავარი სამიზნე არის ჩინეთი, რომელიც 2027 წლისთვის უკვე მიაღწევს და, ფაქტობრივად, გათანაბრდება აშშ-თან სამხედრო სიძლიერის კუთხით. შესაბამისად, დასავლეთის ინტერესებშია, რომ ტაივანი არ შეუერთდეს ჩინეთს“, - აცხადებს მანჯავიძე.

ამავე დროს, მისი თქმით, ამ შემთხვევაში ტრიგერი არის ის, რომ მოსალოდნელია ტაივანში არჩევნების გზით ხელისუფლებაში მოვიდეს გომინდანი, პარტია, რომელიც მომხრეა ჩინეთთან ინტეგრაციის და გამოკითხვები აჩვენებს, რომ გაიმარჯვებს.

„შესაბამისად, აშშ-ს შეზღუდული აქვს დრო იმისათვის, რომ ეს არ დაუშვას. დრო შეზღუდული აქვს ასევე ჩინეთის ხელისუფლებას, რომელსაც არანაირად არ აწყობს ტაივანში სამხედრო ესკალაცია, ვინაიდან სამხედრო ესკალაცია შეიცავს დიდ რისკებს, რეგიონში აშშ-ის საზღვაო სამხედრო ფლოტისა და ზოგადად შეიარაღებული ძალების უპირატესობის გამო.

ანუ, იმ შემთხვევაში, თუ ჩინეთი იერიშს მიიტანს ტაივანზე, ძალიან დიდია დამარცხების რისკი, რადგან გაცილებით უფრო ძლიერია აშშ-ის საზღვაო ფლოტი და ტაივანიც მომზადებულია, იმის მიუხედავად, რომ იქ დიდია ჩინეთთან მომხრეთა ინტეგრაციის რიცხვი. ანუ, მიმდინარეობს პროცესი, რომ ჩინეთი გახადონ იძულებული შეიჭრას ტაივანში“, - აღნიშნა for.ge-სთან საუბრისას სოსო მანჯავიძემ.

პოლიტოლოგ რამაზ საყვარელიძის შეფასებით, შოლცის ამერიკაში ვიზიტი ცხადყოფს, რომ მაღალ დონეზე კონტაქტების დიდი წრე ლაგდება. მისი თქმით, სავარაუდოა, კოლექტიურ დასავლეთს ექნება ასეთი პოზიცია, რომ შემოდგომამდე მაქსიმალურად დაეხმარება უკრაინას, რომ მან დასახულ მიზნებს მიაღწიოს. მაგრამ, იმ შემთხვევაში, თუ მაინც ვერ მოახერხა ეს უკრაინამ, მერე უკვე დასავლეთი მოითხოვს მოლაპარაკების მაგიდასთან დაჯდომას და ფაქტობრივად ომის შეწყვეტას.

„ასეთი განწყობილება ჩანს ანალიზებში, რომ არ არის გამორიცხული, ამ განწყობილებების შემაჯამებელი ეტაპი იყოს ის შეხვედრები, რომელიც ამ დღეებში მიმდინარეობს. რაც შეეხება ჩინეთის პოზიციას, მას საკმაოდ რთული პოზიცია უკავია. თან ისეთ განცხადებებს აკეთებს, რომელიც რუსეთის კრიტიკას გულისხმობს და თან, ამავე დროს, რუსეთის დახმარებაზეც მიანიშნებს. ჩინეთის ეს პოზიცია, რომ არც მწვადი დაწვას და არც შამფური და თავისი ხაზი უნდა გაატაროს, რა სურათს მოგვცემს, ამჟამად რთული სათქმელია.

წესით, სამომავლოდ ჩინეთი უნდა დათანხმდეს მოლაპარაკებებს. მისი წინადადებაც ეგ იყო, რომ მშვიდობიანად უნდა გადაწყდეს ყველა კონფლიქტი, მაგრამ მოლაპარაკებებზე მსჯელობა ნაადრევია, ჯერ მთელი ნახევარი წელია წინ და ამ ნახევარწლიან პერიოდში რა პოზიციას დაიკავებს ჩინეთი, ძნელი სათქმელია. ანუ, გაუწევს თუ არა ამერიკულ მუქარას ანგარიშს“, - აცხადებს for.ge-სთან საუბრისას რამაზ საყვარელიძე.