მას შემდეგ, რაც ევროკავშირის ელჩმა საქართველოში პაველ ჰერჩინსკიმ ევროკავშირის 27 წევრი სახელმწიფოს სახელით სააკაშვილის ჯანმრთელობის მდგომარეობის გამო იუსტიციის მინისტრს დემარში გადასცა, გაჩნდა კითხვა, რაღაცით ხომ არ ემსგავსება პაველ ჰერჩინსკი თავის წინამორბედ ელჩს, კარლ ჰარცელს, რომელიც მიხეილ სააკაშვილის ქომაგად იყო ქცეული და მის ფიზიკურ თუ ფსიქიკურ მდგომარეობაზე პასუხისმგებლობას სახელმწიფოს აკისრებდა?!

მართალია, დემარშის გადაცემაში მონაწილე შვედეთის ელჩმა მოგვიანებით განმარტა, რომ ასეთი პოლიტიკური პოზიცია მხოლოდ იმის გამო გამოხატეს, რომ დაეყრდნენ ცნობებს ექსპრეზიდენტის ჯანმრთელობის მდგომარეობის შესახებ, მაგრამ ანალიტიკოსებს ეჭვი უჩნდებათ, რომ, ამ შემთხვევაში, სააკაშვილის ლობისტებმა კარგად „იმუშავეს“.

ანალიტიკოს რამაზ საყვარელიძეს უჭირს ევროკავშირის ძველი და ახალი ელჩების ერთმანეთთან გაიგივება, რადგან ჯერ არ არის დასრულებული პროცესები. მისი აზრით, გარკვეული დროის გასვლის შემდეგ მოხერხდა კარლ ჰარცელის პოლიტიკური ორიენტაციის დანახვა. ასევე მოხდება პაველ ჰერჩინსკისთან მიმართებითაც, გარკვეული დროის შემდეგ უფრო ნათლად დავინახავთ ჰერჩინსკის პოზიციას.

„პაველ ჰერჩინსკიმ დემარში გადასცა იუსტიციის მინისტრს, ოღონდ ეს მისი ინიციატივა არ ყოფილა, მას დაავალა ევროკავშირმა და მანაც გადასცა, აქ მთავარია, რომ სააკაშვილის ლობისტებმა იმუშავეს, მაგრამ ლობისტებმა იმუშავეს არა ელჩ პაველ ჰერჩინსკისთან, არამედ ევროკავშირთან, რადგან ფაქტია, ლობისტების გამოჩენის შემდეგ დაიწყო სააკაშვილის მიმართ მხარდაჭერა. ლობისტების ანკესზე ძალიან ადვილად ეგება ევროპული პოლიტიკა, ევროპაში ყოველ მეორე დღეს ვიღაცას აპატიმრებენ ქრთამის აღების ბრალდებით, ლობიზმი კი ქრთამის მიცემის ერთ-ერთი ოფიციალური ფორმაა“, - აღნიშნა რამაზ საყვარელიძემ for.ge-სთან საუბრისას.

ანალიტიკოსი ვახტანგ მაისაია მიიჩნევს, რომ კარლ ჰარცელიც და პაველ ჰერჩინსკიც გამოცდილი დიპლომატები და სწორი პოლიტიკური აზროვნების პიროვნებები არიან, მაისაია ორივე მათგანს იცნობს, პატივს სცემს და ევროპული დემოკრატიის სიმბოლოებად მიაჩნია.

„ევროკავშირის ახლანდელი და ყოფილი ელჩები განათლებული და ევროპული გაგების ადამიანები არიან, მე კარგად მესმის მათი პოზიცია თუნდაც იმიტომ, რომ ევროპაში სხვა დამოკიდებულება აქვთ პატიმრობაში მყოფ ყოფილ ხელისუფალთა მიმართ. მაგალითად, პინოჩეტს, რომელიც ყველაზე დიდი ჯალათი იყო და 3 ათასი ესპანელი მოქალაქე ცოცხლად დაწვა, უფლება მისცეს, სამკურნალოდ წასულიყო. ევროპაში სხვა მიდგომა, სხვა კანონები აქვთ, ჩვენ ევროპას ცოტა აცდენილნი ვართ და ჯერჯერობით გამოსულნი არ ვართ პოსტსაბჭოთა სინდრომიდან, ჩვენ მოვლენებს ვუყურებთ მხოლოდ ორ ფერში - შავად და თეთრად, ევროპა სხვანაირად უყურებს ამას. კი, სააკაშვილი იყო ავტოკრატი, საშინელი პოლიტიკური ურჩხული, მაგრამ თუ მისი უფლებები ირღვევა და ავად არის, მაშინ ევროპელები აბსოლუტურად სხვანაირად აღიქვამენ ამას“, - აღნიშნა ვახტანგ მაისაიამ for.ge-სთან საუბრისას.

მანვე გაიხსენა, რომ თავის დროზე ერიკ ჰონეკერიც დაიჭირეს, გაასამართლეს, ასევე, პოლონეთის კომუნისტური პარტიის ლიდერი, გენერალი იარუზელსკიც, მაგრამ მოგვიანებით მიუტევეს და გაუშვეს. ცხადია, ჰონეკერი, იარუზელსკი და სააკაშვილი ერთ დონეზე არ დგანან ხისტი პოლიტიკით, ავტოკრატიული მმართველობის სტილით. უბრალოდ, ევროპელებს სხვანაირი გაგება აქვთ, ჩვენ სხვანაირი გაგება. ამის მაგალითია ბრეივიკიც, მან 80 კაცი დახოცა, მაგრამ როგორი პირობები აქვს შექმნილი ციხეში, სააკაშვილი კი ციხეშიც არ არის, ის კლინიკაში მკურნალობს.

ანალიტიკოსი იგორ კვესელავა მიიჩნევს, რომ პაველ ჰერჩინსკი აგრძელებს იმ სცენარს, რაც მისი წინამორბედის - კარლ ჰარცელის დროს იყო. კერძოდ, სააკაშვილთან დაკავშირებით აშკარაა ამერიკის, ევროპის პოზიცია, ამიტომაც 27 ქვეყანა დემარშს გამოხატავს სააკაშვილთან დაკავშირებით. ეს ნიშნავს, რომ მიშა სააკაშვილი თავის ტკივილი გახდა ჩვენი ხელისუფლებისთვის, ამ თავის ტკივილს ვეღარ იშორებენ, რადგან მისი მოშორება ქართული საზოგადოების ერთ ნაწილში დაბადებს განცდას, რომ ხელისუფლება სუსტია და სააკაშვილს ვერ მოერია, რაც „ქართულ ოცნებას“ არ აწყობს, რათა არჩევნებზე ქულები არ დააკლდეს.

„წლების განმავლობაში ჩვენ ვხედავთ დაპირისპირებებს ხელისუფლებებს შორის. სააკაშვილის შემთხვევაში, მართალია, პიროვნებამ დააშავა, მაგრამ საქმე ეხება ყოფილ პრეზიდენტს. ამდენად, ზოგჯერ ხელისუფლება იძულებულია, სხვანაირად მოიქცეს. ე.წ. ლევი ფული ყველა ხელისუფალს აქვს, ხელისუფლებაში რომ ხარ, ვერ დათვლი, საჩუქარს რომ მიართმევ სხვა ქვეყნის წარმომადგენელს, რამდენი დაიხარჯა. სხვა საკითხია გირგვლიანის და სხვა ადამიანების ტრაგედიები, მაგრამ ამას დამტკიცება სჭირდება, ამის დამამტკიცებელი პირდაპირი საბუთები, სამართლებრივი დოკუმენტები არ არის. შევარდნაძის დროს ციხეებში საშინელება ხდებოდა, გავიხსენოთ, ცირეკიძის დროს რა ხდებოდა. პოლიტიკაში არსებობს დათმობა. ახლა კი გამოდის, რომ ამერიკას და ევროპას, რომელმაც ფეხზე წამოგვაყენა და ფინანსურად დაგვეხმარა, უარს ვეუბნებით სააკაშვილთან დაკავშირებით. აქ სახელმწიფოებრივ აზროვნებაზეა საუბარი, მაგრამ საქართველოში სახელმწიფოებრივი კი არა, პოლიტიკური აზროვნებაა“, - აცხადებს იგორ კვესელავა ჩვენთან საუბრისას.