„ქვეყნის საშინაო საქმეში ჩარევა“, „სუვერენული სახელმწიფოს უპატივცემულობა“ და „ქართველი ხალხის ნების საწინააღმდეგო მოთხოვნა“ - ასე ეხმაურება უკვე მეორე დღეა სტრასბურგში დამტკიცებულ რეზოლუციას თბილისში პოლიტიკური და ანალიტიკური სპექტრი. დოკუმენტი, რომელიც საქართველოს მთავრობას მიხეილ სააკაშვილის საზღვარგარეთ გადაყვანისა და ადეკვატური მკურნალობისკენ მოუწოდებს, ხელისუფლებისთვის მიუღებელია და ის საბჭოთა კავშირის უმაღლესი საბჭოს გადაწყვეტილებას შეადარეს.

საპარლამენტო უმრავლესობისთვის მიუღებელია როგორც რეზოლუციის შინაარსი, ასევე ტოლობის ნიშანი ევროინტეგრაციის პროცესსა და მიხეილ სააკაშვილის საკითხს შორის. პარლამენტის წევრები ამბობენ, რომ დოკუმენტში კვლავ ბიძინა ივანიშვილის სანქცირებაზე საუბარი და მისი დაკავშირება ყოფილი პრეზიდენტის საქმესთან არასერიოზულია.

„ქართული ოცნების“ თავმჯდომარემ ირაკლი კობახიძემ განაცხადა, რომ რეზოლუციის შინაარსი რეალურ ფაქტებს აცდენილია და ის მხოლოდ ქვეყნის ეროვნულ ინტერესებს აზიანებს. კობახიძე იმასაც ამბობს, რომ ამ ფორმით ევროპარლამენტარები საქართველოს თავს ესხმიან.

დამტკიცებულ რეზოლუციას საქართველოსთვის საფრთხედ აღიქვამს ოპოზიცია. ხელისუფლების ოპონენტები ამბობენ, რომ მსგავსი დოკუმენტები ევროინტეგრაციის გზაზე შემაფერხებელია, თუმცა, იმასაც აკონკრეტებენ, რომ რეზოლუციის გარკვეულ პუნქტებს არ ეთანხმებიან.

ევროპარლამენტმა მიხეილ სააკაშვილის ჯანმრთელობის მდგომარეობასთან დაკავშირებულ რეზოლუციას კენჭი 16 თებერვალს უყარა - ჯერ კონსოლიდირებულ ვარიანტს, რომელიც 9 პუნქტისგან შედგება და მთავრობას ყოფილი პრეზიდენტის გათავისუფლებასა და მკურნალობისკენ მოუწოდებს. ამ ვერსიაში საუბარი არ არის ბიძინა ივანიშვილზე. თუმცა, ევროპარლამენტმა „ნაციონალური მოძრაობის“ პარტნიორი „ევროპის სახალხო პარტიის“ მიერ ინიცირებულ შესწორებასაც დაუჭირა მხარი, სადაც საქართველოს ყოფილი პრემიერ-მინისტრის სახელი და გვარი გაჟღერდა.

ანალიტიკოსი გია აბაშიძე for.ge-სთან ამბობს, რომ როგორც მოსალოდნელი იყო, ევროკავშირის მიერ რეკომენდირებულ 12 პუნქტს მე-13 პუნქტი დაემატა, რომელიც სააკაშვილის ციხიდან გათავისუფლებას გულისხმობს. აბაშიძე ფიქრობს, რომ ამით ევროპარლამენტმა გვაჩვენა, რომ მას არ აინტერესებს სტრასბურგის სასამართლოს რამდენიმე ვერდიქტი მასთან დაკავშირებით და კიდევ რამდენიმე სასამართლო გადაწყვეტილებაა ნაცრეჟიმის ცალკეული ჩინოვნიკების წინააღმდეგ.

„ის რომ ევროპარლამენტი კანონის უზენაისობას ფეხქვეშ თელავს და საქართველოს სუვერენული სახელმწიფოს შიდა საქმეებში უხეშად ერევა, ამ მესამე რეზოლუციით კიდევ უფრო მკაფიოდ გამოჩნდა. არ არის ევროპული ფასეულობები ასეთი და ქართველ ხალხს მსგავს ტონალობაში საუბარი ევროპიდან არც კი წარმოუდგენია. ჩვენი ქვეყნის ძალიან დიდ ნაწილს მიხეილ სააკაშვილი დამნაშავედ მიაჩნია და სულაც არ ფიქრობენ, რომ მისი გათავისუფლება უნდა მოხდეს.

ევროპარლამენტარები მიხეილ სააკაშვილის დაკავებას ბიძინა ივანიშვილის შურისძიებას უკავშირებენ, როცა ქვეყნის ყოფილი პრეზიდენტი ქვეყანაში სამარცხვინოდ ტრაილერით შემოიპარა და თავად ადებს ხელს საკუთარ გარემოცვას, რომ მათ გაწირეს, აქ ივანიშვილი რა შუაშია? დასავლეთში გარკვეულ პოლიტიკურ წრეებს სურთ, რომ „ნაცმოძრაობის“ კრიმინალურ ქმედებებზე თვალი დახუჭონ, ხოლო ეს ყველაფერი უნდათ, რომ ივანიშვილის ვენდეტას დაუკავშირონ“, - ამბობს აბაშიძე.

მისივე თქმით, ამ რეზოლუციებით ევროპარლამენტი რუსულ დესტრუქციულ პროპაგანდას ჩაენაცვლა, რაც ყველაზე მეტად დამაზიანებელია ევროპისთვის. თუმცა ევროკავშირში არიან სხვა ინსტიტუტები, რომლებიც საქართველოს წინსვლას ობიექტურად აფასებენ. ამის ნათელი მაგალითი ევროკომისიის მიერ გამოქვეყნებული შეფასებითი ანაგრიშია.

„ევროკავშირის წევრი ქვეყნების ლიდერთა ძალიან პოზიტიური განცხადებები იმაზე მეტყველებს, რომ საქართველოს მიერ დასახული გზა სწორია და ევროკავშირის სტატუსის მინიჭებისთვის ხელისუფლება ყველაფერს აკეთებს. ირაკლი კობახიძემ ევროპარლამენტის ამ გადაწყვეტილებას ძალიან სწორი შეფასება მისცა, როცა ეს რეზოლუცია საბჭოთა კავშირის უმაღლეს საბჭოს შეადარა. ეს იყო ფარისველური და ტყუილით გაჯერებული განცხადებები. ევროპარლამენტარების ბრალდებები ფაქტებით არ იყო გაჯერებული. აქ მხოლოდ აღქმებით საუბრობდნენ. ევროპარლამენტართა ძალიან დიდი ნაწილი არ არის გარკვეული და გათვიცნობიერებული საქართველოს საქმეებში, რაც მეტყველებს იმაზე, რომ თავად აქვთ პრობლემები პოლიტიკურ საქმიანობაში. ეს არ არის გასაკვირი, რადგან ევროპარლამენტში უპრეცედენტო სკანდალური საქმე კიდევ უფრო ღვივდება. კატარის უკანონო ლობირების გამო კორუფციაში არა ერთი ევროპარლამენტარი ამხილეს. ეს არის უდიდესი სირცხვილი და ამას არა ქართველი ჟურნალისტები და ანალიტიკოსები, არამედ ევროპის წამყვანი მედია საშუალებები ლაპარაკობენ. ასეთი სირცხვილი ევროპარლამენტში ჯერ არ მომხდარა. აქედან გამომდინარე, როდესაც ევროპარლამენტში ლობისტური საქმიანობა გამჭვირვალე არ არის, ამაში სააკაშვილის ოჯახს დიდძალი ფული ექნება გადახდილი, როგორც ამერიკაში ლობისტური კომპანიის დაქირავებისას გადაიხადეს. პოსტსაბჭოთა ქვეყნებმა და მათ შორის საქართველომ უკვე გამოიარეს ის პერიოდი, როცა მოსკოვიდან თითს უქნევდნენ და წერილებს უგზავნიდნენ. ამიტომ ბრიუსელიდან უსამართლო და უსაფუძვლო ინსტრუქციებს არც ერთი ქვეყანა მხედველობაში არ მიიღებს“, - ამბობს აბაშიძე.

მისივე თქმით, ფაქტია, რომ გლობალური ომის პარტია ბიძინა ივანიშვილს აშანტაჟებს და ამის ერთ-ერთი მაგალითი ევროპარლამენტარების უზნეო რეზოლუციაა, ასევე შვეიცარიული ბანკის მიერ ჩადენილი უკანონობა. აბაშიძე ამბობს, რომ საქართველოს საზოგადოება უკვე ერთ მუშტად არის შეკრული და ყველა კარგად მიხვდა, ვის რა ინტერესი აქვს და რა უნდათ ჩვენი ხელისუფლებისგან.

ანალიტიკოსი თამარ კიკნაძე მიიჩნევს, რომ საქართველოში ბიძინა ივანიშვილი მორალური ავტორიტეტით სარგებლობს, რადგან ქვეყნისთვის ბევრი გაუკეთებია. ამიტომ კიკნაძე for.ge-სთან ფიქრობს, რომ სიტყვა „ოლიგარქი“, რომელიც ამ რეზოლუციაშია, აბსურდია, რადგან ივანიშვილი პოლიტიკისგან სრულიად გამიჯნულია და ის სახელმწიფოს მართვაში არ ერევა. ამიტომ ასე უაპელაციოდ, ფაქტების გარეშე მისი დადანაშაულება უკვე დიდი აბსურდია.

„ბიძინა ივანიშვილს პოლიტიკოსებთან კერძო შეხვედრებიც კი არ აქვს. ადამიანი პოლიტიკურ ცხოვრებაში საერთოდ არ ერევა და რაზე დაყრდნობით ამტკიცებენ ეს ევროპარლამენტარები, რომ ის ოლიგარქია და ქვეყანას მართავს, ამის დამამტკიცებელი რაღაცა ხომ უნდა ჰქონდეთ?! მეორე მხრივ, ეს რეზოლუცია იმიტომ არის მიუღებელი, რომ რეალურად ქვეყანაში მოსახლეობას ჰკითხეს კლავენ თუ არა სააკაშვილს ციხეში? ვინმე ასე ფიქრობს და ამას იჯერებს? ამ რეზოლუციაში მოცემული რეკომენდაციები თუ მოთხოვნები ჩვენი მოსახლეობის სურვილთან ხომ თანხვედრაში არ არის. 9 წლის განმავლობაში სააკაშვილმა და მისმა გარემოცვამ არაერთი დანაშაული ჩაიდინა. ქართველი ხალხი პირიქით, ფიქრობს, რომ მას ამისთვის ადეკვატური სასჯელიც არ აქვს მისჯილი, არათუ მისი გათავისუფლება მოხდეს. ეს სასამართლოზე ზეწოლაა, როცა ჩვენ ევროპისკენ სწრაფვა იმისთვის გვჭირდება, რომ სამართლებრივ სახელმწიფო გვსურს. თუ ქვეყნის შიდა საქმეებში ასე ერევიან და სამართლებრივი პროცედურების დაცვის გარეშე სააკაშვილის გაშვებას გვთხოვენ, მაშინ ჩვენ რას გვპირდებიან? ჯერ ერთი, ამ კაცს სხვა საქმეებზე მისჯილიც კი არა აქვს. ანუ იურდიულად მისი გათავისუფლება როგორ შეიძლება გაფორმდეს, არც ამით ინტერესდებიან. გარდა ამისა, მისი გამოშვება ქვვეყანაში ძალიან დიდ უკმაყოფილებას გამოიწვევს. რეზოლუციაში საუბარი იმაზე, რომ ამით ქვეყანაში პოლარიზაცია დასრულდება, აბსურდია. მათ ქართველი ხალხის განწყობაზე სააკაშვილის და მისი ხელისუფლების მიმართ წარმოდგენაც არ აქვთ. დემოკრატიაზე თუ გველაპარაკებიან, ეს ხალხის ნების აღსრულებაა. მოსახლეობის დიდი ნაწილი კი სააკაშვილის შესაბამის დასჯას მოითხოვს“, - ამბობს კიკნაძე.

მისივე თქმით, მიხეილ სააკაშვილი პოლიტიკური ავანტურისტია, რომელიც საერთაშორისო მასშტაბებზე არის გასული და ფიქრობს, რომ ის დიდი ინფორმაციის მატარებელია. კიკნაძე მიიჩნევს, რომ დემენციის მოგონებაც შემთხვევითი არ არის. ახლა მისთვის ყველაზე უსაფრთხო გარემო საქართველოს ციხეა. ხელისუფლება მას სამაგალითოდ უფრთხილდება. წანააღმდეგ შემთხვევაში ანალიტიკოსი არ გამორიცხავს, რომ გარკვეული პოლიტიკური წრეები მისი ლიკვიდაციითაც კი იყვნენ დაინტერესებულები.