ევროკავშირის კანდიდატი ქვეყნის სტატუსი ყოფილი პრეზიდენტის გათავისუფლების სანაცვლოდ? - რა წერია ევროპარლამენტის მიერ მიღებულ რეზოლუციაში, რომელსაც 577-მა ევროპარლამენტარმა მხარი დაუჭირა.

მიხეილ სააკაშვილი ევროპარლამენტისთვის საქართველოს ლაკმუსის ტესტი გახდა. სტრასბურგი საკითხს ფაქტობრივად ასე აყენებს - ევროკავშირის კანდიდატი ქვეყნის სტატუსი ყოფილი პრეზიდენტის გათავისუფლების სანაცვლოდ.

ევროპარლამენტმა 15 თებერვალს 9-პუნქტიანი რეზოლუცია მიიღო, რომელსაც თავდაპირველად კომპრომისული ვარიანტი ერქვა, თუმცა „იპიპის“ ანუ „ევროპის სახალხო პარტიის“ ჩასწორების შემდეგ, ის კომპრომისული ვეღარ იქნება.

ბოლო ორ თვეში უკვე მეორედ ევროპის პარლამენტი ბიძინა ივანიშვილს „ოლიგარქს“ უწოდებს და მის სანქციერებას ითხოვს.

მე-8 პუნქტის შესწორებაში, რომელსაც 362 მომხრე და 121 მოწინააღმდეგე გამოუჩნდა, სააკაშვილის დაკავება შეფასებულია როგორც ბიძინა ივანიშვილის პირადი ვენდეტა.

საბოლოოდ ევროპარლამენტის რეზოლუციაში რამდენიმე მოწოდებაა. მათ შორის ქართული „ოცნების“ დამფუძნებლის პირადი სანქცირება და მოწოდება საქართველოს პრეზიდენტს, გამოიყენოს შეწყალების უფლება.

თუმცა, სააკაშვილის მომხრეებისთვის ცუდი ამბავი ისაა, რომ ევროპარლამენტის რეზოლუციებს არ გააჩნიათ იურიდიული ძალა და ისინი ატარებს სარეკომენდაციო ხასიათს.

პოლიტიკურ გადაწყვეტილებებს, მათ შორის სანქციების დაწესების თაობაზე, იღებს ევროკავშირის აღმასრულებელი ორგანო, ევროპის საბჭო. იგი ევროკავშირის წევრი ქვეყნების ლიდერების, ევროპის საბჭოს პრეზიდენტისა და ევროკომისიის პრეზიდენტისგან შედგება. სწორედ ისინი წყვეტენ, გაითვალისწინებენ თუ არა ევროპარლამენტის რეზოლუციებს.

ხელისუფლება მიღებულ რეზოლუციას ეხმაურება: „ეს არის სისტემური პრობლემა, რომელიც აქვს ამ ინსტიტუტს, რასაც ჰქვია ევროპარლამენტი“, - განაცხადა „ქართული ოცნების“ თავმჯდომარემ, ირაკლი კობახიძემ და დასძინა, რომ ევროპარლამენტის მსგავსი რეზოლუციები აბსურდულია და იგივენაირად, როგორც წინა შემთხვევებში, ევროსაბჭო და ევროკომისია მას არც ამჯერად გაიზიარებს.

„ეს არის ძალიან სერიოზული პრობლემა, ასეთი გადაწყვეტილება შეშურდებოდა საბჭოთა კავშირის უმაღლეს საბჭოსაც. მე კარგად მახსოვს 80-იანი წლების ბოლო, მაშინ რაც ხდებოდა, გადაიცემოდა ხოლმე მაშინ საბჭოთა კავშირის უზენაესი საბჭოს სხდომები. იქ რაც ხდებოდა, იგივე მოხდა დღეს და იგივე ხდებოდა წინა ორი რეზოლუციის შემთხვევაში ევროპარლამენტში. ეს არის პირდაპირ კატასტროფა“, - განაცხადა კობახიძემ.

თავმჯდომარის განცხადებითვე, ბიძინა ივანიშვილის მიმართ დაწესებული სანქციების მიზანი არის მისი დაშანტაჟება, რათა ბიძინა ივანიშვილი მისი ნების წინააღმდეგ შემოაბრუნონ პოლიტიკაში იმისათვის, რომ მან გავლენა იქონიოს ხელისუფლების გადაწყვეტილებებზე.

როგორც კობახიძე განმარტავს, ევროპარლამენტარებმა იციან, რომ ივანიშვილს აქვს სერიოზული პერსონალური ავტორიტეტი და უნდათ, რომ მისი ეს ავტორიტეტი მისი ნების წინააღმდეგ გამოიყენონ, მეორე ფრონტის მიზნებისათვის.

ანალიტიკოსი ზაალ ანჯაფარიძე for.ge-სთან აცხადებეს, რომ ძალიან რთულია წინასწარ იმაზე საუბარი, გაითვალისწინებს თუ არა ევროპარლამენტარების სარეკომენდაციო რეზოლუციას ევროკავშირის აღამსრულებელი ორგანო და უნდა ველოდოთ თუ არა, რომ სააკაშვილის გათავისუფლების საკითხი ევროკავშირის კანდიდატი ქვეყნის სტატუსზე იქნება მიბმული. თუმცა გარკვეულ გავლენას რომ მოახდენს, ანჯაფარიძე ამაში დარწმუნებულია.

„მმართველი გუნდიც და პრეზიდენტიც, შესაძლოა, ამ რეზოლუციის მიღების შემდეგ ორცეცხლშუა აღმოჩდნენ. შესაძლოა, ამ რეზოლუციას სტატუსის მინიჭებაზე გადამწყვეტი გავლენა არ ჰქონდეს, მაგრამ რაღაცა დოზით გავლენას მაინც რომ მოახდენს, ფაქტია. გადაწყვეტილების მიღებაზე გავლენა ექნება, რადგან ევროკავშირის რამდენიმე ქვეყანა, მათ შორის ბალტიისპირეთის ქვეყნები, „ოცნების“ ხელისუფლების პირობებში საქართველოსთვის სტატუსის მინიჭებას ეწინააღმდეგებიან. ამიტომაც ამ ეტაპზე რთულია კონკრეტულად ვისაუბროთ იმაზე, რა იქნება ხელისუფლების პასუხი. შესაძლოა, ხელისუფლებამ თქვას, რომ კი ბატონო, გავიგეთ თქვენი პოზიცია, მაგრამ ჩვენი პოზიცია გვაქვს ამ საკითხთან დაკავშირებით.

რადგან სტატუსის მიღება შესაძლოა სასწორის მეორე მხარეს დადგეს, ხელისუფლებამ რეზოლუციის პათოსი გაითვალისწინოს და სააკაშვილის ქვეყნიდან სამკურნალოდ გაყვანის მოთხოვნა დააკმაყოფილოს. თუმცა აქ პრობლემა ხელისუფლებას საკუთარ ამომრჩეველთან გაუჩნდება. „ოცნების“ მხარდამჭერები ამით იმედგაცრუებული და განაწყენებული დარჩებიან. ხელისუფლება რეალურად მართალია და იმის დამტკიცებას, რომ სააკაშვილი თვითდაზიანებას ეწევა, ქვეყნის შიგნით ახერხებს. დამტკიცებულია ისიც, რომ მისი წაქცევის სცენები და ცუდად გახდომის კადრები, რომლებიც მედიაში გაავრცელეს, აშკარად ინსცენირებულია. ამიტომ ჩვენს ქვეყანაში არავის სჯერა, რომ სააკაშვილს ხელისუფლება აწამებს, შესაბამისად თუ მას გაუშვებენ, ეს მმართველი გუნდის სისუსტედ ჩაითვლება“,-ამბობს ანჯაფარიძე.

მისივე თქმით, „ნაციონალური მოძრაობა“ ამას საკუთარ გამარჯებად გაასაღებს. ამის შემდეგ კი არაა გამორიცხული, მათ საპროტესო აქციებზე იმაზე მეტი ხალხი მივიდეს, ვიდრე ახლა მიდის. ანჯაფარიძე ფიქრობს, რომ თუ ენმ-ის მომხრეებმა, სააკაშვილი სამშვიდობოს დაიგულეს, ვიღაცებს იმედი გაუჩნდება, რომ ის გამოჯანრთელდება, ფორმაში ჩადგება და საპროტესტო მოძრაობას სათავეში ჩაუდგება.

„ხელისუფლებას, როგორც ვთქვი, ქვეყნის შიგნით სააკაშვილის ციხეში ყოფნასთან და მის ჯამრთელობასთან დაკავშირებით პორბლემა არ აქვს. მისი ამ საკითხთან დაკავშირებით მოსახლეობის დიდ ნაწილს სჯერა. თუმცა რატომ ვერ ახერხებს ის ქვეყნის გარეთ ამ სიმართლის დამტკიცებას, ამის გარკვევა მეც მინდა. გამოდიან და მათი განცხადებები მხოლოდ ვიშვიშს არ სცდება. ამბობენ, რომ ცალკეული ევროპარლამენტარები და ჩინოვნიკები ცუდად იქცევიან. ანუ პრობლემას აღწერენ, მაგრამ საზოგადოებას არ აჩვენებენ იმას, ამ პრობლემას თავად როგორ უმკლავდებიან. მე ვერ ვიპოვე პასუხი იმაზე, რატომ ვერ ახერხებს ხელისუფლება თავის სიმართლის ევროპარლამენტში გატანას“,-ამბობს ანჯაფარიძე.

რაც შეეხება ჩანაწერის იმ ნაწილს, სადაც ივანიშვილი ოლიგარქად არის მოხსენიებული და მის დასანქცირებას ითხოვენ, ანჯაფარიძე ამბობს, რომ ეს არის „ნაციონალების“ მუშაობის შედეგი, რომლებიც ამ მიმართულებით თავს არ ზოგავენ. ევროპარლამენტში არის 10-მდე ევროპარლამენტარი, რომლებიც შემდეგ სხვა დეპუტატებს არწმუნებენ იმაში, რომ საქართველოში ყველა პორბლემის სათავე ივანიშვილია. ამიტომ მისი დასანქცირებით ეს პრობლემები მოიხსნება. ანჯაფარიძე ამბობს, რომ ძალაუნებურად, ივანიშვილის ირგვლივ განვითარებული მოვლენები იძლევა იმის ფიქრის საშუალებას, რომ მისგან რაღაცა უნდათ, რის გაკეთებაზეც ის უარს ამბობს.

ხოლო როდის შეიძლება გავიგოთ იზიარებს თუ არა ამ რეზოლუციის პათოსს ევროკავშირის აღმასრულებელი ორგანო, ანჯაფარიძე ამბობს, რომ ამას გაზაფხულზე გავიგებთ.

„ამ რეზოლუციის შედეგები გამოჩნდება მაშინ, როდესაც ევროკავშირის მიერ გაზაფხულის ბოლოს საქართველოსთან დაკავშირებით პირველი ანგარიში დაიწერება. ასევე გამოჩნდება ოქტომბერში, როცა, ფაქტობრივად, უკვე დაიდება დასკვნა საქართველოს ეძლევა თუ არა კანდიდატის სტატუსი. ერთი მხრივ, ეს გამოჩნდება ბიძინა ივანიშვილის და „კრედიტ სუიტსის“ ურთიერთობები როგორ განვითარდება და მეორე მხრივ, საქართველოს პოლიტიკა უკრაინის ომთან დაკავშირებით როგორი იქნება. ამ ყველაფრის შემდეგ შეგვიძლია ვიმსჯელოთ, ეს რეზოლუციები საქართველოსთვის კანდიდატის სტატუსის მინიჭებაზე მოახდენს თუ არა გავლენას.

„ხალხის ძალის“ წევრი დავით ქართველიშვილი for.ge-სთან მიიჩნევს, რომ ეს არის კიდევ ერთი სამარცხვინო რეზოლუცია, მსგავსად მისი წინამორბედისა, რომელსაც იურიდიული ძალის მინიჭება არ ეღირსა და მხოლოდ რეკომენდაციად დარჩა. ხელისუფლებას ევროკავშირმა უკვე მიუთითა 12 რეკომენდაცია, რომელიც სტატუსის მინიჭების სანაცვლოდ უნდა შესრულოს. ამიტომ ქართველიშვილი იმედოვნებს, რომ სააკაშვილის გათავისუფლება და სტატუსის მინიჭება ერთ სასწორზე არ დაიდება.

„იმედი მაქვს, ამ რეზოლუციას იგივე ბედი ეწევა, რაც მის წინამორბედებს. მინდა, პირადად ჩემი, როგორც „ხალხის ძალის“ პოზიცია დავაფიქსირო და ვთქვა, რომ იმის მიუხედავად, რა შედეგითაც არ უნდა დასრულდეს უკრაინა-რუსეთის ომი და ევროკავშირის საბოლოო გადაწყვეტილება როგორიც არ უდა იყოს, ქვეყანამ თავისი სამშვიდობო პოლიტიკა უნდა გააგრძელოს და ქვეყნის განვითარებას თუ წინსვლას ხელი არაფერმა არ უნდა შეუშალოს. საქართველოს ხელისუფლებამ ის პოლიტიკა უნდა გააგრძელოს, რომელსაც უკვე ერთი წელია საკუთარი ხალხის ინტერესებიდან გამომდინარე ახორციელებს და თანაც წარმატებით. ყველაფერი, რაც ევროპის კარზე განვითარდება, ეს მათი გადაწყეტილება იქნება. გამოჩნდება საქართველოსთან დაკავშირებით რა პოზიციას დაიკავებს - აპირებს ჩვენს მეგობრად დარჩეს, თუ ჩვენი სახელმწიფოებრიობის მოწინააღმდეგეთა ბანაკში გადასვლას აპირებს - ეს უკვე მათი გადასაწყვეტია.

ყოველ შემთხვევაში, იმედი მინდა დავიტოვო, რომ ის ამ ომის პარტიას არ აყვება, ისევ ჩვენი ქვეყნის პარტნიორად დარჩება და ერთი კონკრეტული ადამიანის სიმულაციის და თაღლითობის გამო, საქართველოზე უარს არ იტყვის. წინააღმდეგ შემთხვევაში, ჩვენი ქვეყნის მოსახლეობაში, რომლის უდიდესი ნაწილი დარწმუნებულია იმაში, რომ სააკაშვილი მატყუარაა და მის გამო სტატუსს არ გვაძლევენ, ანტიდასავლური განწყობები გაძლიერდება“, - ამბობს ქართველიშვილი.