რუსეთი უკრაინის წინააღმდეგ ახალი გარდაუვალი შეტევისთვის ემზადება და დონბასში სამხედრო დაჯგუფებას აძლიერებს, რითაც რუსული ძალები, ლუგანსკის ოლქში, უახლოეს თვეებში შეტევის დასაწყებად, პირობებს ქმნიან. გარდა ამისა, კრემლი დამატებით 200 ათასი ადამიანის მობილიზებას გეგმავს, ასევე, წარმატებით განაგრძობს იარაღის შეძენას ირანიდან და ჩრდილოეთ კორეიდან. ამერიკული ანალიტიკური ცენტრის, ომის შემსწავლელი ინსტიტუტის (ISW) შეფასებით, სამშვიდობო მოლაპარაკებისთვის რუსეთის მხრიდან მზადყოფნის არანაირი ნიშნები არ არსებობს.

ვლადიმერ პუტინი, რომ ინარჩუნებს თავის მაქსიმალისტურ მიზნებს, ამის შესახებ საუბრობს ნატოს გენერალური მდივანი, რომლის შეფასებით, ვერავინ იტყვის, როდის დასრულდება ომი, რადგან რუსეთი უფრო მეტი ომისთვის ემზადება.

„ვერ ვხედავთ რაიმე ნიშანს, რომ პრეზიდენტი პუტინი და მოსკოვის მმართველები ემზადებიან მშვიდობისთვის. ჩვენ ვხედავთ, რომ რუსეთი უფრო მეტი ომისთვის ემზადება, რომ უფრო მეტი ჯარისკაცის მობილიზაცია ხდება. ისინი აქტიურად იძენენ ახალ იარაღს, მეტ საბრძოლო მასალას, აძლიერებენ საკუთარ წარმოებას, მაგრამ ასევე იძენენ მეტ იარაღს სხვა ავტორიტარული სახელმწიფოებისგან, როგორიცაა ირანი და ჩრდილოეთ კორეა. ასე რომ, სანამ ეს ასეა, ჩვენ უნდა მოვემზადოთ გრძელვადიანი პერსპექტივისთვის. ჩვენთვის ძალზე მნიშვნელოვანია, რომ პრეზიდენტმა პუტინმა არ მოიგოს ეს ომი. ნაწილობრივ იმიტომ, რომ ეს იქნება ტრაგედია უკრაინელებისთვის, მაგრამ ასევე საშიში იქნება ყველა ჩვენგანისთვის. ეს მსოფლიოს უფრო სახიფათოს გახდის“, - აღნიშნა იენს სტოლტენბერგმა.

იმისათვის, რომ ქვეყანამ უკეთ შეძლოს დაიცვას თავი რუსული რაკეტებისა და უპილოტო თვითმფრინავებისგან, უკრაინის ხელისუფლების წარმომადგენლები დასავლელ მოკავშირეებს მოუწოდებენ, უკრაინას უკრაინას „F-16“ თვითმფრინავები მიაწოდონ. უკრაინის პრეზიდენტი, ვოლოდიმირ ზელენსკი მოკავშირეებს მნიშვნელოვანი გადაწყვეტილებების დროულად მიღებისკენ მოუწოდებს, თუმცა აშშ-ის პრეზიდენტმა თქვა, რომ უკრაინას „F-16“ ტიპის მოიერიშე თვითმფრინავებს არ გაუგზავნის.

საფრანგეთის პრეზიდენტმა, ემანუელ მაკრონმა განაცხადა, რომ მისი ქვეყანა თვითმფრინავების უკრაინაში გაგზავნას არ გამორიცხავს, მაგრამ ამ ნაბიჯის გადადგმამდე საჭიროა გარკვეული პირობების შესრულება, მათ შორის, ესკალაციის თავიდან აცილება და გარანტია იმაზე, რომ თვითმფრინავი არ შეეხება რუსეთის მიწას.

თავის მხრივ, ხორვატიის პრეზიდენტი ზორან მილანოვიჩი ნატო-ს მოკავშირეებს უკრაინისთვის ტანკების მიწოდების გადაწყვეტილების გამო აკრიტიკებს და აცხადებს, რომ ეს ნაბიჯი ომის გახანგრძლივებას იწვევს.

„წინააღმდეგი ვარ იქ ნებისმიერი ლეტალური იარაღის გაგზავნის. ეს ახანგრძლივებს ომს. რა არის მიზანი, რუსეთის დაშლა, ხელისუფლების შეცვლა? საუბარია რუსეთის დაშლაზეც, ეს სიგიჟეა. ნათელია, რომ 2014 წელს მოსკოვის მიერ ანექსირებული ყირიმი რუსეთის შემადგენლობაში დარჩება. ყირიმი აღარასოდეს იქნება უკრაინის ნაწილი“, - აღნიშნა ზორან მილანოვიჩმა.

უკრაინისთვის იარაღის სახეობის მიწოდება და დრო თითოეულ შემთხვევაში განსხვავებულია, როგორი იქნება „F-16“-ის შემთხვევაში უცნობია. შეიარაღებული ძალების გენერალური შტაბის ყოფილი უფროსი, ანალიტიკურ ცენტრ „ჯეოქეისის“ მრჩეველი, ვახტანგ კაპანაძე ამბობს, რომ ავიაგამანადგურებელი „F-16“ უკრაინის საჰაერო თავდაცვას გააძლიერებს და ამავე დროს ბრძოლის ველზე ჰაერიდან იმ მძიმე ტექნიკასაც დაიცავს, რაც უკრაინას დასავლთისგან გადაეცემა.

თუმცა, კითხვაზე რატომ იკავებს თავს დასავლეთი, რაც ამ შემთხვევაში რუსეთს აძლევს შესაძლებლობას კიდევ უფრო მეტად შეძლოს რესურსების მობილიზაცია, ვახტანგ კაპანაძე ვარაუდობს, რომ დასავლეთში ჯერ კიდევ არ არიან ჩამოყალიბებული, როგორ და რითი უნდა დასრულდეს ეს ომი, რა უნდა იყოს რუსეთის დამარცხება და რა უნდა იყოს უკრაინის გამარჯვება.

„რაც შეეხება მოიერიშე თვითმფრინავების არგადაცემას, მასე არც ტანკებს აძლევდნენ თავიდან და არც „პეტრიოტებს“, მაგრამ გამოჩნდა უკრაინის ტერიტორიაზე ეს შეიარაღება. ჯერჯერობით, მიდის ლაპარაკი, გერმანიაც წინააღმდეგია თვითმფრინავების გადაცემის, ტანკებზეც წინააღმდეგი იყო, მაგრამ შეცვალა თავისი გადაწყვეტილება. ასე რომ, არ ვიცი. გადაწყვეტილი ეს ამბავი არ არის, მაგრამ ის, რომ ამ იგივე ჯავშანსატანკო დანაყოფებს ჰაერიდან დაცვა სჭირდება, ეს ფაქტია.

თვითმფირნავების გადმოცემა მარტივი საკითხი არ არის. მფრინავის მომზადებას მინიმუმ სამი თვე მაინც სჭირდება, ხოლო თვითმფრინავის ტექნიკურ მომზადებას გაცილებით მეტი დრო სჭირდება. ამას დაუმატეთ მთელი დოკუმენტების მომზადება. ერთი, რასაც ვხედავ ევროპიდან არის ის, რომ ევროპას არ უნდა დახმარების მასშტაბი გაიზარდოს და მეორე, ვერ ჩამოყალიბდნენ როგორ უნდა დამარცხდეს რუსეთი“, - აცხადებს ვახტანგ კაპანაძე.

მისი თქმით, ევროპა მისცემს თუ არა იარაღს, რუსეთს თავისი ამოცანა არ შეუსრულებია უკრაინაში, რომელიც შეიარაღებული ძალების გაზრდას იწყებს.

„არავითარი მიზეზი არ მაქვს შევცვალო პოზიცია. პირიქით, უფრო და უფრო ვრწმუნდები, რომ ეს იქნება ხანგრძლივი ომი. ფაქტია, რომ ეს ომი იღებს გაჭიანურებულ ხასიათს. რაც უფრო გვიან მისცემენ უკრაინას იარაღს, მით უფრო გაჭიანურდება და ეს გაჭიანურებული ომი აწყობს რუსეთს. სამწუხაროდ, ვერავითარ წინაპირობას ვერ ვხედავ, რომ ეს ომი მალე დასრულდება“, - აღნიშნა for.ge-სთან საუბრისას ვახტანგ კაპანაძემ.

ექსპერტი უსაფრთხოების საკითხებში დავით კუხალაშვილი ამბობს, რომ რუსეთის ფედერაციას ომის დაწყებამდეც და ახლაც, მუდმივად ექნება უპირატესობა იქიდან გამომდინარე, რომ ის არის სახელმწიფო, რომელსაც ძალიან მაღალ დონეზე აქვს განვითარებული კოსმოსური დაზვერვა. რაც შეეხება „F-16“-ის გადაცემაზე უარს, კუხალაშვილი ამბობს, რომ ყველა ქვეყანა ნებისმიერი სახის გადაწყვეტილებას - ეს იქნება იარაღის მიწოდება, პოლიტიკური, თუ ფინანსური მხარდაჭერა - ახორციელებს მას შემდეგ, როდესაც მას ხელთ აქვს სადაზვერვო სამსახურების მიერ მოპოვებული ანალიტიკური ინფორმაციები გამყარებული სამეცნიერო დასკვნებით, სადაც მითითებულია, რომ კონკრეტული სახის დახმარება არის მიზანშეწონილი ქვეყნის ეროვნული უსაფრთხოებისათვის.

„ასე რომ, არც ერთი ქვეყანა არ იმოქმედებს მხოლოდ იმისათვის, რომ ეს იყოს უკრაინის ინტერესებისთვის შესაბამისი. ყველა ის თავშეკავება, რომელსაც ჩვენ ვხედავთ საომარი მოქმედებების დაწყვებიდან დღემდე, ვფიქრობ, რომ ამ სისტემაზე სახელმწიფოთა დაყრდნობას ემსახურება. ნაკლებად სავარაუდოდ მიმაჩნია და გამოვრიცხავ იმას, რომ რომელიმე სახელმწიფო მოქმედებდეს უკრაინის, ან რუსეთის ინტერესების სასარგებლოდ.

უფრო ვფიქრობ, რომ ყველა სახელმწიფო მოქმედებს საკუთარი ეროვნული ინტერესების შესაბამისად და ყველაფერი გადართულია სარგებლის მიღებაზე. არ უნდა გამოვრიცხოთ, რომ არსებობს სახელმწიფოთა ერთობა, რომლებიც გარკვეულ მოლაპარაკებათა რაუნდში იმყოფებიან რუსეთის ფედერაციასთან, რათა საკუთარ სახელმწიფოს მოუტანონ მნიშვნელოვანი სარგებელი“, - აცხადებს კუხალაშვილი.

როგორც დავით კუხალაშვილი ამბობს, ეს არის ძირითადი წინაპირობა იმისა, რომ არ ხდება სათანადო დონით იმ შეიარაღების და ტექნიკის მიწოდება უკრაინისათვის, რომელიც საჭიროა მისი თავდაცვისუნარიანობისათვის.

„მაღალი დონის კრიზისის შემთხვევაში არ უნდა გამოვრიცხოთ ის ფაქტი, რომ უკრაინამ მიიღოს გადაწყვეტილება, განახორციელოს შეტევითი ოპერაცია რუსეთთან მიმართებაში. შესაძლებელია, ეს ამ წუთში ნაკლებად სავარაუდოდ ჩანდეს, მაგრამ ამ მიმართულების გამორიცხვა არ შეიძლება“, - განაცხადა for.ge-სთან საუბრისას დავით კუხალაშვილმა.