საქართველოში უკრაინის საქმეთა დროებითი რწმუნებული, ანდრეი კასიანოვი ამბობს, რომ შეიძლება საქართველოდან უკრაინისთვის იარაღის და სამხედრო ტექნიკის გადაცემა ან შესყიდვა მოხდეს - უკრაინამ საქართველოს თავდაცვის სამინისტროს მისამართზე უკვე 30 ოფიციალური მოთხოვნა გაგზავნა. კასიანოვისთვის გაუგებარია, რატომ არის შეუძლებელი საქართველომ უკრაინას გადასცეს ინდივიდუალური თავდაცვის საშუალებები, საველე ჰოსპიტლები და მათ შორის „დიდგორი“, რომელიც უკრაინას დაეხმარებოდა.

„მე მეკითხებოდნენ ქართველი კორესპონდენტები: ბატონო ანდრეი, იქნებოდა სასარგებლო „დიდგორი“?“, რა თქმა უნდა, ჰუმანიტარული მიზნით რომ გამოიყენებოდეს ჩვენი დაჭრილების გადასარჩენად, რა თქმა უნდა, დაგვეხმარებოდა. ჩვენთვის გაუგებარია ქართველი პოლიტიკოსების განცხადებები, კერძოდ, პარლამენტის ვიცე სპიკერის, ასევე საქართველოს თავდაცვის სამინისტროს ბოლო განცხადებები, რომ უკრაინამ ითხოვა „ბუკის“ საჰაერო თავდაცვის სისტემების უფასოდ გადაცემა.

უკრაინამ გაგზავნა საქართველოში თავდაცვის სამინისტროს მისამართზე უკვე 30 ოფიციალური მოთხოვნა. უკრაინის საელჩოს მიერ ბოლო იყო გაგზავნილი 12 იანვარს და მოთხოვნები უპასუხოდ დარჩა. ჩვენ აღვნიშნეთ, რომ შეიძლება მოხდეს იარაღის და სამხედრო ტექნიკის გადაცემა ან შესყიდვა. უკრაინა ადასტურებს მზადყოფნას, შეისყიდოს ისინი საქართველოსგან ურთიერთსასარგებლო პირობებით“, - განაცხადა ანდრეი კასიანოვმა.

„ქართული ოცნების“ წევრი გია ვოლსკი ამბობს, რომ „ბუკების“ მიწოდების საკითხით დაწყებული, საველე ჰოსპიტლის თემით დასრულებული, ამაზე ღიად ლაპარაკი პროვოკაციული ქმედებაა. როგორც უმრავლესობის წევრი აცხადებს, არ შეიძლება საქართველო შეიარაღებას ან სამხედრო დანიშნულების საქონელს, პროდუქციას აწვდიდეს უკრაინას, ვინაიდან ეს ომში ჩართვის ტოლფასი გადაწყვეტილება იქნება.

„კასიანოვი თავად არის რაღაც არაადეკვატური განცხადებების მოყვარული ადამიანი - არაადეკვატურია მისი ქცევა და განცხადებები, ეს კასიანოვის განცხადება არ არის. ეს არის ადამიანთა ჯგუფის განცხადება, მათი პოზიციის გახმოვანება, რომ თურმე საქართველოს თავდაცვითი შეიარაღება არ სჭირდება. საქართველოს ტერიტორიების ნაწილი არის ოკუპირებული და ოკუპანტი ქვეყნის მხრიდან საშიშროება არსებობს. არ შეიძლება საქართველოსგან მისი ისედაც მწირი რესურსების მიწოდებას ითხოვდნენ იქნება ეს კასიანოვი, დანილოვი თუ უკრაინის ხელისუფლების სხვა წარმომადგენელი.

რატომ ჩათვალა კასიანოვმა, რომ დასავლეთის - მოკავშირე ქვეყნების რესურსი, უკრაინას სამხედრო ჰოსპიტალი მიაწოდოს უფრო ნაკლებია, ვიდრე საქართველოსი?! რა იცი, საქართველოს ხვალ რა დასჭირდება?! როგორ შეიძლება გარკვეულ მატერიალურ რესურს საქართველოსგან ითხოვდე, როდესაც იცი, რომ შენთან ერთად ჰააგის ტრიბუნალში უჩივლა რუსეთს იმის გამო, რასაც უკრაინაში სჩადის, როდესაც იცი, რომ შენთან ერთად მთელი რიგი საერთაშორისო ორგანიზაციებიდან რუსეთის გარიცხვას მოაწერა ხელი, შეუერთდა არაერთ რეზოლუციას და განცხადებას.

ეს არათუ პარტნიორული საქციელია, ეს არის მტრული დამოკიდებულება საქართველოს როგორც ქვეყნის და როგორც შენი პოტენციური პარტნიორის და თანამშრომლის მიმართ, ეს არის მტრული დამოკიდებულება მისი ხალხის მიმართ - ის რაც კასიანოვმა განაცხადა“, - განაცხადა ჟურნალისტებთან საუბრისას გია ვოლსკიმ.

საქართველოში უკრაინის საქმეთა დროებით რწმუნებულს კითხვით მიმართავს პარლამენტის წევრი გურამ მაჭარაშვილი თუ რატომ ხდება საქართველოზე ასეთი ზეწოლა. მისი თქმით, არც ერთი სხვა ქვეყნის მიმართ ასეთი ზეწოლა არ გააჩნიათ, როგორც ეს საქართველოსთან მიმართებაში ხდება.

„ჰუმანიტარულ ნაწილში, საქართველოსთან პრეტენზია ვერავის ვერ ექნება. ვერც ბატონი კასიანოვი ამბობს ამაზე მტკიცებით ფორმაში ვერაფერს. უბრალოდ, მათ უნდათ როგორმე შეფარვით მოახდინონ, რომ რაღაცნაირად საქართველო მხარედ აღმოჩნდეს რუსეთ-უკრაინის ომში. არც ერთი სხვა ქვეყნის მიმართ ასეთი ზეწოლა არ გააჩნიათ. კასიანოვის აზრი მაინტერესებს, რატომ ხდება საქართველოზე ასეთი ზეწოლა?“, - აცხადებს  მოძრაობა „ხალხის ძალის“ წევრი გურამ მაჭარაშვილი.

გენერალ-მაიორი, შეიარაღებული ძალების გენერალური შტაბის ყოფილი უფროსი, ვახტანგ კაპანაძე ამბობს, რომ კასიანოვის განცხადებაში რამდენიმე უზუსტობას ჰქონდა ადგილი, „ბუკები“ საქართველომ იყიდა. მისი თქმით, 2006 წელს იარაღის შეძენა დაიწყო და 2007 წელს დასრულდა. რაც შეეხება საქართველოს ხელისუფლების გადაწყვეტილებას და უშუალოდ „ბუკების“ არგადაცემას, კაპანაძე ამბობს, რომ საქართველოს თავდაცვისუნარიანობა არ უნდა დაუქვეითდეს, რაც ისედაც დაბალ ნიშნულზეა.

„ყველა ქვეყანას აქვს იარაღის ქონის დასაშვები დონე, რომლის დაბლა იარაღს არ უნდა აძლევდეს, რადგან ქვეყანას არაფერი რჩება. ნატო-ს წევრ ქვეყნებსაც აქვთ მსგავსი ნორმატივები. „ბუკების“ ის რაოდენობა, რაც ჩვენ გაგვაჩნია, ერთი დივიზიონის ზომის დანაყოფია. რუსებმა 2008 წელს სენაკიდან ერთი გამშვები წაიღეს. 4 ასეთი დივიზიონი აქვს აზერბაიჯანს. აზერბაიჯანს რატომ არ სთხოვენ?

ყველა ქვეყანას აქვს თავისი თავდაცვის მინიმალური აუცილებელი დონე, ეს იქნება დიდი ბრიტანეთი, ამერიკა, სინგაპური თუ საქართველო. ამ დონის ქვევით არ შეიძლება არც შეიარაღებული ძალების შემცირება ისე, რომ არ მოხდეს თავდაცვისუნარიანობის დონის დაქვეითება და არც შეიარაღების შემცირება. ჩვენ ვიმყოფებით ამ დონეზე. ამის ქვევით, რაც გვყავს შეიარაღებული ძალები თავისი აღჭურვილობით, ესეც არაა საკმარისი  ეფექტიანად დაცვის კუთხით, ამის შემცირება კიდევ უფრო დაასუსტებს თავდაცვითუნარიანობას“, - აცხადებს კაპანაძე.

მისი თქმით, ჩვენ არ ვართ ამ მოლაპარაკებების და შემოთავაზებების მოწმე. შესაბამისად, არ ვიცით რამდენ ხანში მოხდებოდა და რითი მოხდება ჩანაცვლება. ასევე, სანაცვლოდ რა შეთავაზება მიიღო ქვეყანამ.

„კი, რა თქმა უნდა „ბუკი“ არის მოძველებული ტექნიკა, თუმცა ეფექტიანი. მისი რაკეტების შეძენა და მისი ექსპლუატაცია უფრო და უფრო გართულდება იმიტომ, რომ მისი მწარმოებელი ქვეყანა ბელარუსი, რუსეთი და უკრაინა იყო, რა თქმა უნდა, ვერ ვიშოვით მის სათათარიგო ნაწილს. ის, რომ დღეს ამაზე კარგი საზენიტო საშუალება საქართველოს არ გააჩნია, ეს ფაქტია

და არც ის რაოდენობა არ არის, რომელიც უკრაინას გადაუწყვიტავდა ომის ბედს, მაგრამ საქართველოს შეიძლება გადაუწყვიტოს თავისი თავდაცვითიუნარიანობის ბედი. უამრავი კითხვა არის ამის უკან და პასუხის გაცემა ძალიან რთულია. ტექნიკური თვალსაზრისით რომ შევხედოთ ამ საკითხს, თუ ამის სანაცვლოდ არ მივიღებდით არაფერს, ან მივიღებდით გვიან, მაშინ, რა თქმა უნდა, მისი გაცემა არ შეიძლებოდა“, - აღნიშნა for.ge-სთან საუბრისას ვახტანგ კაპანაძემ.

ექსპერტი, უსაფრთხოების საკითხებში დავით კუხალეიშვილი ამბობს, რომ ყველა ქმედება ჰუმანიტარულის გარდა, რომლიც უკავშირდება სამხედრო დახმარების გადაცემას, ეს არის პირდაპირ საომარ მოქმედებებში მონაწილეობა. რაც შეეხება კასიანოვი განცხადებას, მისი თქმით, კასიანოვი არის უკრაინის სადაზვერვო სამსახურის ინტერესების გამჟღერებელი პირი, რაც იმას ნიშნავს, რომ უკრაინა სტრატეგიული პარტნიორული ჩარჩოებიდან გადავიდა სხვა მიმართულებაზე და მისი ძირითადი აქცენტი გაკეთებულია საქართველოს ხელისუფლების კომპრომეტაციისათვის. აქედან გამომდინარე, კუხალეიშვილი ფიქრობს, რომ არ იქნება ცუდი, თუ კასიანოვს, როგორც საქართველოში უკრაინის საქმეთა დროებითი რწმუნებულს შეუწყდეს უფლებამოსილება საქართველოში.

„თანამედროვე ეტაპზე დაინტერესებული სახელმწიფოები ჩვენ თითქსოდა ახალ ფორმატს გვთავაზობენ და გვიხსნიან, რომ თუ ჩვენ რაღაცა შეიარაღებას მივაწოდებთ უკარაინას, ეს არანაირად არ ნიშნავს საომარ მოქმედებებში ჩართვას. მე ვფიქრობ, რომ ეს არის თავსმოხვეული და არასწორი მიდგომა. თუ ჩვენ ამ შეიარაღებას გადავცემდით უკრაინას, რეალურად ეს იმას ნიშნავდა, რომ ჩვენ უკვე ჩართული ვიყავით პირდაპირ ამ საომარ მოქმედებებში.

მეორე და მნიშვნელოვანი, ეს შეიარაღება წარმოდგენს საქართველოს საკუთრებას. მხოლოდ სახელმწიფო სტრუქტურებს გააჩნიათ ინფორმაცია რამდენად მომგებიანია ამა თუ იმ იარაღის გაცემა. თუ, ამ ოპერაციის შემდეგ სახელმწიფო საფრთხის წინაშე დგება, ამ შემთხვევაში სახელმწიფო იღებს გადაწყვეტილებას, რომ ეს იარაღი არ მისცეს და ეს არ შეიძლება გახდეს პოლიტიკური ვაჭრობის და სპეკულაციის თემა. ხელისუფლება ვალდებულია, რომ საკუთარი ქვეყნის უსაფრთხოების უზრუნველსაყოფად გადადგას ყველა ნაბიჯი. შესაბამისად, ვფიქრობ, რომ ამ შემთხვევაში იარაღის გადაცემა, ეს იმას ნიშნავს, რომ საქართველო ერთვება საომარ მოქმედებებში“, - აცხადებს for.ge-სთან საუბრისას დავით კუხალეიშვილი.

ანალიტიკოსის ზაალ ანჯაფარიძის განცხადებით, კასიანოვის განცხადებაში პირდაპირ არ იკითხებოდა საქართველოს ომში ჩართვის სურვილი, მაგრამ ლოგიკურ ძაფს რომ გავყვეთ, შეიძლება მივიდეთ იმ დასკვნამდე, რომ თუ საქართველო უკრაინას იარაღს მიაწოდებს, ის გამოდის კონფლიქტში ჩართული მხარე თუნდაც ირიბად.

„ისე, როგორც არავინ არ მალავს იმას, რომ ნატოს წევრი ქვეყნები, ფაქტობრივად, ირიბად არიან ჩართული კონფლიქტში, როდესაც ინტენსიურად ამარაგებენ უკრაინელებს და არა მარტო იარაღით, ჩემს ხელთ არსებული ინფორმაციით, ნატოს სამხედრო სტრუქტურების წარმომადგენლები, მოხალისეების და ინსტრუქტორების სახით იბრძვიან როგორც კერძო პირები. უკრაინის წარმომადგენლებს რომ ჰკითხოთ და იგივე თქვა კასიანოვმა, იტყვიან: „არა ბატონო, ჩვენ არც ერთი წუთით არ გვიფიქრია საქართველოს ჩართვა უკრაინის ომში“, მაგრამ რეალურად ასე გამოდის.

მოწოდებები, რომ საქართველო უნდა იყოს უფრო აქტიური უკრაინასთან მიმართებაში, შესაძლოა, აჩენს ეჭვს ხელისუფლებაში - ხომ არ გადაიზრდება სხვა მოთხოვნებში, რომ საქართველომ გახსნას მეორე ფრონტი, რაც გამოიხატება იმაში, რომ ჯარის დახმარებით მოინდომოს აფხაზეთის და ცხინვალის რეინტეგრაცია. ამაზე მოწოდებები კეთდება როგორც მოქმედი, ისე ყოფილი პოლიტიკოსების და ე.წ. მოლაპარაკე თავების მხიდან“, - აცხადებს ანჯაფარიძე.

მისი თქმით, უკრაინის ხელისუფლების მოთხოვნა, რომ საქართველოს ხელისუფლებას გადაეცა „ბუკი“, არის აბსოლუტურად უსაფუძვლო, რადგან ამით, ფაქტობრივად, საქართველო ახდენს საკუთარი თავის განიარაღებას.

„თუ რუსეთმა მარცხი განიცადა უკრაინაში და ამ მარცხის კომპენსაცია მოინდომა პატარა გამარჯვებით საქართველოში და მოისურვოს საქართველოში რაიმე ტიპის სამხედრო აგრესიის განხორციელება, რაც სულაც არაა გამორიცხული, ასეთ შემთხვევაში რითი უნდა დაიცვას საქართველომ თავი, თუკი მას არ ექნება ჰაერსაწინააღმდეგო საშუალებები?! მე არ ვარ სამხედრო სპეციალისტი და ვერ გეტყვით „ბუკების“ გადაცემა სამხედრო პოტენციალს რამდენად დააზარალებდა, მაგრამ ელემენტარული ლოგიკით რომ მიუდგეთ, როცა შენ არ გაქვს ამ იარაღის შევსების წყარო და აძლევ სხვას, თუნდაც საფასურის ფასად, ამით ფაქტობრივად აშიშვლებ შენს სამხედრო ფლანგებს, რომლებიც არიან იქ, სადაც უნდა იყვნენ და იცავენ ჩვენს ცას“, - აღნიშნა for.ge-სთან საუბრისას ზაალ ანჯაფარიძემ.

დიპლომატი, ყოფილი საგარეო საქმეთა მინისტრი ირაკლი მენაღარიშვილი თვლის, რომ თუკი „ბუკი“ რომლის გადმოცემას ითხოვს უკრაინა, თავის დროზე საქართვლოს გადმოსცეს და თუ შემდგომ უკან დაბრუნება მოითხოვა, რაზეც საქართველოდან  უარი მიიღო, ასეთ შემთხვევაში საქართველოს გადაწყვეტილება, რა თქმა უნდა, კითხვის ნიშნებს შეიცვას.

„მაგრამ თუკი ასე არ მომხდარა და კასიანოვის მოსაზრებებზეა ლაპარკი, მაშინ მაპატიეთ, მაგრამ ეს სრულიად უსაფუძვლო და არც მთლად მორალური ქმედებაა. თუ, ეს იარაღი 2008 წლის აგვისტოს ომის დროს უკრაინამ საქართველოს გადმოსცა, შეიძლება ასე ითქვას, ნასესხებია, მაშინ უკან უნდა დააბრუნო. მაგრამ ერთი პერიოდი კასინოვი პირიქით ამბობდა, რომ ვითომ ყველაფერი გააკეთა საქართველომ და მადლიერების გრძნობას გამოხატავდა. გასაგებია, რომ თავისი ჭკუით არ ამბობს ამას, ამგვარ პოზიციას მას კარნახობენ კიევიდან, კერძოდ, საგარეო საქმეთა სამინისტროდან.

ყველაზე ნაკლებად მგონია, რომ ამ იარაღის გადაცემა ომში ჩართვის სურვილი იყოს. ნაკლებად იმიტომ, რომ ვერც კიევი იგებს ამით ვერაფერს და საერთო სიტუაციას მხოლოდ ართულებს და კარგს არაფერს მოიტანს, იმას რომ თავი დავანებოთ, საქართველოსთვის ეს სრულიად მიუღებელია. ჰუმანიტარული კუთხით, საქართველომ უამრავი რამ გააკეთა და რაც კი შეგვიძლია უნდა გავაკეთოთ“, - აცხადებს for.ge-სთან საუბრისას ირაკლი მენაღარიშვილი.