მოძრაობა „ხალხის ძალას“ შესაძლოა უახლოეს მომავალში პარლამენტის წევრები კიდევ დაემატოთ. გაზრდის მიუხედავად პოლიტიკურ პარტიად ჩამოყალიბება ამ ეტაპზე არ იგეგმება. ამის შესახებ for.ge-ს მოძრაობის წევრმა და ანალიტიკოსმა, ზურა ქადაგიძემ განუცხადა.

რა კურს აიღებს „ხალხის ძალა“, არის იმის შანსი, რომ „ქართული ოცნების“ ოპოზიციად მოგვევლინონ, ამის შესახებ დაწვრილებით ანალიტიკოსი საუბრობს.

ზურა ქადაგიძე: ადამიანებმა, რომლებმაც მოძრაობა „ხალხის ძალა“ ჩამოაყალიბეს ჩემი მეგობრები არიან, ვისთან ერთადაც არაერთ პროექტზე მიმუშავია და ვიცი მათი შეხედულებები ამა თუ იმ საკითხთან დაკავშირებით. ამ მოძრაობას უნიკალური შანსი აქვს, რომ საზოგადოებას რისკები თავიდან აარიდოს. რას ნიშნავს რისკების არიდება - დღეს უსაფრთხოების თვალსაზრისით მსოფლიოს არცერთი რეგიონი არ არის დაცული. შეიძლება ითქვას, რომ რუკაზე რეგიონი არ დარჩა, სადაც დაძაბულობა ან ცხელი წერტილი არ იყოს. საქართველო მსოფლიოში არის ერთადერთი, მშვიდობის კუნძულივით. ეს არის დიდი შრომისა და სწორი, პრაგმატული პოლიტიკის შედეგი. სამწუხაროდ, არსებობენ როგორც შიდა, ასევე გარე ძალები, რომლებიც ცდილობენ საქართველო როგორმე კონფლიქტში ჩაითრიონ. ამას ემატება ის, რომ რადიკალური ოპოზიცია თავისი მედიასაშუალებით ფეიკ ნიუსებს ავრცელებს და საზოგადოება შეცდომაში შეჰყავს. აქედან გამომდინარე, ჩვენ გვინდა საზოგადოებას როგორც შიდა, ასევე საგარეო პოლიტიკის კუთხით სწორი ინფორმაცია მივაწოდოთ. ეს არის ის იდეები, რის გარშემოც ამ ორგანიზაციის გაფართოება მოხდა.

ცნობილი ფაქტია, რომ თქვენ იზიარებდით „ქართული ოცნების“ პოლიტიკას. ახლა რაში არ ეთანხმებით მმართველ გუნდს, რის გამოც მოძრაობა „ხალხის ძალის“ წევრობა არჩიეთ?

- აქ საუბარია კონკრეტული საკითხების საზოგადოებასთან მიტანაზე. შეიძლება კონკრეტულ პოლიტიკურ ძალას ღიად საუბრის სურვილი არ ჰქონდეს. ამაზე მმართველ გუნდში განაცხადეს კიდეც, რომ მათ არ უნდათ კონკრეტული საკითხების საჯაროდ გამოტანა. ჩემთვის დიდი სხვაობა „ქართულ ოცნების“ გუნდსა და ამ 9 ადამიანს შორის არაა, უბრალოდ პოლიტიკური გაყოფა მოხდა. ადამიანებმა შექმნეს პლატფორმა, რომელსაც დიდი სიამოვნებით შევუერთდი. ახლა ეს პლატფორმა მგონია სასიცოცხლოდ მნიშვნელოვანი.

ოპოზიცია აცხადებს, რომ „ხალხის ძალა“ „ოცნების“ შვილობილი პროექტია. ამასთან, აშშ-ს ელჩმა კელი დეგნანმა განაცხადა, რომ ვაშინგტონში გაუგებრად მიაჩნიათ ასეთი ძალის შექმნა და ამასთან დაკავშირებით ვაშინგტონში კითხვები აქვთ, რომ მმართველი გუნდის იდეების გამტარებელი ძალა რატომ შეიქმნა. რა პასუხს გასცემდით ოპოზიციასაც და აშშ-ს ელჩსაც?

- საზოგადოების უმეტეს ნაწილს წარმოუდგენლად მიაჩნია აშშ-ს სახელმწიფო დეპარტამენტის მიერ გაკეთებული განცხადება, სადაც ნათქვამია, რომ 20 ივნისის ღამეს სახელმწიფო ინსტიტუტებზე შტურმი იყო. ამ დროს აშშ-ს ელჩი, ქალბატონი, კელი დეგნანი საუბრობს, რომ 20 ივნისი მხოლოდ გავრილოვის ღამე იყო. ახლა, ვაშინგტონი რაზეა შეშფოთებული, ნაკლებად მაინტერესებს. დღეს საქართველოში სასიცოცხლოდ მნიშვნელოვანია პროცესებში მოქალაქეების ჩართულობა. მათ მაქსიმალური ინფორმაცია უნდა ჰქონდეთ თუ რა ხდება კულისებში.

ექსპერტები ვარაუდობენ, რომ თქვენ გუნდს ანტიდასავლური და ნეიტრალური მქონე პირები შეუერთდებიან. მოძრაობა „ხალხის ძალა“ რა კურსით წავა?

- კონკრეტული მოძრაობა ძალის მოკრეფას იწყებს, რომელიც მალე ძალიან დიდ გაერთიანებად გადაიქცევა. ამ დროს მარგინალები ჩვენს წინააღმდეგ ყველანაირ ქმედებას მიმართავენ. რადიკალური ოპოზიცია ცდილობს, რომ რაიმე საშუალებით რუსული იარლიყი მოგვაკრან. ნებისმიერ კონტექსტში, ნებისმიერ დროს შემიძლია ავუხსნა, თუ რა არის დასავლური ღირებულებები და რა არის მათი ფსევდო დასავლური ღირებულებები. ასევე, რამდენად სისულელეა ნეიტრალიტეტზე საუბარი, რადგან საქართველოს კონსტიტუციაშია საგარეო კურსი განსაზღვრული. როგორ შეიძლება ორგანიზაციამ საგარეო კურსზე მოახდინოს გავლენა?! აქ სხვა დამოკიდებულებაზეა საუბარი - საზოგადოებას ე.წ. პოლიტიკურ გადათამაშებებზე ინფორმაცია აუცილებლად უნდა ჰქონდეს, რათა იცოდნენ რა თამაშთან გვაქვს საქმე. კიდევ ერთხელ ვიტყვი, რომ საქართველოს აუცილებლად ეკუთვნის ევროკავშირში ყოფნა. აქედან გამომდინარე, როდესაც ჩვენ კრიტიკულ კითხვებს დავსვამთ, რადიკალური ოპოზიცია მაშინვე იტყვის, რომ ჩვენ ანტიდასავლურ პოლიტიკას ვატარებთ.

შეიძლება დადგეს ის დღე, რომ „ქართული ოცნების“ ოპოზიციად გიხილოთ?

- წინასწარ საუბარი არ მიყვარს. ამ ეტაპზე „ხალხის ძალა“ არის ძალა, რომელიც ქმნის „ქართულ ოცნებასთან“ ერთდ უმრავლესობას პარლამენტში. ხვალ და ზეგ პროცესები როგორ წავა, ამას დრო გვაჩვენებს.

მოძრაობას პარტიად ჩამოყალიბებულს როდის ვიხილავთ?

- პირდაპირ გეუბებით, რომ ამაზე საუბარი არ არის. ახლა საუბარი არის იმაზე, რომ რეგიონული მასშტაბით უნდა გავიზარდოთ. რეგიონს აქვს ძალიან დიდი მნიშვნელობა, რადგან რეგიონი არის ის წყარო, რომელიც საბოლოო ჯამში ქმნის საზოგადოებას.

კიდევ რომელი ცნობილი სახეები შეიძლება ვიხილოთ თქვენს გუნდში?

- კონკრეტულ სახელებს და გვარებს ვერ გეტყვით, მაგრამ მსურველი ძალიან ბევრია. პარლამენტიდან ბევრი შემეხმიანა, ვისაც ჩვენს გუნდში ყოფნა სურს.