შეიარაღებაზე კონტროლისა და საერთაშორისო უსაფრთხოების საკითხებში აშშ-ის სახელმწიფო მდივნის მოადგილის, ბონი ჯენკინსის ორდღიანი ვიზიტი საქართველოში იწყება. ვიზიტის დროს ჯენკინსი ცენტრალურ აზიისა და კავკასიის რეგიონში ბიოუსაფრთხოების ასოციაციის კონფერენციაზე სიტყვით გამოვა და „კოვიდ-19“-თან ბრძოლაში მიღებულ გამოცდილებაზე ისაუბრებს. ამასთან, ამერიკელი მაღალჩინოსანი საქართველოში ორმხრივ შეხვედრებს გამართავს.

ბონი ჯენკინსის ვიზიტამდე ერთი დღით ადრე ხელისუფლებას ღიად დაუპირისპირდა აშშ-ის ელჩი. როგორც კელი დეგნანმა აღნიშნა, ხელისუფლებიდან დამაბნეველი გზავნილი მოდის „ხალხის ძალასთან“ კავშირის შესახებ, რომლებიც ამერიკელი დოპლომატის განცხადებით, საქართველოსა და აშშ-ს პარტნიორობას ძირს უთხრის. მისი თქმით, ბევრი დეზინფორმაცია და შეთქმულების თეორია ვრცელდება, თუმცა სიმართლე არის ის, რომ შეერთებული შტატები 30 წელია საქართველოს განვითარებაში ეხმარება.

„ყოველთვის მსურს ფაქტებით ვისაუბრო, რადგან ბევრი დეზინფორმაცია და შეთქმულების თეორია არსებობს და ფაქტი ის არის, რომ 30 წელია აშშ ერთგულია, დაეხმაროს საქართველოს უსაფრთხოების გაძლიერებაში, მისი სუვერენიტეტისა და ტერიტორიული მთლიანობის მხარდაჭერაში, აშშ ეხმარება საქართველოს ეკონომიკის განვითარებაში, სამუშაო ადგილების შექმნაში. 30 წელია აშშ ეხმარება საქართველოს დემოკრატიული ინსტიტუტების მშენებლობაში ისე, რომ ქართველ ხალხს ჰქონდეს რწმენა, რომ ეს ქვეყანა უფრო ძლიერი, ჯანსაღი დემოკრატიისკენ მიემართება“, - აღნიშნა კელი დეგნანმა.

შეიარაღებაზე კონტროლისა და საერთაშორისო უსაფრთხოების საკითხებში აშშ-ის სახელმწიფო მდივნის მოადგილის ვიზიტის შესახებ ოფიციალურ განცხადებას ხელისუფლება არ აკეთებს. დეპუტატი, „გირჩის“ ლიდერი იაგო ხვიჩია თვლის, რომ აშშ-ის სახელმწიფო მდივნის მოადგილე ჩამოდის იმის გასარკვევად, საით მიდის ჩვენი ქვეყანა, რა გვინდა და ვინ მიგვაჩნია მეგობრად.

„ვაშინგტონში მაღალი თანამდებობის პირებს რომ შეკითხვები ჰქონდეთ, ამაში მგონი, გასაკვირი არაფერია. ჩვენ 10 წელია „ქართულ ოცნებას“ ვიცნობთ და მაინც ვერაფერი გავიგეთ, რა უნდათ. ვინმეს დანახვა გასჭირვებოდა იმის, თუ საით მოძრაობს „ქართული ოცნება“, არ მგონია. ჩემი აზრით, შეხვედრა თუ პროტოკოლური და პროცედურული შინაარსის არ არის, აუცილებლად უნდა შეეხოს იმას, თუ საით მიდის ეს ქვეყანა, რა გვინდა, როგორ ვვითარდებით, და ვინ მიგვაჩნია მეგობრად.

ველოდები კი არა, თუ საქმეზე ჩამოდის, ეს არის ახლა მთავარი საქმე ამ ქვეყანაში, ამის გასარკვევად ჩამოდის ის ხალხი. ეს ვიზიტი ძალიან ბუნებრივია, განსაკუთრებით ელჩის განცხადების შემდეგ, რომ ვაშინგტონში მაღალი თანამდებობის პირებს აქვთ შეკითხვები, თუ რატომ არ ემიჯნება ხელისუფლება მკაფიოდ ანტიდასავლურ რიტორიკას“, - განაცხადა იაგო ხვიჩიამ.

„ნაციონალური მოძრაობის“ დეპუტატის რომან გოცირიძის განცხადებით, დაისმება ყველა კითხვა იმასთან დაკავშირებით, თუ სად დგას დღეს საქართველოს ხელისუფლება. მისი თქმით, ეს ოფიციალური ვიზიტია და ემსახურება სტრატეგიულად მნიშვნელოვანი ქვეყნისადმი და არა მთავრობისადმი მხარდაჭერას და ასევე ბუნებრივია, შიდაპოლიტიკური ვითარების უკეთ გაცნობას.

„ბუნებრივია, ყველა კითხვა, რაც დღეს არის, მათ შორის ის, თუ სად არის საქართველო უკრაინასთან დაკავშირებით, რატომ არ უერთდება სანქციებს, რატომ არ არსებობს ოფიციალური დოკუმენტი, რომ არ იქნება გამოყენებული საქართველო სანქციების გვერდის ავლისთვის. ყაზახეთმაც კი, რომელიც რუსეთის ეკონომიკური სივრცის ნაწილია, ოფიციალური დოკუმენტი მიიღო, ამიტომ კითხვები ყველა მიმართულებით იქნება და მთავარი კითხვა, რა თქმა უნდა, იქნება აპირებს თუ არა რეალურად საქართველო 12 რეკომენდაციის შესრულებას და სურს თუ არა დასავლეთთან ინტეგრაცია“, - განაცხადა რომან გოცირიძემ.

ოპოზიციის პოზიციას არ იზიარებს ანალიტიკოსი, ყოფილი საგარეო საქმეთა მინისტი ირაკლი მენაღარიშვილი, რომლის განცხადებით, ვერც რაიმე ცვლილების საფუძველს ვერ ხედავს და ჩვეულებრივ, ასეთი სახის ანალიზს დედაქალაქში აკეთებენ ძალიან მარტივად და სულაც არაა ამისთვის ვინმეს გამოგზავნა საჭირო.

„ოპოზიციის მიერ ეჭვის გამოთქმა, ქართული პოლიტიკური რეალობისთვის დამახასიათებელია. მოგეხსნებათ, მელას რაც ელანდებოდა ის ესიზმრებოდაო. ყველა პროცესში, დაწყებული სტუმრის ჩამოსვლიდან და დამთავრებული სხვა ვიზიტებით ყველგან იმ პოლიტიკურ დღის წესრიგს ხედავს, რომელიც მათ ინტერესშია. რა თქმა უნდა, მნიშვნელოვანია ასეთი მაღალი დონის ვიზიტები და ეს მეტყველებს იმაზე, რომ ამერიკისათვის საქართველო არის მნიშვნელოვანი ქვეყანა. ამიტომაც ხორიცელდება რეგულარული ვიზიტები მაღალი რანგის პოლიტიკური ფიგურებისა, რომ ეს ურთიერთობები ეფუძნებოდეს სწორედ ამგვარ ინფორმაციებს. აქიდან გამომდინარე, აქ გასაკვირი არაფერი არ არის. ამით დასტურდება, რომ ჩვენი სტრატეგიული პარტნიორისთვის სულ ერთი არაა საქართველო“, - აღნიშნა for.ge-სთან საუბრისას ირაკლი მენაღარიშვილმა.

ანალიტიკოს ზურაბ ბატიაშვილის განცხადებით, აშშ-ს სახელმწიფო მდივნის მოადგილის ვიზიტი მნიშვნელოვანია, რათა მეტი სიცხადე შევიტანოთ საკითხში, სად არის საქართველოს ადგილი. მისი თქმით, ეს ვიზიტი მეტად მნიშვნელოვანი იქნება შეიარაღების თვალსაზრისით, ის შეიარაღება და აღჭურვილობა, რომელიც საქართველოს გააჩნია, არის საბჭოთა, რაც რამდენიმე თვეში საერთოდ გამოუსადეგარი იქნება.

„ტყვია-წამალიც კი არ იქნება ამისთვის არსად მთელს მსოფლიოში. ამიტომ, დღეიდანვე უნდა დაიწყოს ყველა ქვეყანამ ფიქრი გადაიარაღებაზე, მათ შორის საქართველომაც. მაგრამ იმ ფონზე, როგორი ანტიდასავლური განცხადებებიც კეთდება, ეს ბუნდოვანს ხდის საქართველოს შეიარაღებული ძალების მომავალს წახალისება, გადაიარაღების თვალსაზრისით. ამ მხრივადაც მნიშვნელოვანია ეს ვიზიტი, რომ რაღაც გზა გამოიკვეთოს და დაისახოს“, - აღნიშნა ზურა ბატიაშვილმა.

პოლიტოლოგ რამაზ საყვარელიძის განცხადებით, ცოტა დამაფიქრებელი ვიზიტია და ამას დაემატა ისიც, რომ ვიზიტის ფონზე კელი დეგნანი ისევ გამოენთო და გაღიზიანებული ტონით შეაფასა ის, რომ ოთხეულს, რომელიც დეგნანთან დაპირისპირებაშია, დაემატა ხალხი და ხელისუფლებამ ამაზე არ მისცა კრიტიკული რეაქცია. მისი თქმით, დეგნანი, თითქოს შედარებით ჩაწყნარებული იყო, ზომიერი განცხადებები ჰქონდა, მაგრამ ამ ვიზიტის ფონზე შემართული და აგრესიული დეგნანი ვიხილეთ.

„ამან დამაფიქრა ცოტა. ვიზიტის იმედი ხომ არ აქვს და თავისი პოზიციების გამყარებას ხომ არ ელოდება ამ ვიზიტისგან? ჩვენს ქვეყანაში მოდის რევიზორი შეიარაღების საკითხებში. არც იმას გამოვრიცხავ, რომ წამოტივტივდეს ის თემა, რამაც გამოიწვია საელჩოსთან დაპირისპირება. კერძოდ, მეორე ფრონტის თემა. თითქოს ამის აუცილებლობა მოხსნილია, მაგრამ გაჩნდა ისეთი თემა, როგორიც არის შეიარაღების გადმოცემა საქართველოსთვის და ვხედავთ, რომ ოპოზიციური პარტიები კრიტიკულად აფასებენ, რომ საქართველომ უარი თქვა შეიარაღების მიღებაზე ე.ი. რუსეთისკენ მიდისო.

მეორე მხრივ, უკრაინის ფონზე თუ შევაფასებთ საქართველოს პოლიტიკას, ალბათ, ძირითადი ნიშანი იქნება სიფრთხილე და ხელისუფლება მაქსიმალურად ფრთხილად არის. ამ სიფრთხილიდან ჩემთვის გასაგებია ის, რომ მეორე ფრონტის გახსნა არ უნდა ხელისუფლებას და შეიარაღებაც არ უნდა, რადგან პუტინს როდის დაარტყამს ის იდეა, რომ ვინც ახლა იარაღდება ე.ი. ჩემთან ომს აპირებსო, ამან შეიძლება სამხედრო მოქმედების წინმსწრები მოქმედების სურვილი გაუჩინოს“, - აცხადებს რამაზ საყვარელიძე.

მისი თქმით, გაუგებრობის ხაზი შეიძლება ამოქმედდეს, რადგან ამერიკისთვის გაუგებარია რატომ არ უნდა საქართველოს მისგან ამჟამად იარაღის მიღება. ასევე ამოტივტივდეს ლუგარის ლაბორატორიის საკითხი.

„არ უნდა იმიტომ, რომ ეს ზრდის რუსეთის აგრესიის ზიზღს. შეიძლება რუსეთს შეიძლება ისევ გაახსენდეს ლუგარის ლაბორატორია. მოგეხსენებათ, რომ პერიოდულად, ლუგარის ლაბორატორიის თემის გამო აკრიტიკებენ საქართველოს და ამერიკას. შეიძლება ეს თემა ხელახლა გაიხსნას.

თუ მარტო რუსეთის პროპაგანდისტულ არენაზე იტრიალებს ეს თემა, მაშინ არაფერი, მაგრამ ჩვენ დაძაბულობის საფუძველი გვექნება. ისევ და ისევ, შეიძლება აღმოჩნდეს, რომ რუსეთთან დაპირისპირების თემად გადაიქცეს ლუგარის ლაბორატორია თუ ისევ საგრძობი იქნება ამერიკის ინტერესი ლუგარის ლაბორატორიის მიმართ და ეს ვიზიტი ასეთ ინტერესს თვალსაჩინოს ხდის“, - აღნიშნა for.ge-სთან საუბრისას რამაზ საყვარელიძემ.