„ნაციონალური მოძრაობის“ ცხრაწლიანი რეჟიმი „ქართულმა ოცნებამ“ 2012 წლის 1 ოქტომბერს დაასრულა. ამ ათი წლის განმავლობაში იყო ორი საპარლამენტო, თვითმმართველობისა და საპრეზიდენტო არჩევნები, სადაც „ოცნებამ“ დამაჯერებლად გაიმარჯვა.

ანალიტიკოსები თვლიან, რომ ათი წლის მანძილზე „ქართული ოცნების“ ყველაზე მნიშვნელოვანი მონაპოვარი არის ის, რომ ქვეყანაში ომი არ ყოფილა, ხოლო ხელისუფლების მინუსად ოპოზიციასთან კოაბიტაციას მიიჩნევენ.

„24 თებერვლიდან, რაც უკრაინაში ომი დაიწყო, მმართველმა გუნდმა შეძლო, რომ ქვეყანაში ომი არ დაწყებულა. ეს ხელისუფლების უმთავრესი დამსახურებაა. რაც შეეხება შეცდომებს, პოლიტიკურ შეცდომად კოაბიტაციას ვთვლი. კოაბიტაცია, რომ არ ყოფილიყო, დღეს ქართული სახელმწიფო უფრო მაღალ მწვერვალზე იქნებოდა“, - აღნიშნა for.ge-თან ანალიტიკოსმა ედიშერ გვენეტაძემ და ყურადღებას ამახვილებს ასევე „ქართულ ოცნებაში“ საკადრო პრობლემებზეც.

„ქართულ ოცნებაში“ კადრების შერჩევისას შეცდომები იყო. კადრებში შეცდომები ნაპოლეონს, იულიუს კეისარს და შემდეგ სტალინსაც კი ჰქონდა. არსებობს ასეთი გამონათქვამი - „კადრები წყვეტენ ყველაფერს“ და დღესაც აქტუალურ თემად რჩება. ამიტომ, ვინმეს კადრების შერჩევაში შეცდომა რომ არ ჰქონდეს, ეს ყოვლად გამორიცხულია, მით უმეტეს ჩვენს ქვეყანაში, რომელიც პოლიტიკური შარლატანებით არის სავსე. „ქართული ოცნების“ ხელისუფლებაში მოსვლის პირველ ხანებში, „რესპუბლიკურ პარტიას“ რამდენი მინისტრი ჰყავდა, მაგრამ ვერაფერი გააკეთეს და ახლა ბიძინა ივანიშვილს ლანძღავენ. ესენი არიან საქართველოში ჩამოყალიბებული უმადურთა კასტა“, - განაცხადა ექსპერტმა.

პოლიტოლოგი რამაზ საყვარელიძე „ქართული ოცნების“ მმართველობამდე „ნაციონალური მოძრაობის“ ხელისუფლების პერიოდს იხსენებს და ორ პოლიტიკურ ძალას შორის არსებულ სხვაობაზე საუბრობს.

„შეფასებას ცოტა შორიდან დავიწყებ - როდესაც მიხეილ სააკაშვილის მრჩევლად ვმუშაობდი, საკმაოდ კრიტიკული ვიყავი. თანამდებობის დატოვების შემდეგ, ის რაც ქვეყანაში მოხდა, ამაზე ნეიტრალური პოზიცია ვერ მექნებოდა. მიუხედავად პირადად მე სასაყვედურო არაფერი მაქვს, მაგრამ ქვეყანაში ძალადობის კლიმატი სუფევდა, ციხეები გადავსებული იყო და რა ხდებოდა ციხეებში, კი ვიცით. ამიტომ მისი მმართველობის ის პერიოდი ჩემთვის მიუღებელი იყო. ისიც უნდა ითქვას, რომ სააკაშვილის პერიოდში ბევრი რამე გაკეთდა კიდეც. ფაქტია, ენერგიულად უდგებოდა ყველაფერს. ნუ, ხშირად ეს ენერგია დეკორატიულ შენობებს ხმარდებოდა და არა რეალურს. რატომ გავიხსენე წარსული, ის რომ ძალადობა აღარ არის, აღარ არის მოსახლეობაში დათესილი შიში, ყველას რაც უნდა იმას ამბობს - ეს არის „ქართული ოცნების“ ყველაზე დიდი მიღწევა. მეორე არის ის, რომ 10 წლის განმავლობაში ომს გადავურჩით. მესამე - მიუხედავად სხვადასხვა მხრიდან ზემოქმედებისა, „ქართული ოცნება“ არ აჰყვა არც დასავლეთის და არც რუსეთის ზეწოლას. მიუხედავად იმისა, რომ ოპოზიცია ამბობს, რომ ხელისუფლება რუსეთისკენ მიდის, ეს არადამაჯერებელია, რადგან მთელი მსოფლიო რუსეთისგან მიდის და რაღა საქართველო მიდის რუსეთისკენ?! პრინციპში, საქართველომ თითქმის პირველად სცადა გაეტარებინა ყველაზე დამოუკიდებელი პოლიტიკა, რომელიც მხოლოდ ქვეყნის ინტერესებიდან გამომდინარეობდა, რათა აქ არ ომის ფრონტი არ გახსნილიყო. ამას აღვნიშნავდი ძალიან დადებითად.

რაც შეეხება უარყოფითს - „ნაციონალური მოძრაობის“ რაც იყო, „ოცნებას“ სწორედ ის აკლია. ვგულისხმობ, ენერგიულობას, რომელიც ხელისუფლებას საქმის კეთებაში უნდა დაეხმაროს. ვხედავთ, მშენებლობები როგორი ნელი ტემპით მიდის. ის, რაც მოზღვავებული ჰქონდა „ნაცმოძრაობას“ იყო პიარი, „ოცნებას“ კი ნაკლებად აქვს. არა და პოლიტიკისთვის პიარი საჭიროა. საქართველოს მოსახლეობამ არ იცის ერთი მხრივ რა ხდება ქვეყანაში, რადგან პიარის მანქანა არ მუშაობს. ასევე უცხოელებმაც არ იციან, რა პრობლების წინაშე დგას საქართველო, რა იყო ადრე და რა ხდება ახლა. უცხოელებმა ეს, რომ არ იციან, მათ მიერ გაკეთებულ შეფასებებში ჩანს. ფაქტია, „ქართულმა ოცნებამ“ ვერ შეძლო უცხოელ პარტნიორებში პოზიციის გამყარება, მაშინ, როდესაც ასეთ ამოცანას წარმატებით გაართვა თავი „ნაციონალურმა მოძრაობამ“ და ამ მონაპოვრით დღემდე სარგებლობს. დასავლეთს არ უყარს როცა არ არის ძლიერი ოპოზიცია. მას ყოველთვის უყვარს წინ წამოწეული ოპოზიცია, რათა მმართველი ძალა კონკურენციის რეჟიმში ჰყავდეს. მაგრამ, მაინც იქამდე მივდივართ, რომ დღეს ფაქტობრივად, „ქართული ოცნება“ ერთადერთი ქმედითი პოლიტიკური ძალაა, დანარჩენი ოპოზიციური პარტიები შედეგს ვერ აღწევენ“, - აღნიშნა რამაზ საყვარელიძემ.

პოლიტოლოგის თქმით მმართველი გუნდი კადრების შერჩევაში ქრონიკულად უშვებს შეცდომებს

„პრეზიდენტის არჩევის წინ, ივანიშვილი გამოვიდა და ხალხს შეჰპირდა, რომ გამოსასწორებელ საქმეებში ერთ-ერთი საკადრო პოლიტიკის ცვლილება იქნებაო. ე.ი. ივანიშვილმაც იცოდა, რომ საკადრო პოლიტიკა არ უვარგოდა. ამის მიუხედავად არაფერი შეცვლილა. საკადრო პოლიტიკა „ქართული ოცნების“ ძალიან პრობლემური ნაწილია“, - განუცხადა საყვარელიძემ for.ge-ს.