უარი საქართველოს მოსახლეობისგან პოლიტიკურ სპექტრს და პულსდაკარგული ოპოზიცია - ეროვნულ-დემოკრატიული ინსტიტუტი (NDI) საზოგადოებრივი აზრის კვლევის ახალ შედეგებს აქვეყნებს, სადაც პოლიტიკური კვლევის შედეგები იმდენად სავალალოა, რომ დღესვე რიგგარეშე არჩევნები თუ ჩატარდა, ვერც ერთი მცირე პარტია პარლამენტში ვერ მოხვდება.

ისევ ორ პარტიულ საკანონმდებლო ორგანოს მივიღებთ, ოღონდ „ნაციონალურ მოძრაობას“ იმაზე ორჯერ ნაკლები მანდატი ექნება, ვიდრე ახლა აქვს. მიუხედავად შედეგებისა, ხელისუფლება მაინც ყველაზე უკეთესად გამოიყურება და მოცემული რეიტინგის შედეგად, ის კვლავ ხელისუფლებაში დარჩება. ასევე საყურადღებოა პრემიერის და პრეზიდენტის რეიტინგები. ღარიბაშვილის საქმიანობას 28% დადებითად აფასებს, ხოლო პრეზიდენტისას - 12%. კვლევის მიხედვით სალომე ზურაბიშვილის რეიტინგი გაუარესებულია.

 როგორც ანგარიშშია ნათქვამი, კითხვაზე, როგორ შეაფასებდით არსებული მთავრობის საქმიანობას, პროცენტები ასე გადანაწილდა: კარგად - 41 %, ცუდად - 51%, არ ვიცი - 7%

ასევე, კვლევაში მონაწილეებს დაუსვეს კითხვა, ხვალ რომ საპარლამენტო არჩევნები ტარდებოდეს, მიიღებდნენ თუ არა მონაწილეობას.

კითხვაზე 66%-ის პასუხი იყო „დიახ“, 34%-ის პასუხი კი „არა“.

კვლევის თანახმად, საქართველოს პრეზიდენტის საქმიანობას 40% ცუდად აფასებს, პარლამენტისას - 41%, ხოლო საქართველოს პრემიერ-მინისტრისას - 35%.

კითხვაზე, როგორ შეაფასებდით შემდეგი ინსტიტუტების საქმიანობას, გამოკითხულთა 43% აცხადებს, რომ საქართველოს პრეზიდენტის საქმიანობას საშუალოდ აფასებს, 40% ცუდად, 12% კარგად, ხოლო კითხვაზე პასუხი არ იცის 5%-მა.

რაც შეეხება საქართველოს პრემიერ-მინისტრის საქმიანობას, გამოკითხულთა 35% ცუდად აფასებს, 33% საშუალოდ, 28% კარგად, ხოლო 4%-ს არ აქვს კითხვაზე პასუხი.

პარლამენტის საქმიანობას 45% საშუალოდ აფასებს, 41% ცუდად, 9% კარგად, ხოლო კითხვაზე პასუხი არ იცის გამოკითხულთა 4%-მა.

კვლევის თანახმად, მოქალაქეების უმეტესი ნაწილი პოლიტიკურად გადაუწყვეტელია. NDI აღნიშნავს, რომ მოქალაქეების უმეტესმა ნაწილმა არ იცის, ან არ ასახელებს იმ პარტიას, რომელიც მის შეხედულებებთან ყველაზე ახლოს დგას.

შეკითხვაზე – რომელი პარტია დგას თქვენს შეხედულებებთან ყველაზე ახლოს? - 25% „ქართულ ოცნებას“ ასახელებს, 8% „ერთიან ნაციონალურ მოძრაობას“, 13% სხვა პარტიებს, 54%-მა გასცა შემდეგი პასუხები – არც ერთი პარტია, არ ვიცი, უარი პასუხზე.

ანალიტიკოსი ვახტანგ ძაბირაძე for.ge-სთან ამბობს, რომ მოცემული კვლევა და მასში ასახული შედეგები პოლიტიკური სპექტრისთვის მოულოდნელი არ უნდა ყოფილიყო. ძაბირაძე ამბობს, რომ მთელი ამ ხნის განმავლობაში „ოცნება“ ძალაუფლების შენარჩუნებას ცდილობს, „ნაციონალური მოძრაობა“ კი მის დაბრუნებას. მოსახლეობა თავისთვის არის, პოლიტიკური პროცესი კი ცალკე მიდის.

„ის რომ ხელისუფლების მიმართ, როგორიც არ უნდა იყოს ის, საზოგადოების გაუცხოვება დროთა განმავლობაში ხდება, ბუნებრივი პროცესია ნებისმიერ ქვეყანაში. თუმცა ჩვენთან უნიკალური სიტუაციაა იმით, რომ ხალხი გაუცხოვებულია არა მხოლოდ ხელისუფლების მიმართ, არამედ მთელი პოლიტიკური სპექტრის მიმართ. ხალხს ხელისუფლების შეცვლა უნდა, მაგრამ ფიქრობენ, რომ ოპოზიცია მასზე უარესია. ამიტომაც მოსახლოება თავისი პრობლემებით ცხოვრობს, პოლიტიკოსები კი თავისი დღის წესრიგით. მათ ხალხთან ყველანაირი სახის კომუნიკაცია აქვთ დაკარგული. ამიტომ გასაგებია, რომ პოლიტიკოსების მიმართ დიდი ანტიპათია გაჩნდა. დავუშვათ, რომ ხელისუფლებას 25% აქვს, აქაც სხვა მექანიზმი მუშაობს. ნეიტრალურ მოსახლეობაში მხარდაჭერა არც „ოცნებას“ არა აქვს, მაგრამ თავისი სტაბილური ამომრჩეველი ჰყავს. ნუ ოპოზიციაზე ხომ აღარ ვსაუბრობ, რადგან ბოლო ქმედებების შედეგად ისედაც დაკარგეს რაც ჰქონდათ. საშიში ისაა, რომ ხალხში როდესაც პროტესტი იფეთქებს, არ არსებობს ძალა, რომელიც ამ პროტესტს სწორ მიმართულებას მისცემს“, - ამბობს ძაბირაძე.

რაც შეეხება „ნაციონალური მოძრაობის“ კატასტროფულ რეიტინგს, ძაბირაძე ამბობს, რომ ეს პარტიის და მისი ლიდერების მხრიდან დაშვებულმა არაერთმა შეცდომამ განაპირობა.

„2 წელია ოპოზიცია და ენმ მხოლოდ იმაზე ლაპარაკობენ, რომ რიგგარეშე არჩევნები უნდა დაინიშნოს, მაგრამ ხალხს არ ეკითხებიან ეს უნდათ? ჩვენს მოსახლეობას არ უნდა არჩევნები. მოსახლეობა ოპოზიციას არ ენდობა და ეს ვერ გაიგეს. ხალხს რომ სჯეროდეს, ოპოზიციას რიგგარეშე არჩევნები არსებული პრობლემების მოსაგვარებლად უნდა, ქუჩა ხალხით წამებში გაივსებოდა. თუმცა ხალხი ხედავს, რომ ოპოზიციას „ოცნების“ გაშვება იმიტომ უნდა, რომ ძალაუფლება ხელში თავად ჩაიგდოს. ხალხს არ ეუბნებიან, უკან რომ მოვლენ, რას აკეთებენ, ამ პრობლემებს როგორ აგვარებენ. რაც შეეხება ენმ-ის მძიმე მდგომარეობას, რა თქმა უნდა, სააკაშვილის დაბრუნებამაც განაპირობა პარტიის რეიტინგის ვარდნა. მოლოდინი სხვა იყო და რეალობა სხვა აღმოჩნდა. მათ შორის - უკრაინის ომთან უადგილო და ულოგიკო განცხადებები. ამაში ხელისუფლებამ მოუგო და კიდევ ვერ ხვდებიან, ისევ იგივეს აგრძელებენ. მოწოდებებს და განცხადებებს ისეთი ლიდერები აკეთებენ, რომლებიც ქუჩაში თავს 200 კაცსაც ვერ მოუყრიან. ვერ შეიგნეს, რომ ქართველი არ გაყვება პოლიტიკურ ლიდერს, რომელსაც არ ენდობა და ავტორიტეტი არ აქვს. ჩვენი მოსახლეობა გაიზარდა და ზუსტად იცის, ვინ რას წარმოადგენს. უკრაინაში მიმდინარე პროცესებს ჩვენი მოსახლეობა დიდი ყურადღებით უყურებს. ოპოზიციას თუ ჰგონია, რომ ვინმემ რამე არ იცის, ცდებიან. აქ პრობლემა ისიც არის, რომ პოლიტიკური სპექტრი და ოპოზიციური ამომრჩეველი იდენტური არ არის. პატარა პარტიებმა ვერ გაიგეს კიდევ, რომ „ნაციონალების“ მიმართ ხალხს აგრესია აქვს. მათ ქოლგის ქვეშ შეფარება პოლიტიკური ხარაკირია. ეს ყველაფერი კი კვლევებით კარგად გამოჩნდა“, - ამბობს ძაბირაძე.

რაც შეეხება პრემიერის რეიტინგის, რომელიც პრეზიდენტთან შედარებით უკეთესად გამოიყურება, ძაბირაძე ამბობს, რომ ეს „ოცნების“ რეიტინგიც არის და პარტიის მხარდამჭერებისთვის პრემიერის რიტორიკა, ქმედება მისაღებია. ამასთანავე უკრაინის ომის პარალელურად, ღარიბაშვილმა შეძლო საქართველოს მოსახლეობის განწყობა სწორად დაეჭირა და დამოუკიდებელი პოლიტიკური ლიდერის პოზიციიდან იმოქმედა. რაც შეეხება პრეზიდენტის დაბალ რეიტინგს, ძაბირაძე მიიჩნევს, რომ ჩვენს მოსახლეობას პრეზიდენტის ინსტიტუტი ისევ ძველი სახით წარმოუდგენია. ბევრს ჰგონია, რომ ზურაბიშვილს ისევ ის მოვალეობები აკისრია, რაც ადრე. ასევე ის ხელისუფლებიდანაც და ოპოზიციიდანაც ორ ცეცხლშუა აღმოჩნდა და ორივეს ელექტორატი პრეზიდენტის მიმართ ანტიპათიით განეწყო.

ანალიტიკოსი რამაზ საყვარელიძეც for.ge-სთან მიიჩნევს, რომ ოპოზიციამ ბოლო 2 წლის განმავლობაში იმდენი შეცდომა დაუშვა, ყველა ელექტორალური რესურსი გაფლანგა. ამას კი უკრაინის ომიც დაემატა, რომლის დროსაც ოპოზიციამ არაადეკვატური განცხადებები გააკეთა. მისი თქმით, ახლა ჩვენს საზოგადოებაში მშვიდობის მოთხოვნაა, რასაც ხელისუფლება ახერხებს და თავს კარგად ართმევს. ამიტომაც აქვს ირაკლი ღარიბაშვილს 28%-იანი დადებითი შეფასება.

„რაც შეეხება ენმ-ის დაბალ რეიტინგს, ეს მოსალოდნელი იყო, რადგანაც ეს პარტია ძირითადად სააკაშვილზე იყო დამოკიდებული. მისი პოლიტიკური გაბანკროტების შემდეგ, რომელმაც საკუთარი ამომრჩევლიდანაც კი მხარდაჭერა ვერ მიიღო, ოპოზიციურად განწყობილი ამომრჩეველი დაკარგა. ახლა რა რეიტინგიც აქვთ, ესეც ისევ სააკაშვილის მეშვეობით აქვთ. მათ მხოლოდ რადიკალური ამომრჩეველი დარჩათ, რომელზედაც ვხედავთ, რომ მელია მუშაობს. გამოვიდა და იძახის უწყვეტი აქციები იქნება, ქუჩაში ხალხი გამოვა და ა.შ. კი ბატონო, ის რაღაცა მცირედი ელექტორატი რადიკალური ნაწილი გამოყვება, მაგრამ ოპოზიციურად განწყობილი, მაგრამ რაციონალურად მოაზროვნე ამომრჩეველი არ გამოვა. პირიქით, ომის შიშით და ქვეყანაში დესტაბილიზაციის საფხრთის გამო, ენმ უკვე მისსავე ელექტორატში გამაღიზიანებელიც კი გახდა. რაც შეეხება პრემიერის რეიტინგს, აქ ძალიან საინტერესო რამ ხდება. იმის მაგივრად, რომ ის მოსახლეობაში ანტიგმირი იყოს, რადგან ოპოზიცია მუდმივად იმას ცდილობს, რომ პრემიერს დაარტყას - ამბობენ, რომ ქვეყანამ კურსს გადაუხვია და ღარიბაშვილი პუტინის პოლიტიკას ატარებს - ვხედავთ, რომ ხალხი ამას არ იჯერებს. ამის მიზეზი კი მისი ქმედებებია.

მან კარგად დაინახა, რომ ხალხს მშვიდობა უნდა, ის ეუბნება, რომ ამის გარანტორი ეს ხელისუფლება და თავად არის. ის ისტერიკა, რაც ოპოზიციაშია უკრაინის ომთან დაკავშირებით, პრემიერი არ ყვება. ასევე ამერიკის მიმართ კრიტიკა და თამამი განცხადებები - ამ 4 კაცის გამოყოფა და ასე ტაქტიკურად იმაზე საუბარი, რაც ჩვენს ხელისუფლების თავს ხდებოდა. ამიტომ საზოგადოების ნაწილში პრემიერი დამოუკიდებელ ფიგურად ჩნდება, რომელიც ატარებს ქვეყნის ინტერესებს და არა თუნდაც პარტნიორების მხრიდან წამოსულ დაკვეთებს, რომელიც ქვეყანას გადაჩეხავს“,-ამბობს საყვარელიძე.

რაც შეეხება პრეზიდენტის რეიტინგს, საყვარელიძე ამასაც ომს და მის გარშემო ზურაბიშვილის განცხადებებს თუ ქცევას უკავშირებს. მისი თქმით, ზურაბიშვილის მხარდამჭერები „ოცნების“ ამომრჩევლები იყვნენ. მას ოპოზიციურ ელექტორატში მოხრეები არ ჰყავს. ხელისუფლების წინააღმდეგ გაკეთებული განცხადებების ფონზე კი მან ეს მხარდაჭერა დაკარგა. მისი გაუგებარი თამაში, ხან ვეტოს დადება და ხანაც ხელისუფლებას  რომ რაღაცებში ეთანხმება, საზოგადოება დაღალა. ამიტომაც მისი პოლიტიკური სვლები მოსახლეობისთვის გაუგებარი და მიუღებელია.