„სამი მიმართულება გამოიყო, რომელიც სერიოზულ პრობლემას ქმნის საქართველოსთვის, უშუალოდ ამ სტატუსის მიღების კუთხით. იმედია, რომ იქნება სერიოზული მსჯელობა და ეს საკითხები მოგვარდეს დეკემბრამდე“, - ასე გამოეხმაურა სამხედრო ექსპერტი, ვახტანგ მაისაია For.ge-სთან ინტერვიუში, ევროკომისიის ყოველწლიურ ანგარიშს. 

ევროკავშირი-საქართველოს ასოცირების საბჭოს მორიგ სხდომამდე, რომელიც 2022 წლის 6 სექტემბერს გაიმართება, ევროკავშირმა ასოცირების შესახებ შეთანხმების განხორციელების შესახებ ყოველწლიური ანგარიში გამოაქვეყნა. ანგარიშში მიმოხილულია საქართველოს მიერ გასული წლის განმავლობაში ევროკავშირი-საქართველოს ასოცირების შესახებ შეთანხმების ფარგლებში განხორციელებული რეფორმები. ანგარიშის თანახმად, გასული წლის განმავლობაში სასამართლო სისტემის რეფორმა შეფერხდა და ძირითად სფეროებში რეგრესიც კი განიცადა. ამასთან, ევროკომისიის ანგარიშის თანახმად, სახალხო დამცველის ოფისმა ზეწოლა იმის გამო განიცადა, რომ ხმამაღლა ეხმაურებოდა გარკვეულ პოლიტიკურად სენსიტიურ საკითხებს. გარდა ამისა, ანგარიშში ნიკა მელიას, მამუკა ხაზარაძის, ბადრი ჯაფარიძის, ნიკა გვარამიას და მიხეილ სააკაშვილის საქმეები მოხვდა. აღნიშნული ანგარიში ორივე მხარემ, ოპოზიციამ და ხელისუფლებამ თავისებურად და სათავისოდ წაიკითხეს. თქვენ, პირადად, რას გეუბნებათ ევროკომისიის ეს წლიური ანგარიში?

- სამი მიმართულება გამოიყო, რომელიც სერიოზულ პრობლემას ქმნის საქართველოსთვის, უშუალოდ ამ სტატუსის მიღების კუთხით. ეს არის სასამართლო და მართლწესრიგი, მეორე - კორუფცია და ორგანიზაციული დანაშაული და მესამე ნაწილი შეეხება ადამიანის უფლებებს. იმედია, რომ იქნება სერიოზული მსჯელობა, რომ ეს საკითხები მოგვარდეს დეკემბრამდე. ანგარიშში საუბარი იყო სახალხო დამცველზე, როგორ მოხდეს ამ ინსტიტუტის გაძლიერება, რომ სახელისუფლებო სტრუქტურების გავლენის ქვეშ არ მოხვდეს. 

რაც შეეხება სააკაშვილის საქმეს, ის ანგარიშში შეყვანილი არ არის, როგორც პოლიტპატიმარი. საუბარია მისი ჯანმრთელობის მდგომარეობაზე. სხვათა შორის, ასეთი ფუფუნება და პრივილეგია მიხეილ სააკაშვილის პოლიტპატიმრებს და უკანონოდ დაკავებულ პატიმრებს არ ჰქონიათ.

სამომავლოდ, ევროკავშირის კანდიდატის სტატუსის მიღების თვალსაზრისით, რას გვთავაზობს ეს ანგარიში?

- ევროკავშირმა, უბრალოდ, დააკონკრეტა, უფრო მეტად დაავიწროვა კონკრეტული სამი მიმართულება, რომელიც აუცილებლად მოითხოვს გადახედვას, 12 რეკომენდაციიდან ყურადღება გაამახვილა სამ კონკრეტულ მიმართულებაზე.

ოპოზიციის ნაწილი ამბობს, რომ ამ ანგარიშის მიხედვით აშკარაა, საქართველო ვერ მიიღებს ევროკავშირის კანდიდატის სტატუსს...

- ოპოზიციური პარტია იმიტომ არის ოპოზიციური, რომ ისაუბროს ის, რაც მას მოესურვება. ჩემთვის ეს ანგარიში ნიშნავს, რომ 12 პრობლემატური რეკომენდაციიდან გამოყო 3 ყველაზე მნიშვნელოვანი სფერო, სხვა მხრივ, საქართველო უბრალოდ, ვერ მიიღებს კანდიდატის სტატუსს. 

პოლარიზაციის უფრო მეტად გაღრმავება თუ არის მოსალოდნელი იმის ფონზე, რომ ხელისუფლება და ოპოზიცია ევროკომისიის 12 პუნქტზე ერთად მუშაობასაც კი ვერ ახერხებს? ამასთან, საუბარია, რომ „ერთიანი ნაციონალური მოძრაობა“ შემოდგომიდან საპროტესტო აქციების დაწყებას აანონსებს. 

- პოლარიზაციას ის გარემოება იწვევს, რომ „ნაცმოძრაობამ“ არ მოინანია, ბოდიში არ მოუხადა ქართულ საზოგადოებას იმის გამო, რაც მან ჩაიდინა. ასევე იქცევა მათი ლიდერი მიხეილ სააკაშვილი. ვიდრე „ნაცმოძრაობა“ ბოდიშს არ მოიხდის და არ შეიგნებენ, რომ ისინი იყვნენ დამნაშავეები, არაფერი შეიცვლება. „ნაცმოძრაობა“ მაინც ვერ გამოიყვანს ხალხს ქუჩაში, ამიტომ, ეს მხოლოდ წყლის ნაყვაა. 

„ქართულმა ოცნებამ“ კი უნდა გამოიჩინოს ტოლერანტობა და საერთო აზრი გამონახოს ოპოზიციასთან. პოლიტიკური კონსენსუსის გარეშე ჩვენ შეიძლება დავკარგოთ ასოცირებული ქვეყნის წევრობაც კი, ანდა გაგვიუქმონ უვიზო მიმოსვლაც. ასეთმა პოლარიზებულმა გარემომ შეიძლება ეს საკითხი დააჩქაროს.

ოპოზიციის ნაწილი ამბობს, რომ ქვეყანაში პოლარიზაციის ხარისხი შემცირდება იმ შემთხვევაში, თუკი ყოფილი პრეზიდენტი მიხეილ სააკაშვილი ქართული პოლიტიკიდან წავა, ხოლო „ქართული ოცნების“ დამფუძნებელი ბიძინა ივანიშვილი პოლიტიკაში თანამდებობრივად დაბრუნდება და გარკვეულ პოლიტიკურ პასუხისმგებლობასაც აიღებს საკუთარ თავზე. აღნიშნულთან დაკავშირებით რას ფიქრობთ?

- ქართულ პოლიტიკას ქარიზმატული ლიდერები სჭირდება. არ აქვს მნიშვნელობა სააკაშვილი იქნება, ივანიშვილი, გამსახურდია თუ შევარდნაძე. სააკაშვილი პოლიტიკიდან წასვლაზე მარტო არ არის საუბარი, მან საზოგადოებას ბოდიში უნდა მოუხადოს და აღიაროს ის დანაშაულები, რაც ჩაიდინა. ხალხი ისევ ელოდება ივანიშვილს, რადგან სხვა, ქარიზმატული ლიდერები არ არსებობენ.

რაც შეეხება იმ ოთხეულს, რომელიც „ქართულ ოცნებას“ გამოეყო, თქვენი აზრით, ის კამპანია, რაც დეპუტატებმა წამოიწყეს, რა გავლენას იქონიებს ქვეყანაში არსებულ განწყობებზე?

- ვშიშობ, რომ ისინი გავლენას ახდენენ საზოგადოებაზე. თანდათან, ანტიდასავლური და ანტიამერიკული სენტიმენტები ფეხს იკიდებენ საქართველოში, რაც ძალიან ცუდია. ისინი ყიდიან „ფეიქნიუსის“ პროდუქციას, რაც განსაკუთრებით მოქმედებს დაბალი პოლიტიკური კულტურის მქონე სოციუმზე. მათ შეუძლიათ გარკვეულწილად შექმნან ამინდი, ანტიდასავლური და ანტიამერიკული სენტიმენტების მიმართულებით. ამაზე მუშაობს მოსკოვიც და ამ ორი ელემენტის უნებლიეთ გაერთიანება ამ პროცესს ხელს უწყობს. დღეს ამერიკის გეოპოლიტიკური სიძლიერე ცოტა შესუსტებულია ჯო ბაიდენის პრეზიდენტობის პირობებში. ეს ფაქტორი მოქმედებს ჩვენს რეგიონშიც.