„ქართული ოცნებიდან“ გასული დეპუტატების მორიგი ბრალდება ამერიკის შეერთებული შტატების საელჩოს - მათი მტკიცებით, საქართველოს ხელისუფლებისადმი მიდგომა აშშ-ს საელჩოს არ შეუცვლია და ის პოლარიზაციის ხელოვნურად გაღრმავების ხარჯზე, რევოლუციის მოწყობასა და საქართველოს მეორე ფრონტად ქცევას ეცდება.

აღნიშნულს ოპოზიციონერ პოლიტიკოსთა კრიტიკა მოჰყვა და ითქვა, რომ მმართველი პოლიტიკური გუნდიდან გამოყოფილი დეპუტატების მიზანი ერთია: საქართველოში ანტიდასავლური განწყობები გაზარდონ, რაც რუსეთისკენ გადადგმულ ნაბიჯს ნიშნავს. 

გურამ მაჭარაშვილი, რომელიც საზოგადოებრივ მოძრაობა „ხალხის ძალას“ შეუერთდა, აცხადებს, რომ ფაქტები ადასტურებს, რადიკალური ოპოზიციის მიერ პროცესების კოორდინირება, რომელთაც ხელისუფლების არაკანონიერად შეცვლა სურდათ, აშშ-ს საელჩოში ხდებოდა. 

ოპოზიციონერმა პოლიტიკოსმა, „სტრატეგია აღმაშენებლის“ დეპუტატმა პაატა მანჯგალაძემ „ქართული ოცნებიდან“ წასული დეპუტატებს განცხადების კომენტირებისას აღნიშნა, რომ მადლობა ღმერთს ტერორისტულ სახელმწიფოდ არ გამოაცხადეს აშშ. მისი თქმით, ხელისუფლებაში არიან ადამიანები, რომლებიც არიან არა საქართველოს, არამედ რუსეთის სამსახურში.

ანალიტიკოსი ნიკოლოზ მეტრეველი For.ge-სთან საუბარში აცხადებს, რომ მნიშვნელოვანია ვიცოდეთ სიმართლე, რაზედაც „ქართული ოცნებიდან“ გასული დეპუტატები საუბრობენ. მისი შეფასებით, ერთადერთი, ვინც ქვეყანაში ანტიდასავლურ განწყობებს აღვივებს, ოპოზიციაა. 

„გამოცდილი ხალხია და მათი განცხადებები ყურადსაღებია. რეალურად, უნდა ვიცოდეთ რასთან გვაქვს საქმე და რა როგორ იყო. არ ვთვლი, რომ ეს განცხადებები ანტიდასავლურია. ნებისმიერ ადამიანს აქვს უფლება იცოდეს, თუ რა ხდება რეალურად, რაზეა საუბარი და როგორ წყდება ჩვენი ქვეყნის ბედი. პირიქით, ეს ბევრ რამეს ნათელს მოჰფენს და ვერაფერს ამაში ანტიდასავლურს ვერ ვხედავ. 

რუსეთისთვის წისქვილზე წყალს ასხამს ოპოზიციის მავნებლური განცხადებები, ისინი ყველაფერს აკეთებენ, რომ დასუსტდეს ქართული ეკონომიკა და საქართველო ვერ შევიდეს ევროკავშირში და ნატო-ში, - ოპოზიციის საქმიანობა არის ეს. ამ დეპუტატების განცხადებები ემსახურება იმას, რომ გავიგოთ, მართლაც ხომ არ არის რომელიმე მაღალჩინოსნის მხრიდან გადაცდომები ქვეყნებს შორის ურთიერთობებში. 

რუსეთისთვის კარგად არის ცნობილი, რომ ეს ხელისუფლება პროდასავლურია. არ ვთვლი, რომ რაიმე სარგებელი შეიძლება მიიღოს რუსეთმა საქართველოს ხელისუფლებისგან. ჩვენ უბრალოდ პრაგმატულ პოლიტიკას ვატარებთ, რომელიც ქვეყნის ინტერესებზეა დამყარებული“, - განაცხადა მეტრეველმა. 

ანალიტიკოსი არ გამორიცხავს, რომ „ქართული ოცნებიდან“ გასულმა დეპუტატებმა პოლიტიკური პარტია ჩამოაყალიბონ:

„არ გამოვრიცხავ, რომ ეს ადამიანები რაღაც პარტიად ჩამოყალიბდნენ და შემდეგ არჩევნებში მონაწილეობა მიიღონ, - ამის კონტურები იკვეთება. თუკი მსგავსი რამ მოხდება, ვფიქრობ, ძალიან სერიოზული პარტია იქნება“, - აღნიშნა ნიკოლოზ მეტრეველმა For.ge-სთან. 

ასევე, როგორც მმართველი გუნდის ყოფილი წევრები აცხადებენ, ნათლად ჩანს, რომ ამერიკის საელჩოს მიდგომა ჯერაც არ შეუცვლია და „როგორც ხელისუფლების გადატრიალების, ისე მეორე ფრონტის გახსნის განზრახვა კვლავაც უაღრესად აქტუალურია“. „ქართული ოცნებიდან“ გასული დეპუტატები აღნიშნავენ, ბიძინა ივანიშვილი დღესაც საქართველოს წინააღმდეგ კოორდინირებული შეტევის მთავარი ობიექტია და მისი ოლიგარქად და არაფორმალურ მმართველად გამოცხადების ერთ-ერთი მთავარი მიზანი სახელმწიფო სისტემის დაკნინებაა.

„ყველა ის მოღალატეობრივი და მავნებლური ბოდვა თუ თეორიები რომ შევყაროთ ერთად, რაც კი ამ წლების განმავლობაში გაგვიგია, ეს წერილი კონცენტრირებული ქვეყნის ღალატის აღწერაა ივანიშვილისა და მისი გარემოცვის მხრიდან“, - ასე გამოეხმაურა „ევროპული საქართველოს“ თავმჯდომარე, გიგა ბოკერია „ქართული ოცნებიდან“ წასული დეპუტატების მიერ ამერიკის საელჩოსთან დაკავშირებით გავრცელებულ წერილს.

მისივე განცხადებით, ბიძინა ივანიშვილის და მისი გარემოცვის არსი ქვეყნის ინტერესის ღალატია.