სახალხო დამცველი 2012 წლის ანგარიშში ლოპოტას ხეობაში, განვითარებული მოვლენების სკანდალურ ფაქტებზე საუბრობს და ამბობს, რომ საქართველოს ძალოვანი უწყებები ჩეჩენ მეომრებს ჩეჩნეთში გადასასვლელად, ჰპირდებოდნენ საქართველოში წვრთნას, აღჭურვასა და ჩეჩნეთში გადასვლისთვის ყოველგვარი პირობების შექმნას. ომბუდსმენის შეფასებით, ლაფანყურის მოვლენებში სერიოზული დარღვევები იკვეთება და შესაძლოა, სისხლის სამართლებრივი დანაშაულის ნიშნები გამოიკვეთოს, რის გამოც, პარლამენტმა დროებითი საგამოძიები კომისია უნდა შექმნას.

წინა ხელისუფლების წარმომადგენლები უჩა ნანუაშვილის მიერ მომზადებულ 770 გვერდიან ანგარიშზე რას ფიქრობენ, for.ge პარლამენტის ვიცე-სპიკერს, გიორგი ბარამიძეს ესაუბრა:

უჩა ნანუაშვილის ინფორმაციით, ჩეჩნეთში საომრად გადასვლის იმედით ევროპის სხვადასხვა ქვეყნებიდან საქართველოში დაახლოებით 120 ჩეჩენი და ჩრდილო კავკასიურის წარმოშობის მებრძოლები ჩამოვიდნენ, რომელთაც შსს-ს მაღალი თანამდებობის პირები იარაღს ჩუქნიდნენ და უფორმებდნენ, მათ აძლევდნენ მართვის მოწმობებს, სხვა საჭირო დოკუმენტებსა და ნივთებს. ასევე, მისი თქმით, ჩეჩენი მებრძოლებისგან ჩამოყალიბებული ჯგუფის წევრები წვრთნას ვაზიანისა და შავნაბადას სამხედრო ბაზებზე გადიოდნენ. როგორ აფასებთ ომბუდსმენის ანგარიშს?

- ასეთი დელიკატური საკითხი შესაბამის დონეზე და შესაბამისი ფორმით უნდა იქნეს შესწავლილი და გამოკვლეული, მაგრამ ეს სახალხო დამცველის ფუნქცია არ არის. ლაფანყურის ხეობაში განვითარებულ მოვლენებთან დაკავშირებით, სახალხო დამცველი საზოგადოებას რატომღაც, პროკურორად, გამომძიებლად და რაც მთავარია, საკუთარი ქვეყნის წინააღმდეგ ბრალმდებლად მოევლინა. ბატონი ნანუაშვილი ქვეყანას ისეთ მძიმე ბრალდებებს უყენებს, როგორიცაა - ტერორისტებებისთვის თავშესაფრის მიცემა, ტერორისტების მომზადება, მათთვის ბაზების შექმნა, მფარველობა და რუსეთის ფედერაციაში ტრანზიტი. გაურკვეველია, ომბუდსმენი ვისი ფუნქციების დაცვაზე საუბრობს. იმ უცხო ქვეყნის მოქალაქეებზე, რომლებიც საქართველოს ტერიტორიაზე იყვენენ შემოსულები და რომელთაც, ქვეყნის მოქალაქეები მძევლად აიყვანეს?! მათ მიმართ სახელმწიფომ ის ზომები განახორციელა, რაც კანონით არის გათვალისწინებული. ნანუაშვილი რას გვეუბნება? - ამ ფაქტზე რეაგირება არ უნდა მოგვეხდინა და მათთვის თავისუფალი გადაადგილების საშუალება უნდა მიგვეცა?! სახალხო დამცველი იმაზე საუბრობს, რასაც მთელი ამ წლების განმავლობაში, რუსეთის სპეცსამსახურების პოლიტიკური ხელმძღვანელობა საუბრობდა, რაც რბილად რომ ვთქვა, ძალიან საეჭვოა. მათი როტორიკა ერთი-ერთზე ერთმანეთს ემთხვევა. ომბუდსმენის პოსტზე ნანუაშვილი ამ ხელისუფლების მიერ დაინიშნა და ნურავინ მოიკატუნებს თავს, რომ მას არ იცნობენ და მასზე ირიბი და პირდაპირი გავლენები არ აქვთ. როდესაც, გამოდიხარ და ამბობ, რომ თურმე, შენი ქვეყანა ყოფილა ტერორისტების თავშესაფარი და ა.შ. წარმოიდგინეთ, რუსეთს საქართველოს წინააღმდეგ რამხელა პრივილეგიას აძლევ. ნებისმიერ მომენტში, კრემლს შეუძლია კარტიდან კოზირი ამოაძროს და თქვას, რომ სახალხო დამცველმა საკუთარი ქვეყანა ტერორიზმის ბუდედ გამოაცხადა და აი, ის რაზეც ჩვენ ვსაუბრობდით, აი ომი რატომ დავიწყეთო. თუ ამერიკას ჰქონდა ტერორისტული დაჯგუფებების წინააღმდეგ ბრძოლის დაწყების უფლება, რუსეთსაც ხომ აქვს უფლება, რომ ბრძოლა გამოაცხადოს?! ვინ აგებს იმაზე პასუხს, რომ რუსეთი ამას ხვალ თუ ზეგ თავისთვის არ გამოიყენებს?! ამაზე ვინმე დაფიქირებულა?!

ანუ, ფიქრობთ, რომ ქვეყნის ინტერესებიდან გამომდინარე, უჩა ნანუაშვილს მეტი წინდახედულობა უნდა გამოეჩინა?

- რა თქმა უნდა. როგორ შეიძლება თავი გამოვიშტეროთ და ვთქვათ, რომ ეს რუსეთის წისქვილზე არ დაასხამს წყალს?! ეს სახუმარო თემა არ არის. თუ ვინმეს ვიღაცის დასჯა უნდა და რაღაცის გამოძიება სურს, შესაბამის უწყებებს მიმართოს და საქართველოს წინააღმდეგ რუსეთს ხელ-ფეხს ნუ გაუხსნის. ამ ყველაფერს მეორე ასპექტიც აქვს. კერძოდ, ჩვენ დასავლეთისკენ მივდივართ და ამ ყველაფრით ხელისუფლებას იქითქკენ ხომ არ მიჰყავს საქმე, რომ ჩვენ კი არ ვიტყვით დასავლეთზე უარს, არამედ ჩვენზე თავად ნატო და ევროკავშირი იტყვის უარს და მათ ზურგს ჩვენ კი არ შევაქცევთ, არამედ -პირიქით. ვფიქრობ, რომ სახალხო დამცველის ეს ანგარიშიც სწორედ ამ მიმართულებით გადადგმული ნაბიჯია. როდესაც, შენ ნატოში შესვლაზე საუბრობ და ამ ფონზე, სახალხო დამცველი ტერორისტების მფარველებად გამოგიყვანს, როგორ ფიქრობთ პროცესები წინ წავა?! პოლიტიკური ძალები, რომლებიც ამა თუ იმ მთავრობაზე გავლენას ახდენენ, რომ ნატოსა და ევროკავშირში საქართველოს სვლის ჩქარი ტემპი დაბლოკონ, ამას არ გამოიყენებენ და არ იტყვიან - რომელი ქვეყნის მიღებაზე საუბრობთ, რომელიც ტერორისტებს უწყობდა ხელსო?! ამაზე ყველაფერზე პასუხისმგებლობა ხელისუფლებას ეკისრება, რადგან ეს არ არის მხოლოდ უჩა ნანუაშვილი. მართალი გითხრათ, როდესაც ეს ინფორმაცია გავიგე, ეს იმდენად გამიკვირდა, რომ საპირველაპრილო უხამხი და პროვოკაციული ხუმრობა მეგონა, მაგრამ ვაი, რომ ეს სიმართლე აღმოჩნდა, რაც უზარმაზარი სკანდალია. ნანუაშვილის ქმედება ანტისახელწიფოებრივი ქმედების ერთ-ერთი გამოხატულებაა.

თუმცა, სახალხო დამცველი კონფიდენციალურ წყაროებზე დაყრდნობით საუბრობს და ამბობს, რომ ეს ინფორმაციები მას მიაწოდეს. ამასთან, სპეცოპერაციის დროს გარდაცვლილი ასლან მარგოშვილის მამა, მერაბ მარგოშვილი სახალხო დამცველისთვის მიცემულ ახსნა-განმარტებაში აცხადებს, რომ მისი შვილი წვრთნას გადიოდა შავნაბადას ბაზაზე, ხოლო სპეცოპერაციის დროს გარდაცვლილი საქართველოს ძალოვანი უწყებების თანამშრომლები, წიკლაური და ჩოხელი, ამ ჯგუფის ინსტრუქტორები იყვნენ...

- სახალხო დამცველი ჭორაობის დონზე უნდა გამოდიოდეს და ასეთ ინფორმაციებს უნდა აფრქვევდეს?! თუ რაიმე შესასწავლია, მან სამართალდამცავ უწყებებს უნდა მიმართოს. „აგვისტოს ომთან“ დაკავშირებით, რუსეთ-საქართველოს სასამართლო პროცესი მიმდინარეობს და შეიძლება ეს ინფორმაცია მოსკოვმა იქაც გამოიყენოს, რაც შესაძლოა პირდაპირ აისახოს - დეოკუპაციისა და დევნილების დაბრუნების პროცესზე.

ანუ, თქვენ კატეგორიულად უარყოფთ ინფორმაციას - ქართველ სამართალდამცავებსა და ჩეჩნეთის ომის ვეტერანებს შორის ურთიერთობის თაობაზე?

- აბსოლიტურად გამოვრიცხავ, რომ საქართველოს ხელისუფლებას, ან ჩვენთან დაახლოებულ რომელიმე პირს რაიმე კავშირი ჰქონოდა რომელიმე ჩეჩნურ ორგანიზაციასთან. ტერორიზმის წინააღმდეგ წამოწყებულ ბრძოლასთან დაკავშირებით, ეფექტიანად ვთანამშრომლობთ დასავლეთთან და ჩვენი ხედვები მათთვისაც ცნობილია. ამ კუთხით ერთმანეთს ვენდობით და ეს ყველაფერი ამ ნდობის წინააღმდეგ არის მიმართული. შეკითხვებზე პასუხის გაცემის წინააღმდეგი არავინ არის, მაგრამ ისე არ უნდა გააკეთო, რომ ვაშლის მოწყვეტა გინდოდეს და ვაშლის ხე მოჭრა.

ლაფანყურის მოვლენებთან დაკავშირებით, ეჭვები და კითხვები საზოგადოებაშიც არსებობს. ამ სპეცოპარაციის შემდეგ, თქვენი ხელისუფლების წარმომადგენლების მხრიდან ურთიერთგამომრიცხავი განცხადებები კეთდებოდა. არ ფიქრობთ, რომ ლოპოტას ხეობის მოვლენების გასაჯაროება უნდა მომხდარიყო?

- მაშინდელმა ოპოზიციამ ეს თემა პოლიტიკურ საკითხად აქცია და მათ პოლიტიკური ქულების წერა დაიწყეს. როგორც ჩანს, ამ გუნდის წევრებთან შეთანხებით, უჩა ნანუაშვილი ამ საკითხის „გაპრავებას“ ცდილობს. მაშინ, ეს თემა პოლიტიზირებულად აქციეს, მაგრამ ეს არის ძალიან საფრთხილო და ფაქიზი თემა და არ შეიძლება საკუთარი პოლიტიკური ინტერესების გატარების მიზნით, ქვეყნის ინტერესები დააზიანო. ეს საკითხი სათამაშო და ოპოზიციასთან საბრძოლველი და ნიშნის მოსაგები თემა არ არის. გახსოვთ, რომ ჩვენს წარმომადგენლებს ბავშვის მოკვლაც კი დააბრალეს, თუმცა, აღმოჩნდა, რომ ეს ასე არ არის. ასევე ამბობდნენ, რომ თურმე, ჩვენს ჯიბეებში საწვავიდან ერთი ლარი მიდიოდა, მაგრამ ახლა, სად არის ეს ერთი ლარი?! რომელი მონოპოლია დაშალეს?!

ჩეჩნური დიასპორის წარმომადგენელმა და რეინტეგრაციის საკითხებში სახელმწიფო მინისტრის მრჩეველმა, მექა ხანგოშვილმა განაცხადა, რომ „ჩეჩნები არავის თავის სისხლს არ შეარჩენენ. ეს მუქარა არ არის, მაგრამ ფაქტია, რომ ის ადამიანები, ვისაც პირტიტველა შვილები დაუხოცეს, ძალიან მძიმე მდგომარეობაში არიან“. . .

- ის რომ ვიღაცამ, რაღაც თქვა და ამაზე მე კომენტარი უნდა გავაკეთო, ეს არასერიოზულია. არავის ეგონოს, რომ თუ ვინმე ხელს საქართველოს ხელისუფლებისკენ გაიშვერს და ეს არ ნიშნავს საქართველოსკენ ხელის გაშვერას. საერთაშორისო ასპერაზზე ხელისუფლება საქართველოს წარმოადგენს და ხალხისთვის თვალებში ნაცრის შეყრას ნურავინ შეეცდება.

რაც შეეხება 19 აპრილის აქციას, ვანო მერაბიშვილი ქვეყნაში სიტუაციის რადიკალურ ცვლილებას აანონსებს. მისი ნათქვამი ბევრმა ცინიკურად, ბევრმაც სასურველ რეალობად აღიქვა და პრეზიდენტის გადადგომაც იწინასწარმეტყველა. რა მოხდება 19 აპრილს?

- აქციის ლოზუნგია „ჩვენი მომავალია ევროპა“, რომლის ქოლგის ქვეშაც იმ თემებზე ვისაუბრებთ, რომელიც ეხება - სასამართლო სისტემის ხელისუფლების ჯიბეში ჩადების მცდელობას, საზოგადოებრივი მაუწყებლის დაქვემდებარებაში მოქცევის მცდელობას, ადგილობრივი ხელისუფლების ჩამოქცევას, ეკონომიკურ პროცესებსა და „ქართული ოცნების“ დაპირებებს. უჩა ნანუაშვილის მაგალითი ეჭვს გვიღვივებს, რომ ასეთი მოვლენები ევროპული გზას შეაჩერებს. აგერ, „ოკუპირებული ტერიტორიების შესახებ“ კანონში შესწორებები შეიტანეს, რომლის მიხედვითაც, საზღვრის გადმოკვეთის რეგულაციები ლიბერალური გახდა და ის ადმინისტრაციული ჯარიმით შემოიფარგლება. სადმე ცივილიზებული ქვეყანა იცით, სადაც საზღვრის გადმოკვეთის სხვადასხვა რეგულაციებია?! რუსეთ-საქართველოს საზღვარი ორმხრივი ღერძულა ხაზი ხომ არ არის?! ეს საზღვარი ნაკლებად მკაფიოდ არის რუქებზე დატანილი, თუ ჩვენივე ხელით ვახდენთ საზღვრის მოშლას?! ვის დაპირებებს ასრულებენ?! ეს არის ქართველი ხალხის ოცნებების ასრულება, თუ დაპირებებს პუტინს უსრულებენ, რომელმაც ქვეყნის ოკუპაცია მოახდინა?!

აქამდე ცნობილი იყო, რომ პრეზიდენტს რუსთაველის გამზირი დიდად არ უყვარს. ის აქციების გამართვისთვის ოპოზიციონერებსაც ხშირად აკრიტიკებდა და თბილისს „თავკომბალას“ უწოდებდა. აქციის ჩატარებისთვის, რატომ შეარჩიეთ რუსთველის გამზირი?

- ქვეყნის განვითარებას ხელს ქუჩის სამთვიანი გადაკეტვები უშლიდა და არა აქციის ჩატარება. რუსთაველის გამზირი სიმბოლურია, სადაც 9 აპრილი მოხდა და საიდანაც ეროვნული მოძრაობა დაიწყო. პოლიტიკური მოვლენები ტრადიციულად სწორედ რუსთაველის გამზირზე ხდება. არ ვაპირებთ - არც კანონის დარღვევას, არც ქვეყნისთვის პრობლემის შექმნას, არც დესტაბილიზაციას, არც კარვებს გავშლით და არც პრეზიდენტი გადადგება. აქცია იმ მიზნით ტარდება, რომ ხელისუფლებამ გაიგოს - ქვეყანა ჩალით დახურილი არ არის.

როგორ ფიქრობთ, ეს აქცია მასშტაბური იქნება?

ვფიქრობ, რომ - საკმაოდ, თუმცა, არა ისეთი რომ მთელი თბილისი გარეთ გამოვიდეს. 19 აპრილს არც საქართველოს ბედი წყდება და არც არჩევნების. სიმბოლური ხასიათის აქცია ჩატარდება და ვნახავთ - ვინ არის ჩვენს ჭკუაზე. ვისაც დრო და ინტერესი ექნება, ის აქციაზე მოვა. ვერ გეტყვით, რომ აქცია განსაკუთრებით ორიგინალური იქნება. ჩვენ არასოდეს გვითქვამს, რომ ქვეყანაში ყველაფერი იდეალურად იყო, მაგრამ ხვალინდელმა დღემ გუშინდელ დღეს უნდა აჯობოს და წინ პროგრესით ვიაროთ. ჩვენ ის მოვახერხეთ, რომ სასამართლოში ქრთამს არავინ იღებს. მართალია, სასამართლოს დამოუკიდებლობა მთლად კარგი არ იყო, თუმცა, ამ დამოუკიდებლობის მოპოვების შანსი ხელისუფლებას აქვს და მათ რეფორმები უნდა გაატარონ და არა პირიქით, იუსტიციის საბჭო თავის გავლენის ქვეშ მოაქციონ. იგივე შემიძლია მაუწყებლზეც გითხრათ.

ხშირად, თქვენ საზოგადოებრივი მაუწყებლის ზეწოლის მცდელობაზე აპელირებთ, მაგრამ ამ ტელევიზიის საინფორმაციო სამსახურის ყოფილი ხელმძღვანელი ხათუნა ბერძენიშვილი კრწანისის გამგებლად დანიშნეთ. რატომ?

- ამაში გასაკვირი არაფერია, რადგან გაზეთის რედაქტორი ელისო ჩაფიძეც იყო, რომელიც პოლიტიკაში წავიდა. მისგან განსხვავებით, ბერძენიშვილი სამსახურიდან გააგდეს.

თუმცა, ელისო ჩაფიძე გაზეთ „რეზონანსის“ რედაქტორი იყო, ხოლო ბერძენიშვილი მაუწყებლის და მათ შორის კი, დიდი განსხვავებაა... 

- საერთაშორისო ორგანიზაციები აცხადებენ, რომ მაუწყებელი ყველაზე ნეიტრალური ტელევიზია იყო. რაც შეეხება ბერძენიშვილის გამგებლად დანიშვნის საკითხს, პარტიული ტიპების გარდა, ნეიტრალურ პირებს ვეძებთ, რომელთაც ჩვენი ხალხის პრობლემები იციან. თუ ასეთი ადამიანი დაგთანხმდება, რომ ხალხს ემსახუროს, ამაში ცუდი რა არის?! ბერძენიშვილის პოსტზე დანიშვნით, რა დიდი გამოაშკარავება აღმოაჩინეთ?! გამგებელი ანდრო ბარნოვიც გახდა, რომელიც ჩვენს პარტიაში არ იყო.

თუმცა, საბურთალოს გამგებელის პოსტზე გია ხუროშვილი დაინიშნეთ, რომელიც მთავრობის საპარლამენტო მდივანი იყო. ანუ, პარტიულ კადრებსაც არ კარგავთ?

- ჩვენს კარგ კადრებს, რატომ უნდა შევაქციოთ ზურგი?!