რაიონის მუნიციპალიტეტების გამგებლებსა და საკრებულოს თავმჯდომარეებთან შიდა ქართლის გუბერნატორის - ანდრო ბარნოვის მიერ დაგეგმილი შეხვედრა ჩაიშალა.
შეხვედრაზე შიდა ქართლის რეგიონის მუნიციპალიტეტების არც ერთი გამგებელი და საკრებულოს თავმჯდომარე არ მივიდა.
გუბერნატორი ამას იმით ხსნის, რომ ადგილობრივი ხელისუფლების წარმომადგენლებზე ზეწოლა ხორციელდება, რადგან მანამდე ყველა გამგებელი და საკრებულოს თავმჯდომარე თანახმა იყო, თათბირს დასწრებოდა.
თავის მხრივ, გორის მუნიციპალიტეტის გამგებელი პაპუნა კობერიძე აცხადებს, რომ მას რთული სამუშაო გრაფიკის გამო გადაავიწყდა შეხვედრაზე მისვლა.
მომხდარში გასარკვევად For.ge ანდრო ბარნოვს დაუკავშირდა.
მუნიციპალიტეტების გამგებლებთან და საკრებულოს თავმჯდომარეებთან თქვენი შეხვედრა რატომ ჩაიშალა?
- ოთხი საკრებულოს თავმჯდომარე და ოთხი გამგებელია ჩვენთან, წინა საღამოს რომ ვესაუბრეთ, ყველა მათგანს ჰქონდა მოსვლის სურვილი. ერთადერთი, ოლეგ იაძემ აღნიშნა, მე დავალება მაქვს ასეთი, რომ არ მოვიდეო, დანარჩენებმა, ყველამ დიდი ენთუზიაზმი გამოხატეს. რამდენიმემ ისიც კი თქვა, რაღაცები მქონდა დაგეგმილი, მაგრამ გადავდებ და აუცილებლად მოვალო. ფაქტია, ამის დიდი სურვილი ჰქონდათ.
თქვენ პირადად ესაუბრეთ ამ ადამიანებს?
- ჩემი მოადგილე ესაუბრა, მაგრამ, სამწუხაროდ, გუშინ მათი მხრიდან გამოცხადება იყო ნული. არადა, მე არ მაქვს ამ ხალხთან ცუდი ურთიერთობა.
მათ ქმედებას რით ახსნით?
- თქვენ თვითონ ახსენით, როცა გვიან საღამოს შედგა საუბარი და ადამიანები უბრალოდ კი არ გვთანხმდებოდნენ მოსვლას, არამედ ამის სურვილიც ჰქონდათ, თუ როგორ სურდათ ჩართულიყვნენ ამ საქმეში. ასეთი ტექსტები ჰქონდათ, რა კარგი ინიციატივაა და ა.შ.
რომელი თემის ირგვლივ უნდა გესაუბრათ?
- საქართველოში პირველად ვატარებთ რეგიონული ღვინის ფესტივალს. ეს ძალიან მნიშვნელოვანი თემაა არა მარტო იმიტომ, რომ ღვინის ფესტივალია, არამედ, თუ ჩვენ გვინდა, რომ შიდა ღვინის ბაზარი განვითარდეს, თუ ვამბობთ, რომ ჩვენ ვართ ღვინის ქვეყანა და ამ დროს შიდა ბაზარზე მრავალფეროვნება არ არის ისეთი, როგორიც შეეფერება ღვინის ქვეყნის სტატუსს. თუ გვინდა, აქ განვითარდეს ტურიზმი, რომ მცირე მწარმოებლები დიდი მწარმოებლების ფონზე არ დაიჩაგრონ და ბაზარი იყოს დაბალანსებული, მაშინ ასეთი ფესტივალები ამის გასაღებია. თანაც, ეს არ იყო მარტო ღვინის ფესტივალი, აქ იქნება წარმოდგენილი ყველი, ეს იქნება ტრადიციული ტკბილეულობის ვაჭრობის ადგილი, ასევე, გაიყიდება სუვენირები და სახალხო რეწვის პროდუქცია. ძალიან ბევრი ადამიანი ნახავს კონკრეტულ სერიოზულ სარგებელს იმით, რომ მიიღებს ფესტივალში მონაწილეობას, აღარაფერს ვამბობ იმაზე, რომ ათასობით ადამიანი ისიამოვნებს და საინტერესო რამეებს გაიგებს. ამით ვქმნით პრეცენდენტს, რომ დაიწყება ქართლის ღვინის ფესტივალი და შემდეგ რეგიონული ფესტივალები გადაედება მთელ საქართველოს. თანაც, ფესტივალი არ არის იზოლირებული მოვლენა, ამას თან სდევს რეგიონული ასოციაციების, ტრადიციული მეღვინეობის ასოციაციების ჩამოყალიბება. ცხადია, ამას მე კი არ ვაკეთებ, არამედ - მეღვინეები და ამას ორგანიზებას უწევს „ღვინის კლუბი“, რომელიც პროფესიონალების მიერ შემდგარი მოხალისეების გაერთიანებაა. ისინი მეღვინეებს იცნობენ და ეს დიდი ოჯახია. უბრალოდ, ამას სწორ პოლიტიკურ მიმართულებას ვაძლევთ, რომ ეს აქტივობები იმ მიმართულებით წავიდეს, რომ ხვალ და ზეგ ინსტიტუციურად ჩამოყალიბებული საზოგადოება ვიყოთ, სოფლის მეურნეობის თუ სხვა ტიპის ბიზნესგაერთიანებებისთვის. ამის გარეშე არ განვითარდება ეკონომიკა. ეს ზღაპარია და შეგვიძლია, ამაში ასეულობით მილიონები და მილიარდები ჩავდოთ და ეს ფული მთლიანად ჰაერში იქნება გადაყრილი.
თუ გამგებლები კვლავაც არ მოვლენ, ეს პრობლემა არ იქნება თქვენთვის? მაინც აპირებთ ამ ფესტივალის ჩატარებას?
- რა თქმა უნდა. იმის გამო, რომ გუშინწინ ისინი ვიღაცამ შეაშინა ან რაღაც დაავალა, მე ამ ხალხს ხელს არ ვკრავ. ისინი ჩვენი მოქალაქეები არიან, ბევრ მათგანთან ურთიერთობა მაქვს. უბრალოდ, ვწუხვარ, რომ დაემორჩილნენ სრულიად არაკორექტულ მითითებებს, თორემ დარწმუნებული ვარ, რომ ხვალ და ზეგ ისინი გააკეთებენ სწორ არჩევანს და დადეგებიან ხალხისთვის სასარგებლო საქმის გვერდით. ეს რწმენა რომ არ მქონდეს, ამას არ ვიტყოდი.
ამ ადამიანებს, გამგებლებსა და საკრებულოს თავმჯდომარეებს, აქამდე პირადად თუ იცნობდით? როგორი ურთიერთობა გქონდათ მათთან და მანამდეც თუ იყო მათთან გაუგებრობა, თუ ეს პირველი შემთხვევაა?
- რაღაც წვრილმანი რეაქციები ყოფილა, მაგრამ, მე ვფიქრობ, რომ შიდა ქართლის რეგიონში, ალბათ, ერთ-ერთი ყველაზე წარმატებული პროცესი მიმდინარეობს და „ნაციონალური მოძრაობის“ წარმომადგენელს, გუბერნატორსა და თვითმმართველობებში ახლად მომრავლებულ „ქართული ოცნების“ ხალხს არ გვაქვს თანამშრომლობის პრობლემა.
ანუ რაღაცნაირად კოაბიტაცია შედგა?
- დიახ, რაღაცნაირად შედგა. რამდენიმე მაგალითი გვაქვს, როცა ჩემს მიერ ინიცირებული პროგრამები ოთხივე მუნიციპალიტეტის კონსენსუსით წამოვიწყეთ, საინვესტიციო განცხადებებიც გავაკეთეთ და მე მგონი, ერთადერთი გუბერნია ვართ, სადაც ასეთი რამ შევძელით. კიდევ არის კონკრეტული თანამშრომლობის სხვა მაგალითებიც. უბრალოდ, ძალიან მეწყინა, რომ როგორც ჩანს, ისინი დამორჩილდნენ რაღაცას. ეს ხომ არ არის მარტო ის, რომ „ხომ, კარგი, მოვალ“. ეს იყო ენთუზიაზმი და დაინტერესება და ამ დროს უკვე მეორე დღეს კაციშვილი არ მოდის. ეს სრულიად წარმოუდგენელია.
გორის მუნიციპალიტეტის გამგებელმა აღნიშნა, რომ მას რთული სამუშაო გრაფიკის გამო გადაავიწყდა შეხვედრაზე მისვლა. მის პასუხში რაიმე საეჭვოს ხედავთ?
- სიმართლე გითხრათ, ასეც რომ იყოს, მე მომერიდებოდა ამის თქმა. რას ჰქვია, გადამავიწყდა?! მე არ მომისმენია, უბრალოდ, მითხრეს, ასეთი რამ თქვაო, მაგრამ ეს რა განმარტებაა?! მაშინ დაერეკა და ეთქვა, დამავიწყდაო.
თქვენგან კატეგორიულად ხომ არ ჟღერს, როცა აცხადებთ, რომ ამ ადამიანებზე ზეწოლა განხორციელდა და ამიტომაც არ მოვიდნენ დაგეგმილ შეხვედრაზე?! საიდან იცით, რომ მათზე მართლაც განხორციელდებოდა ზეწოლა?
- მე არ მითქვამს, რომ ზეწოლის შესახებ ვიცი. უბრალოდ, ლოგიკურად ვმსჯელობ. ეს არ არის ეჭვი, ეს არის ჩემი დასკვნა. სრულიად დარწმუნებული ვარ, რასაც ვამბობ, ისიც ვიცი, რა მდგომარეობაცაა, ვიცი რა მაჟორიტარებისა და პოლიციის როლი, წარმომიდგენია, თუ რა მოხდა. თორემ, კონკრეტული ინფორმაცია არ მაქვს. თუ ახლა მათ ალიბით უნდათ ცხოვრება, ეს მათი არჩევანია, კი ბატონო, ასე იცხოვრონ.
ფიქრობთ, რომ ამ შემთხვევაში მათზე ზეწოლა სამართალდამცავთა მხრიდან განხორციელდა? ან, რომელიმე უწყებასთან მიმართებით ხომ არ გაქვთ ეჭვი?
- სხვადასხვა რაიონში სხვადასხვაგვარი სიტუაციაა, მაგალითად, კასპში უფრო მძლავრობს პოლიცია და მას ემორჩილებიან, სხვა რაიონში უფრო მძლავრობენ მაჟორიტარები. ერთგვაროვანი სიტუაცია არ გვაქვს.
ამის შემდეგ ხომ არ გაგიძნელდებათ მათთან ურთიერთობა?
- არ გამიჭირდება.
შესაძლოა, მათ კიდევ არ ისურვონ თქვეთან, როგორც გუბერნატორთან, დაგეგმილ შეხვედრაზე მოსვლა.
- მათი საქციელი ეს არის საქციელი ხალხის თვალში. ისინი სახლში არ იქცევიან ასე, არამედ ეს საზოგადოების თვალწინ ხდება. თუ ასე გააგრძელებენ, ეს მათი არჩევანია, მე რა გავაკეთო?
ამ ადამიანებს თქვენთან პარტიული თანაზიარობა არ აქვთ? თავის დროზე ისინი ნაციონალების მიერ არ იყვნენ დანიშნულნი?
- იქ არის რამდენიმე საკრებულოს თავმჯდომარე, რომელიც „ნაციონალურ მოძრაობას“ წარმოადგენს, მე მათგან კონკრეტული პასუხი ჯერ არ მომითხოვია და არც მიმიღია. ვიცით, როგორი სიტუაციაცაა. ვიღაცამ ვეღარ გაუძლო ზეწოლას. ეს არის რეალური პასუხი.
დღესდღეობით თვითმმართველობებში ძალიან რთული პროცესი მიმდინარეობს. 1-ელ ოქტომბერს „ქართული ოცნების“ საპარლამენტო გამარჯვების შემდეგ ხალხს ვერ გაუგია, ნაციონალები რატომ არიან რაიონებში წარმოდგენილნი და ეს გამარჯვება რატომ არ ვრცელდება რაიონებზეც? ესეც ხომ არ გახდა ამ გამგებლებისა და საკრებულოს თავმჯდომარეების მხრიდან შემაკავებელი ფაქტორი?
- კითხვის არსი ვერ გავიგე, რადგან „ქართულმა ოცნებამ“ გაიმარჯვა საპარლამენტო არჩევნებში.
ეს ცხადია, მაგრამ რაიონებში ხალხი სხვაგვარად მიიჩნევს, რომ ეს თვითმმართველობებზეც უნდა გავრცელებულიყო.
- მე არ მაქვს მათთან ცუდი ურთიერთობა, მოსახლეობასთან ურთიერთობის პრობლემა არ მაქვს. პირიქით, ძალიან კარგი ურთიერთობა და ხშირი კონტაქტებიც მაქვს. ორთვენახევარია იქ ვმუშაობ და რაც დრო გადის, უფრო და უფრო ღრმავდება ეს კონტაქტი მოსახლეობასთან. სულაც არ მაქვს პრობლემა, რომ იქ ვინმე მიპირისპირდება. აქ არ დგას საკითხი ასე, რომ ხალხი ვიღაცას სთხოვს, რომ ასეთნაირად მოიქცეს.
მოსახლეობა ელოდება იმას, რომ ეს ფესტივალი უნდა ჩატარდეს. ამის შესახებ უკვე ორ თვეზე მეტია ვსაუბრობ. მე მგონი, პირველსავე ინტერვიუში აღვნიშნე, რომ ამ გზით უნდა წავსულიყავით. საერთოდ, ფესტივალი არ არის გართობის ადგილი, ეს არის სხვადასხვა ტიპის მცირე ბიზნესების ერთმანეთთან შეხვედრის ადგილი.
ღვინის ფესტივალი ერთი საკითხია, მაგრამ ზოგადად, მეღვინეობის სფეროს დაწინაურება როგორ გესახებათ, როცა საზოგადოება აცხადებს, რომ რუსეთთან სავაჭრო ურთიერთობის აღდგენის გარეშე ეს ვერ მოგვარდება?
- ამას არანაირი შეხება ფესტივალთან არ აქვს.
მესმის, რომ ეს ფესტივალთან არანაირ შეხებაში არ არის, მაგრამ ზოგადად მაინტერესებს თქვენი აზრი, მხოლოდ შიდა ბაზარზე ხომ არ ჩავიკეტებით და ეს ხომ არ დარჩება მარტო ფესტივალი ფესტივალისთვის?
- რატომ, შიდა ბაზრის გარდა მხოლოდ რუსეთი არსებობს?
წლების მანძილზე ძირითადად რუსეთი იღებდა ჩვენს ღვინის ნაწარმს.
- არა, ჩემო კარგო. ციფრები რომ ნახოთ, მიხვდებით, რომ რუსეთის ბაზარი რომ დაიკეტა, ამან ქართულ მეღვინეობას ძალიან კარგი სამსახური გაუწია, რადგან ხარისხი ამაღლდა და ბევრი სხვა ბაზარი დავიკავეთ.
კერძოდ, რომელი ბაზარი? ალბათ, ახლა ჩინურ ბაზარზე აღარ გვაქვს საუბარი, ეს უკვე იუმორის თემად იქცა. სხვა რომელი ბაზარი ავითვისეთ?
- ძალიან ბევრ ბაზარზე გავიდა ქართული ღვინო. ბევრი მათგანი მახსენდება - უკრაინა, ბელორუსი, მოლდოვა, ამერიკა, ბალტიისპირეთი, პოლონეთი, ინგლისშიც მინახავს ქართული ღვინოები. რაც შეეხება ოჯახურ მარნებს, ამის უპირველესი სამიზნე არის სწორედ შიდა ბაზარი და მისი მრავალფეროვნება.
მაშინ საზოგადოება, თუნდაც იგივე გლეხები რატომ მიიჩნევენ და გამოკითხვის დროსაც რატომ აღნიშნავენ, რომ რუსეთთან დაახლოება იქნება გამოსავალი, თუნდაც სავაჭრო კუთხით და მეღვინეობის კუთხით, რაც ქართველი გლეხისთვის მტკივნეულია. უბრალო ხალხი თვლის, რომ არ საღდება მათი პროდუქცია. იმ ფონზე, როცა რუსეთთან დაახლოება ნიშნავს პრორუსული იარლიყის მიწებებას, როგორ გესახებათ ღვინის გატანა საქართველოდან? ცალკე მარტო დახურულად ხომ არ მოეწყობა ეს ღვინის ფესტივალები? ხომ არ ფიქრობთ, რომ ამ მხრივ მაინც აუცილებელია რუსეთთან ურთიერთობის აღდგენა?
_ ფესტივალსა და რუსეთს შორის რა კავშირს ხედავთ, ვერ გავიგე.
მე კავშირს ვერ ვხედავ და იმიტომაც გეუბნებით, რომ ფესტივალების თემა ცალკე საკითხია, მაგრამ ფესტივალი ფესტივალისთვის ხომ არ უნდა დარჩეს? უბრალოდ, მაინტერესებს თქვენი პოზიცია, როცა რუსეთთან დაახლოებას მოითხოვს საქართველოს მოსახლეობის გარკვეული ნაწილი, რაც ნაციონალების მხრიდან პრორუსულ ქმედებად აღიქმება და იარლიყიც მიწებებულია ამ მხრივ, თქვენ პირადად როგორ გესახებათ მეღვინეობის განვითარება რუსეთთან დაახლოების თუ დაშორების პირობებში? მიუხედავად იმისა, არის ეჭვები, რომ ნაციონალები თავადაც ცდილობდნენ დაახლოებას რუსეთთან, მაგრამ ეს არ გამოუვიდათ.
- ზოგადად მეკითხებით? რაც შეეხება საოჯახო მარნებისა და ტრადიციული მეღვინეობის განვითარებას, ასევე, არანაირი შეხება არ აქვს რუსეთთან ურთიერთობასთან. ერთადერთი, ის შეიძლება ვიგულისმოთ, რუსი ტურისტი რომ ჩამოვა, მასაც ისევე გაუხარდება ადგილობრივი ბაზრის მრავალფეროვნება, როგორც ფრანგ ან იაპონელ ტურისტს. მაღიზიანებს, როცა ოკუპანტთან ვაპირებთ დაახლოებას, რუსეთის ბაზარზე ქართული ღვინო შევა თუ არა, ამას მხოლოდ უარყოფითი გავლენა ექნება ქართულ მეღვინეობაზე, თორემ დადებითს არაფერს ველი. ეს მარტო მე კი არ უნდა მკითხოთ, არამედ - თვითონ ღვინის კომპანიებსაც, რაიმე სერიოზული გათვლა თუ აქვთ რუსეთის ბაზარზე?! მათ არანაირი გათვლა არ აქვთ. ეს ბაზარი თუ გაიხსნება, ისინი ღვინის გარკვეულ რაოდენობას შეუშვებენ, რომ მოსინჯონ, იმუშავებს თუ არა ეს ბაზარი. თუ არ იმუშავებს ეს ბაზარი, ამის გამო არავინ დაიღუპება. არის ასეთი მოსაზრებაც,- იმის გამო, რომ რუსეთის ბაზარი დიდია და ბევრი ტიპის პროდუქციას ითვისებს, შესაძლოა, გარკვეულწილად, ხარისხზე უარყოფითად იმოქმედოს. კიდევ უფრო დიდი რისკია, რომ თუ საქართველოდან შევა ათი ბოთლი ღვინო, ზუსტად იმავე ფორმის, ეტიკეტისა და ფერის ღვინო რუსეთში ჩამოისხმება. ეს ჩვენი მეღვინეობის პრესტიჟზე ცუდად იმოქმედებს. ასე რომ, ეს სერიოზულ რისკებთან დაკავშირებული ბაზარია.
შიდა ქართლის გუბერნატორთან ინტერვიუს შემდეგ ჩვენ დავინტერესდით, რატომ არ მივიდნენ გამგებლები და საკრებულოს თავმჯდომარეები მასთან შეხვედრაზე და დავუკავშირდით მეორე მხარესაც. გორის საკრებულოს თავმჯდომარე დავით რაზმაძე აცხადებს, რომ ანდრო ბარნოვს ძალიან დიდ პატივს სცემს, მაგრამ მისი შეფასება ყოველგვარ ზღვარს სცილდება.
დავით რაზმაძეს აინტერესებს, როგორ შეიძლება ასეთი რამის თქმა, თითქოს, მათზე ზეწოლა მოახდინეს?! უფრო მეტიც, იგი კითხულობს, ვისი ზეგავლენა უნდა იყოს საკრებულოს თავმჯდომარეზე?!
„ერთადერთი, ჩემზე ზეგავლენა შეიძლება მოახდინოს საკრებულომ და საკრებულოს წევრებმა, მე სხვა ზემდგომი არ მყავს. ანდრო ბარნოვის ერთ-ერთმა მოადგილემ დამირეკა და მაშინვე ვუთხარი, ძალიან დიდი სურვილი მაქვს, ეგ თემა ჩემთვის მიმზიდველია, მაგრამ შეიძლება, ვერ მომიხერხდეს მოსვლა, რადგან მთელი დღე საშინლად გადატვირთული მაქვს-თქო. მართლაც, მქონდა შეხვედრები, მოსახლეობასთან ცოტა დაძაბული სიტუაცია სხვადასხვა თემასთან დაკავშირებით. მინდოდა, ჩემი მოადგილე გამეგზავნა, მაგრამ აღარ მახსოვდა, რადგან სოციალური და ჯანდაცვის კომისიის სხდომა იყო დანიშნული. ამის გამო მის მოადგილეს ვეღარ დავუკავშირდი და დავურეკე მის ერთ-ერთ თანამშრომელს და ბოდიშიც მოვუხადე. ასე რომ, იცოდნენ, რომ შესაძლოა, ვერ მივსულიყავი. ანდრო ბარნოვთან არც პიროვნული დაპირისპირება არ მაქვს. უბრალოდ, გაკვირვებული ვარ მისი საკმაოდ არასერიოზული შეფასებით“, - გვითხრა დავით რაზმაძემ.
ქარელის მუნიციპალიტეტის გამგებელი ივანე ოსაძეც აცხადებს, რომ მანაც ანდრო ბარნოვის მოადგილე წინასწარ გააფრთხილა, რომ, სამწუხაროდ, ვერ მივიდოდა შეხვედრაზე, რადგან მათთან სოფლის მხარდაჭერის პროგრამა ხორციელდება და იგი ვალდებული იყო, დასწრებოდა ამ კრებებს. მით უფრო, რომ ხანდახან სამინისტროდანაც სრულიად მოულოდნელად ესტუმრებიან და ისინი რომც არ ჩავიდნენ, ვალდებულია, ადგილზე იყოს.
გარდა ამისა, ივანე ოსაძე აცხადებს, რომ ავლევის ტერიტორიულ ორგანოში დაგვიანებით მივიდა ნომინალური ბარათები, რომლებიც უნდა დაერიგებინათ და ამისთვის ორი სპეციალისტი უნდა დაენიშნა. უფრო მეტიც, მისი თქმით, მას ასეთი მეთოდი აქვს შემუშავებული, რომ ადგილზე დანიშნულ რწმუნებულს თავად აძლევს საშუალებას, თვითონ შეარჩიოს სპეციალისტები, თუმცა, ამ ადამიანების შესახებ ხალხსაც ეკითხება აზრს ამა თუ იმ კანდიდატურის შესახებ. ამიტომ ამ საქმეების გამო იგი გუბერნატორთან შეხვედრაზე ვერ მივიდოდა.
„მიუხედავად იმისა, რომ ეგ ბატონი, ზოგადი გაგებით, ჩემი კოლეგაა და, მეც გახლავართ მეცნიერებათა დოქტორი, ანდროც შორს არ არის ამ სფეროდან, უცნაურ განცხადებებს აკეთებს. ადრე გამოაცხადა, ქარელის მუნიციპალიტეტში მხოლოდ მიწების 4 %-ია მოხნულიო, თანაც, ეს ზუსტად მაშინ განაცხადა, როცა ჩვენთან მოხნული იყო მიწის 59 %. გამეცინა და არ გამოვეხმაურე. პირდაპირ გეტყვით, ასეთ სულელურ რეპლიკებზე კომენტარს არ ვაკეთებ. ეს ნაციონალების განწყობის ასახვაა და უფრო სერიოზული საქმეები მაქვს, ვიდრე რეალობას მოწყვეტილი რეპლიკებია. ბარნოვის მხრიდან ეს თავიდან ბოლომდე პოლიტიკური განცხადებაა, რაც ნაციონალების დამახასიათებელი ნიშანია“, - აღნიშნა ივანე ოსაძემ.
ჩვენ ოლეგ იაძესთანაც ვცადეთ დაკავშირება, თუმცა იგი ტელეფონს არ პასუხობდა.
