ევროპის სახალხო პარტიამ, მადრიდში მიმდინარე პარტიულ ყრილობაზე საქართველოს შესახებ რეზოლუცია მიიღო. დოკუმენტი - "დემოკრატიის უკუსვლა საქართველოში" პარტიის ოფიციალურ ვებგვერდზე გამოქვეყნდა.
რეზოლუციაში წერია, რომ ევროპის სახალხო პარტია ღრმა შეშფოთებას გამოთქვამს "მთავრობის მხარდაჭერილი კამპანიის გამო, რომელიც საქართველოს ყველაზე პოპულარული ტელეკომპანიის, "რუსთავი 2"-ის მფლობელობისა და სარედაქციო პოლიტიკის შეცვლისკენაა მიმართული, ასევე ქვეყანაში მედიის თავისუფლების, მათ შორის საარჩევნო პერიოდში პოლიტიკური თოქ-შოუების დახურვის გამო".
ევროპის სახალხო პარტია ასევე, შეშფოთებულია იმის გამო, რომ "კვლავ გრძელდება ოპოზიციის ლიდერთა პოლიტიკურად მოტივირებული დევნა და "რუსთავი 2"-ის მხარდაჭერთა წინასწარი დაკავებები".
პარტია გმობს გიგი უგულავას ხელმეორედ დაკავებას მას შემდეგ, რაც საქართველოს საკონსტიტუციო სასამართლომ უგულავას გახანგრძლივებული წინასწარი დაკავება "ანტიკონსტიტუციურ და უკანონო" ქმედებად ცნო.
პარტია გამოთქვამს შეშფოთებას იმის გამოც, რომ საქართველოს მართლმსაჯულების სისტემა ხელისუფლების ხელში პოლიტიკური ოპონენტების წინააღმდეგ ანგარიშსწორების იარაღი ხდება.
ევროპის სახალხო პარტია მოუწოდებს საქართველოს ხელისუფლებას, "პატივი სცეს სასამართლოს დამოუკიდებლობას და თავი შეიკავოს ნებისმიერი პოლიტიკური ინსტრუმენტალიზაციისგან, ნებისმიერი სახის შეზღუდვებისგან და სასამართლო გადაწყვეტილებებზე გავლენის მოხდენისგან".
ევროპის სახალხო პარტია ხაზს უსვამს, რომ ინფორმაციის მრავალფეროვნება, მედიის თავისუფლება, პოლიტიკური შეჯიბრი, კანონის უზენაესობა, სამართლიანობა და დემოკრატია - დემოკრატიული საზოგადოების მთავარი პრინციპები და ფასეულობებია, ასევე გასაღებია წარმატებული ევროპული ინტეგრაციისკენ.
რეზოლუციაში პარტია მოუწოდებს საქართველოს ხლისუფლებას, შეცვალოს ზემოთ ჩამოთვლილი ტენდენციები და ყურადღება ქვეყნის მომავალზე გაამახვილოს. პარტიაში მიიჩნევენ, რომ წინააღმდეგ შემთხვევაში ეს ტენდენცია "სერიოზულად დააზარალებს საქართველოს და მის პროგრესს ერების ევროპული ოჯახის გზაზე".
