საქართველოს ენერგეტიკის მინისტრის მოადგილეს, მარიამ ვალიშვილის სემეკ-ის წევრობა სურს. როგორც ვალიშვილმა "ინტერპრესნიუსს" განუცხადა, პრეზიდენტის ადმინისტრაციის მხრიდან განცხადებების მიღების პროცესი დაახლოებით ორი თვეა, დაიწყო.
ვალიშვილის თქმით, საჭიროდ ჩათვალა, რომ ამ შესაძლებლობით ესარგებლა, განცხადება შეიტანა და კონკურსში მონაწლეობის თაობაზე საკუთარი სურვილი დააფიქსირა.
"ენერგეტიკაში, რეფორმის თვალსაზრისით, ყველაზე მნიშვნელოვანი მიმართულება არის ის, რომ ენერგეტიკულ გაერთიანებაში გაწევრიანების ეტაპზე ვიმყოფებით. ეს მოლაპარაკებები მიმდინარეობს და, შესაბამისად, გვაქვს გარკვეული ხედვები ევროკავშირში ინტეგრაციასთან მიმართებაში იგივე მარეგულირებელი კანონმდებლობის დაახლოების თვალსაზრისით. ვფიქრობ, რომ მარეგულირებელ კომისიაში ძალიან სინტერესო სამუშაო იქნება განსახორციელებელი. ეს ის მიმართულებაა, რომელშიც მინდა გამოცდილება მივიღო. საჯარო და კერძო სექტორში მიმუშავია. მარეგულირებელი კომისია კი ის ორგანოა, სადაც გამოცდილება არ მაქვს. მინდა, რომ დაგროვილი პრაქტიკა და გამოცდილება ამ ეტაპზე მარეგულირებელ კომისიაში გამოვიყენო", - განაცხადა ვალიშვილმა, მრომელსაც სმეკი-ის წევრობის შემთხვევაში მინისტრის მოადგილის თანამდებობის დატოვა მოუწევს.
მისივე თქმით, პრეზიდენტის თავისი პრეროგატივის ფარგლებში, როგორც ამას კანონი მოითხოვს, კანდიდატურებს შეარჩევს, გარკვეულ კონსულტაციებს გაივლის, წარუდგენს მთავრობას და შემდეგ - უკვე პარლამენტს.
"ინტეპრესნიუსის" ინფორმაციით, პრეზიდენტის ადმინისტრაციაში 30-ზე მეტია განაცხადია შესული, მათ შორის, სემეკი-ის წევრობა ჯანდაცვის მინისტრის ყოფილ მოადგილეს გაიოზ თალაკვაძესაც სურს.
ენერგეტიკისა და წყალმომარაგების მარეგულირებელ ეროვნულ კომისია 5 წევრისგან შედგება, ამჟამად კომისიას 3 წევრი ჰყავს. ამასთან, ერთ-ერთ მათგანს უფლებსამოსილების ვადა ოქტომბერში ეწურება და თუ ამ პერიოდისთვის ახალი წევრი არ დამტკიცდა, კომისიას სხდომებს ვერ ჩაატარებს, რადგან ქვორუმი არ ექნება.
