საქართველოს პრეზიდენტი გიორგი მარგველაშვილი რუსული საჯარისო დანაყოფების მიერ საოკუპაციო ზოლის გადმოწევის საკითხზე დღეს ევროკავშირის სადამკვირვებლო მისიის ხელმძღვანელობას შეხვდება.
როგორც ჟურნალისტებს საგარეო ურთიერთობების საკითხებში საქართველოს პრეზიდენტის მრჩეველმა თენგიზ ფხალაძემ განუცხადა, შეხვედრაში მონაწილეობას მიიღებენ საქართველოს ნავთობისა და გაზის კორპორაციის წარმომადგენლებიც.
"საოკუპაციო ზოლის კიდევ ერთხელ გადმოწევა ყოვლად აღმაშფოთებელი პროვოკაციაა და საქართველოს პრეზიდენტი ამასთან დაკავშირებით გამოთქვამს ძალიან ღრმა შეშფოთებას. აღნიშნულის საწინააღმდეგოდ ძალიან მნიშვნელოვანია მოვახდინოთ მხარდაჭერის როგორც შიდა, ისე გარე რესურსების მობილიზაცია. სწორედ ამ მიზნით, დღეს, 16:00 საათზე საქართველოს პრეზიდენტს ექნება შეხვედრა ევროკავშირის მონიტორინგის მისიასთან, ასევე საქართველოს ნავთობისა და გაზის კორპორაციის წარმომადგენლებთან, რადგან იცით, რომ ბაქო-თბილისი-სუფსის მილსადენის გარკვეული ნაწილი მოექცა საოკუპაციო ზოლს იქეთ. შეხვედრას დაესწრება ასევე ეროვნული უშიშროების საბჭოს მდივანიც", - განაცხადა თენგიზ ფხალაძემ.
მისივე შეფასებით, აღნიშნული ინცინდენტი არ უკავშირდება მხოლოდ საქართველოს ტერიტორიული მთლიანობის პრობლემას, არამედ მას საკმაოდ დიდი უარყოფითი გავლენა შემოაქვს მთელ რეგიონში არსებულ უსაფრთხოების ვითარებაზე.
"ძალიან მნიშვნელოვანია, რომ მაქსიმალურად მოვახერხოთ საერთაშორისო მხარდაჭერის მობილიზება. ასევე მნიშვნელოვანია, რომ ორ გარემოებას გავუსვათ ხაზი. პირველი - ეს ინციდენტი არც ერთ შემთხვევაში არ უნდა იქნას განხილული როგორც ცალკე აღებული ერთეული პროვოკაცია. ჩვენ უნდა ვისაუბროთ პროცესზე, რომელიც, სამწუხაროდ, საკმაოდ დიდი ხნის განმავლობაში ხორციელდება საქართველოს, როგორც სუვერენული სახელმწიფოს წინააღმდეგ და მეორე- როდესაც ვსაუბრობთ ამ პროცესზე, ძალიან მნიშვნელოვანია დავინახოთ და სწორად გავიაზროთ, რატომ ხდება მსგავსი ინციდენტები სწორედ ქართულ-რუსული შეხვედრების მორიგი რაუნდის წინ, რადგან როცა რომელიმე მხარეს სურს რაღაც საკითხის მოგვარება, რთულად დასაშვებია, რომ ასეთ დროს ხორციელდებოდეს იმ ტიპის ქმედებები, რომელიც საკმაოდ ძაბავს სიტუაციას არა მხოლოდ ორ სახელმწიფოს შორის, არამედ ახდენს ვითარების ეკალაციას მთელ რეგიონში. ხაზს ვუსვამ, რომ ეს ინცინდენტი არ უკავშირდება მხოლოდ საქართველოს ტერიტორიული მთლიანობის პრობლემას, მას საკმაოდ დიდი უარყოფითი გავლენა შემოაქვს მთელ რეგიონში არსებულ უსაფრთხოების ვითარებაზე”- აღნიშნა საქართველოს პრეზიდენტის მრჩეველმა.
