თბილისის მერის, დავით ნარმანიას ინფორმაციით, 13-14 ივნისის სტიქიის შედეგად დაზარალებულ ფიზიკურ პირთა ზიანის ასანაზღაურებლად 18 მილიონ ლარამდე არის საჭირო.
როგორც ნარმანიამ ჟურნალისტებს განუცხადა, თანხების მობილიზება ამ ეტაპზეც მიმდინარეობს და ანგარიშზე თანხები ყოველდღიურად ირიცხება, როგორც ფიზიკური, ასევე იურიდიული პირებისგან.
"დაახლოებით 18 მილიონ ლარამდე არის საჭირო იმისთვის, რომ ფიზიკურ პირებთან დაკავშირებული ზიანის ანაზღაურება მოხდეს იმ წესების საფუძველზე, რომელიც თბილისის საკრებულომ დაამტკიცა. გარდა ამისა, მეორე ნაწილი არის საჯარო ინფრასტრუქტურის აღდგენის ხარჯები, რისთვისაც ჩვენ 10 მილიონ ლარზე მეტი უკვე მივიღეთ. ფინანსთა სამინისტროსთან ერთად ვმუშაობთ დამატებით დაფინანსებაზე", - განაცხადა დავით ნარმანიამ.
დედაქალაქის მერის თქმით, სტიქიის შედეგების სალიკვიდაციო სამუშაოების გარკვეული ნაწილი უკვე დაწყებულია იმ ფინანსების ფარგლებში, რაც ამ დროისთვის არსებობს.
