ერევანში პოლიციამ დემონსტრანტების მიერ აგებული ბარიკადების აღება დაიწყო. ამის შესახებ "ბიბისი" იტყობინება. გავრცელებული ცნობით, პოლიციამ აქციის მონაწილეეებს ბაგრამიანის გამზირის დატოვებისკენ მოუწოდა. მათ ამისთვის დრო 12:30 საათამდე ჰქონდათ, თუმცა, დემონსტრანტები სამართალდამცველების ბრძანებას არ დაემორჩილნენ, რის გამოც ადგილზე პოლიციის რაზმები გამოჩნდა.
"სომხეთის პოლიცია ემზადება ბაგრამიანის გამზირზე მოძრაობის აღდგენისთვის, რომელიც ორი კვირაა შეფერხებულია. იგეგმება გამზირის ბარიკადებისგან გაწმენდა", - ნათქვამია პოლიციის განცხადებაში.
საპასუხოდ დემონსტრანტებმა განაცხადეს, რომ მათ გადაწყვეტილების მისაღებად საღამომდე სჭირდებათ დრო. მანამდე კი მათ აღნიშნეს, რომ თუ დღეს 21:00 საათამდე მთავრობა მათ ერთ მოთხოვნას მაინც არ დააკმაყოფილებს, ისინი საპროტესტო აქციებს გააძლიერებენ.
დემონსტრანტები ელექტროენერგიის ტარიფის გაზრდას უკვე ორი კვირაა აპროტესტებენ.
