"ქართული ოცნება-დემოკრატიული საქართველოს" პოლიტსაბჭო საარჩევნო კოდექსში ცვლილებებზე და პარტიის სტრუქტურული რეორგანიზაციის საკითხებზე მსჯელობას სავარაუდოდ, მომავალ კვირას გააგრძელებს, - ამის შესახებ ჟურნალისტებს პოლიტსაბჭოს დღევანდელი სხდომის დასრულების შემდეგ დეპუტატმა ზვიად კვაჭანტირაძემ განუცხადა.
მისი თქმით, საზოგადოებისთვის პარტიის ერთიანი გადაწყვეტილების შესახებ გახდება ცნობილი.
"დღეს, პოლიტსაბჭოს სხდომის ერთ-ერთი მთავარი თემა იყო საარჩევნო კოდექსში შესაძლო ცვლილებები. ყველა ვთანხმდებით, რომ საკონსტიტუციო სასამართლოს გადაწყვეტილება უნდა შესრულდეს, სხვა ვარიანტი არ არსებობს. მაგრამ ძალიან მნიშვნელოვანია იმის ხაზგასმა, რომ სასამართლოს მოთხოვნას ჩვენ თავიდანვე ვიზიარებდით, შემდგომ პერსპექტივებზე არსებობს სხვადასხვა მოსაზრებები და პარტიულ პოზიციას საარჩევნო მოდელთან დაკავშირებით, სამომავლოდ შევათანხმებთ. ყველაფერს გავაკეთებთ, რომ ეს მოდელი ყველასთვის მისაღები იყოს, - განაცხადა ზვიად კვაჭანტირაძემ.
პოლიტსაბჭოს სხდომის დასრულების შემდეგ პარტიის სტრუქტურულ ცვლილებებთან დაკავშირებით განმარტება გააკეთა ადამიანის უფლებების დაცვის კომიტეტის თავმჯდომარემ ეკა ბესელიამ.
როგორც მან აღნიშნა, სტრუქტურული ცვლილებები მიმდინარეობს პარტიის მუშაობის პრინციპთან დაკავშირებით.
"არსებობს პარტიული შიდა მართვის ახალი მოდელი, რომლის ფარგლებში რეგიონულ ორგანიზაციებთან თანამშრომლობის პრინციპი იცვლება. მიმდინარეობს შიდაპარტიული განახლების პროცესი, რაც რამდენიმე თვეა დავიწყეთ და ამ პროცესს ვაგრძელებთ", - განაცხადა ეკა ბესელიამ.
მინისტრთა კაბინეტის წევრებს, რომლებიც დღეს პოლიტსაბჭოს სხდომას ესწრებოდნენ, შეხვედრის დასრულების შემდეგ კომენტარი არ გაუკეთებიათ.
