საქართველოს პრეზიდენტმა გიორგი მარგველაშვილმა და პირველმა ლედიმ მაკა ჩიჩუამ ავსტრიის პრეზიდენტის ჰაინც ფიშერის და მარგიტ ფიშერის პატივსაცემად სახელმწიფო სადილი გამართეს.
გიორგი მარგველაშვილმა და ჰაინც ფიშერმა ორი ქვეყნის მეგობრობის სადღეგრძელო შესვეს და ხალხთა შორის მეგობრობაზე ისაუბრეს.
როგორც საქართველოს პრეზიდენტმა აღნიშნა, ავსტრიული კულტურა, ლიტერატურა, მუსიკა და ხელოვნება საქართველოში უაღრესად პოპულარულია. თუმცა გარდა ისტორიული და კულტურული კავშირებისა, საქართველოსა და ავსტრიას საერთო ინტერესები და ღირებულებები აერთიანებთ:
„საქართველო მტკიცედ მიიწევს დიდ ევროპულ ოჯახში საბოლოო დამკვიდრებისაკენ. მინდა ვისარგებლო შემთხვევით და მადლობა გადაგიხადოთ საქართველოს ტერიტორიული მთლიანობის, არაღიარების პოლიტიკისა და ევროპული ინტეგრაციის პროცესში გაწეული მტკიცე მხარდაჭერისათვის. ავსტრია 2017 წელს ეუთოს თავმჯდომარე ქვეყანა ხდება. თქვენ წარმოადგენთ იმ ქვეყანას, რომელმაც კარგად იცის მშვიდობის ფასი და ამიტომაც იმედი მაქვს, რომ თქვენი ძალისხმევა ხელს შეუწყობს თანამედროვეობის უმნიშვნელოვანესი გამოწვევების გადალახვას და იმ კონსენსუსის მიღწევას, რამაც ევროპის კონტინენტი მშვიდობის, თანამშრომლობისა და განვითარების სივრცედ უნდა აქციოს.“-განაცხადა საქართველოს პრეზიდენტმა.
ჰაინც ფიშერმა ავსტრიასა და საქართველოს შორის არსებულ კულტურულ და ეკონომიკურ ურთიერთობებზე ისაუბრა, ასევე საქართველოს ევროპულ არჩევანზე : „ავსტრია მხარს უჭერს საქართველოს ევროკავშირში ინტეგრაციის გზაზე. ასოცირების შეთანხმება უმნიშვნელოვანესი ნაბიჯია, რამაც ხელი შეუწყო საქართველოს სავაჭრო-ეკონომიკური ურთიერთობების განვითარებას. საქართველომ აირჩია რეფორმების განხორციელების არც თუ იოლი გზა. ღრმად ვარ დარწმუნებული, რომ საქართველო კიდევ უფრო გაძლიერდება ამ აუცილებელი რეფორმების პროცესის დასრულების შემდეგ. საქართველომ გამოიჩინა დიდი ძალისხმევა ევროკავშირთან ვიზალიბერალიზაციის შეთანხმების პირობების შესასრულებლად. ყველა ტექნიკური შეფასება ადასტურებს საქართველოს კომპეტენტურ ორგანოების მიერ პირობების ეფექტურად შესრულებას. ვიმედოვნებ, რომ რიგის 20-21 მაისის სამიტი ამას გაითვალისწინებს“-განაცხადა ავსტრიის პრეზიდენტმა.
საქართველოს პრეზიდენტმა ავსტრიელ კოლეგას მადლობა გადაუხადა საქართველოში სტუმრობისთვის, ხოლო თავის მხრივ ჰაინც ფიშერმა იმედი გამოთქვა, რომ ამ ვიზიტით ქვეყნებს შორის ურთიერთობები კიდევ უფრო გაღრმავდება.
სახელმწიფო სადილს საქართველოს და ავსტრიის რესპუბლიკის დელეგაციებიც დაესწრნენ. შესრულდა საქართველოს და ავსტრიის რესპუბლიკის სახელმწიფო ჰიმნები.
