თურქული მედიის ცნობით, მემარცხენე რადიკალური მარქსისტული დაჯგუფების წევრებმა ერთ-ერთი პროკურორი საკუთარ ოფისში მძევლად აიყვანეს. შეიარაღებულმა მამაკცებმა ის პროკურორი დაატყვევეს, რომელიც 2013 წლის ანტისამთავრობო გამოსვლების დროს დაღუპული თინეიჯერის მკვლელობის საქმეს იძიებდა. შეიარაღებული პირები ახალგაზრდის მკვლელობაში დამნაშავე პოლიციელების დასჯას ითხოვენ. სოციალურ ქსელ "ტვიტერში" გავრცელდა ფოტოები, სადაც ჩანს, თუ როგორ ემუქრებიან იარაღით უცნობი მამაკაცები პროკურორს.
ამ დროისათვის პროკურორის ოფისის გარშემო პოლიციაა მობილიზებული, ოფისის თანამშრომლები ევაკუირებულია.
15 წლის ბერკინ ელვანი, 2013 წელს, სტამბოლში გამართული მასობრივი დემონსტრაციის დროს მოკლეს. მას ცრემლსადენი გაზის ავზი მოხვდა თავში, რის შედეგადაც ის 9 თვის განმავლობაში კომაში იყო, 2014 წლის მარტში კი გარდაიცვალა. მის გარდაცვალებას თურქეთში ახალი საპროტესტო ტალღა მოჰყვა. დაღუპულის მშობლები დამნაშავე პოლიციელის დასჯას ითხოვნდნენ, თუმცა, ამ დრომდე არასრულწლოვანის მკვლელობის გამო არავინ დაუსჯიათ.
