საქართველოს პრეზიდენტის ყოველწლიურ გამოსვლაზე მთავრობის მიწვევა არის ტრადიცია, რომელიც ახალი კონსტიტუციური მოდელის პირობებშიც უნდა გაგრძელდეს, - ამის შესახებ ჟურნალისტებს პრეზიდენტის საპარლამენტო მდივანმა გიორგი კვერენჩხილაძემ განუცხადა.
მისივე განმარტებით, პრეზიდენტის მოხსენებაზე დასწრება-არდასწრების საკითხი საკანონმდებლო დონეზე არ რეგულირდება, თუმცა მასზე მთავრობის წარმოდგენა ინსტიტუციებს შორის თანამშრომლობისა და პატივისცემის გამოხატულება იქნებოდა.
"ჩვენ მივიჩნევთ, რომ პარლამენტის მხრიდან აღმასრულებელი, სასამართლო ხელისუფლების თუ სხვა ინსტიტუციების წარმომადგენლების მოწვევა პრეზიდენტის ყოველწლიურ მოხსენებაზე დასასწრებად, იქნება ინსტიტუციური პატივისცემის გამოვლინება აღმასრულებელი და სასამართლო ხელისუფლებისადმი. იმისთვის, რომ ესა თუ ის ინსტიტუცია წარმოდგენილი იყოს ყოველწლიური მოხსენების განხილვის ფორმატში, ჯერ ისინი უნდა იყვნენ მოწვეულნი და ამის შემდგომ თავად მიიღებენ გადაწყვეტილებას, დაესწრებიან თუ არ დაესწრებიან",-აღნიშნა საპარლამენტო მდივანმა.
რაც შეეხება საკითხს, რომ ქვეყანაში ახალი კონსტიტუციური მოდელია, კვერენჩიხლაძის აზრით, ამას არავითარი კავშირი არ აქვს დასწრება-არდასწრებასთან.
"იყო საუბრები იმაზეც, რომ რეგლამენტით არ აქვს პარლამენტს ვალდებულება, პრეზიდენტის ყოველწლიურ მოხსენებაზე ვინმე მოიწვიოს. რა თქმა უნდა, ასეთი საკითხები ამ 20 წლის განმავლობაში, რაც კონსტიტუცია არსებობს, არასდროს ყოფილა საკანონმდებლო დონეზე დარეგულირებული, მაგრამ, ჩვენ ვთვლით, რომ ეს არის ტრადიცია, რომელიც არსებობდა სახელმწიფოში და, რომელიც ახალ ქართულ რეალობასა და ახალ კონსტიტუციურ მოდელშიც უნდა გაგრძელდეს. შესაბამისად, ინსტიტუციური თანამშრომლობის, ინსტიტუციებს შორის პატივისცემის და საბოლოო ჯამში, ხელისუფლების ერთიანობის პრინციპიდან გამომდინარე, მივიჩნიეთ, რომ მთავრობის დასწრება იქნებოდა მიზანშეწონილი მოხსენების დროს, თუმცა გადაწყვეტილებას თავად მიიღებენ", - განაცხადა კვერენჩხილაძემ.
რაც შეეხება პრეზიდენტის გამოსვლის ფორმატს, საპარლამენტო მდივნის თქმით, ამ საკითხზე გადაწყვეტილება პარლამენტმა უნდა მიიღოს, ისინი კი ნებისმიერ ფოტმატში მონაწილეობისთვის მზად არიან.
"ჩვენს მიერ არაერთხელ გამოითქვა მზადყოფნა ნებისმიერ ფორმატში, მათ შორის პოლიტიკურ დებატებში მონაწილეობასთან დაკავშირებით. ფორმატის საკითხი პარლამენტის გადასაწყვეტია და ჩვენ პატივს ვცემთ მის დისკრეციულ უფლებას. შესაბამისად, ჩვენ მზად ვიქნებით იმ ფორმატისთვის, რომელსაც საკანონმდებლო ორგანო გადაწყვეტს", - აღნიშნა პრეზიდენტის საპარლამენტო მდივანმა.
