უკრაინული გამოცემა "კიევპოსტი" უკრაინის მთავრობაში მყოფი ყოფილი ქართველი მაღალჩინოსნების შესახებ სტატიას აქვეყნებს.
სტატიის ავტორის თქმით, ქართველები უკრაინის მთავრობაში უკრაინელების შემდეგ რაოდენობით რიგით მეორე ადგილას დგანან. სტატიაში ნახსენებია, ყველა ის ქართველი, რომელიც უკრაინის ხელისუფლების წევრი გახდა.
"მათი უმრავლესობა 2004-2013 წლებში საქართველოს მთავრობაში წამყვან პოზიციებს იკავებდა. ახლად დანიშნული პირები იმედოვნებენ, რომ ისინი უკრაინაშიც იმ წარმატებას გაიმეორებენ, რასაც საქართველოში მიაღწიეს", - წერია სტატიაში.
ყოფილი ქართველი მაღალჩინოსნების თქმით, უკრაინაში დაგეგმილი რეფორმები იქნება ნაკლებად რადიკალური და უფრო მდგრადი და გრძელვადიანი.
სტატიაში საუბარია გია გეწაძეზე, რომელიც უკრაინის ჯანდაცვის მინისტრის მოადგილედ დაინიშნა. ანალოგიურ თანამდებობას გეწაძე საქართველოში 2004 წელს იკავებდა. მასთან ერთად უკრაინის ჯანდაცვის სისტემის რეფორმირების კუთხით კიდევ სამი ქართველი მუშაობს, მათ შორის საქართველოს იუსტიციის მინისტრის ყოფილი მოადგილე, ჯაბა ებანოიძე, საქართველოს სახელმწიფო სარეგისტრაციო სამსახურის ყოფილი მაღალჩინოსანი, გიორგი წიკლაური და აღსრულების ეროვნული ბიუროს იურიდიული სამსახურის ყოფილი ხელმძღვანელი, ხატია შელია.
"ზოგიერთი ქართველი მაღალჩინოსანი, უკვე სამი თვეა უკრაინის მთავრობაშია, მათ შორისაა ეკა ზღულაძე, რომელიც დეკემბერში შინაგან საქმეთა მინისტრის მოადგილედ დაინიშნა. ასევე ჯანდაცვის მინისტრაც ალექსანდრე კვიტაშვილი, რომელსაც სურს ფარმაცევტული პროდუქციის შესყიდვის შესახებ ახალი კანონმდებლობის მიღება. მან ასევე შეიმუშავა კანონპროექტი, რომელიც ფარმაცევტული პროდუქციის რეგისტრაციის პროცესს გაამარტივებს", - აღნიშნულია სტატიაში.
სტატიაში ასევე საუბარია დავით საყვარელიძეზე, რომელიც უკრაინის გენერალური პროკურორის მოადგილედ დაინიშნა. "მიუხედავად იმისა, რომ ბევრი მიესალმება ქართველების დანიშვნას და ზოგიერთი უკმაყოფილებას გამოხატავს. ზოგიერთი ნაციონალისტი მაგალითად მემარჯვენე სექტორის ლიდერი, დმიტრო იაროში აცხადებს, რომ ეს ადგილები შესაძლოა უკრაინელებს დაეკავებინათ", - წერია სტატიაში.
ჟურნალისტი ასევე აღნიშნავს, რომ უკრაინაში ყოფილი ქართველი მაღალჩინოსნების დანიშვნას საქართველოს ამჟამინდელი მთავრობაც აკრიტიკებს.
"ორ ქართველზე, სააკაშვილსა და ზურაბ ადეიშვილზე საქართველოს პროკურატურამ ძებნა გამოაცხადა", - აღნიშნავს სტატიის ავტორი.
