"ნაციონალური მოძრაობის" ერთ-ერთი ლიდერი ნუგზარ წიკლაური მიიჩნევს, რომ პრემიერ-მინისტრ ირაკლი ღარიბაშვილსა და რეგიონის წარმომადგენლებს შორის შეხვედრა 21 მარტს ხელისუფლების წინააღმდეგ დაგეგმილ აქციას უკავშირდებოდა.
როგორც პარლამენტის პლენარულ სხდომაზე ნუგზარ წიკლაურმა განაცხადა, რაც ზუგდიდში რამდენიმე დღის წინ მოხდა, ხელისუფლების უუნარობაზე მიუთითებს.
"რამდენიმე დღის წინ პრემიერ-მინისტრ ირაკლი ღარიბაშვილთან შედგა გაფართოებული შეხვედრა, რეგიონების წარმომადგენლებთან, მაშინვე გაჩნდა ეჭვი, რომ ეს უკავშირდებოდა 21 მარტს დაგეგმილ აქცია ხელისუფლების უუნარობის წინააღმდეგ. შეხვედრის მონაწილეებმა აღნიშნეს, რომ ინფრასტრუქტურულ პროექტებზე ისაუბრეს, მაგრამ ორიოდე დღის შემდეგ ვნახეთ, აღმოჩნდა, რომ საუბარი იყო არა რეგიონის განვითარებაზე, არამედ ზონდერ ჯგუფების შექმნაზე. კრიმინალური მენტალიტეტის ადამიანი ხელკეტებით ხელში, აი, ეს იყო რეგიონების წარმომადგენლებთან ღარიბაშვილის შეხვედრის შედეგი", - აღნიშნა დეპუტატმა.
მისი თქმით, ზუგდიდში ადგილობრივი ხელისუფლების 46 წარმომადგენელი, გუბერნატორის მოადგილე, საკრებულოს წევრები, საკრებულოს თავმჯდომარე და გამგებელი, იქაური კომისარი, ხელკეტებით შეიარაღებული ოპოზიციას დასდევა ქუჩაში და იჭრებოდა არასამთავრობო ორგანიზაციების ოფისებში.
"ეს ყველაფერი სხვა არაფერია, თუ არა გერმანელი ნაცისტების თავდასხმები ოპოზციიურ ძალებზე, ამის გარდა შუძლებელია, რამე გაგახსენდეს. ამ ხელისუფლების სახე ჩვენ ადრეც გვინახავს, დაქირავებული სადღობელაშვილის სახით, რომელსაც "პაჩებნიკების" ჩადებას პოლიცია ასწავლის. რაც ხელისუფლებამ იკადრა რამდენიმე დღის წინ სამეგრელოში, პატარა ბავშვები მოტყუებით მიიყვანა კინოჩვენებაზე, ამის შემდეგ ხელისუფლების მორალურ სახეზე საუბარი არ შეიძლება. ეს არის "ქართული ოცნების" ხელისუფლების განაჩენი", - განაცხადა ნუგზარ წიკლაურმა.
