საქართველოს პარლამენტის თავმჯდომარე დავით უსუფაშვილი მოსკოვსა და ე.წ. სამხრეთ ოსეთის დე-ფაქტო მთავრობას შორის "მოკავშირეობისა და ინტეგრაციის შესახებ" დაგეგმილი ე.წ. ხელშეკრულების გაფორმებას ბათილად და იურიდიული ძალის არმქონე ხელშეკრულებად მიიჩნევს, - ამის შესახებ უსუფაშვილმა ჟურნალისტებთან საუბრისას განაცხადა.
"ამ თვალსაზრისით ყველაფერი ნათელია. ამაზე ცივილიზებული მსოფლიო შეთანხმებულია. ამასობაში ეს არის აგრესიული ნაბიჯი მოსკოვის მხრიდან საქართველოს წინააღმდეგ. ამაზეც არაერთხელ განვაცხადეთ. ამიტომ ხვალ მოაწერენ ხელს, მაზეგ თუ ერთი კვირის წინ მოაწერდნენ, ამით არაფერი იცვლება. ყველა საერთაშორისო ორგანიზაციაში, ყველა დემოკრატიული ქვეყნის მთავრობაში ამის თაობაზე ჩვენგან ინფორმაცია მიტანილია. მათ გამოხატული აქვთ პოზიციები", - აღნიშნა პარლამენტის თავმჯდომარემ.