უკრაინამდე იყო საქართველო, მაშინ რომ მეტი ყურადღება ყოფილიყო საერთაშორისო თანამეგობრობის მხრიდან, უკრაინის კრიზისი არ იქნებოდა ,- ამის შესახებ საქართველოს პრემიერ-მინისტრმა ირაკლი ღარიბაშვილმა მიუნხენის 51-ე უსაფრთხოების კონფერენციაზე სიტყვით გამოსვლისას განაცხადა.
საქართველოს მთავრობის მეთაურმა მონაწილეობა მიიღო სესიაში: "უკრაინის მიღმა - გადაუჭრელი კონფლიქტები ევროპაში".
როგორც პრემიერმა აღნიშნა, 2008 წლის აგვისტოს მოვლენების დროს რუსეთის წინააღმდეგ სანქციების დაწესებით უკრაინის კრიზისის თავიდან აცილება შეიძლებოდა. ამასთან, ირაკლი ღარიბაშვილი მიესალმება ანგელა მერკელისა და ფრანსუა ოლანდის ვიზიტს მოსკოვში და მათ ძალისხმევას კონფლიქტის მოლაპარაკებების გზით გადაჭრის შესახებ.
გარდა ამისა, სიტყვით გამოსვლისას პრემიერ-მინისტრმა ქართულ-რუსულ ურთიერთობებზეც ისაუბრა და აღნიშნა, რომ რუსეთთან დიალოგის აღდგენა ყოფილი პრემიერის, ბიძინა ივანიშვილის ინიციატივა იყო. მისივე თქმით, საქართველომ კონსტრუქციული ნაბიჯები გადადგა, რასაც რუსეთის მხრიდან ადეკვატური პასუხი არ მოჰყოლია.
საერთაშორისო ფორუმის ტრიბუნიდან ირაკლი ღარიბაშვილმა ასევე შეშფოთება გამოხატა საქართველოს ოკუპირებულ ტერიტორიებზე არსებულ ვითარებასთან დაკავშირებით და კიდევ ერთხელ დაგმო რუსეთის მიერ აფხაზეთისა და ცხინვალის დე-ფაქტო ხელისუფლებებთან ე.წ მოკავშირეობის შესახებ ხელშეკრულების გაფორმება. პრემიერმა დარწმუნებით აღნიშნა, რომ აფხაზეთსა და ე.წ სამხრეთ ოსეთს საქართველოს გარეშე მომავალი არ გააჩნიათ.
