ხაზგასმით ვამბობ, რომ ვახტანგ გომელაური არის საუკეთესო კანდიდატურა, რომელიც შეიძლებოდა შს მინისტრად დანიშნულიყო, - ამის შესახებ საპარლამენტო უმრავლესობის ლიდერმა დავით საგანელიძემ განაცხადა.
"ჩემთვის ბატონი გომელაური ორი საათის გაცნობილი ადამიანი არ არის. მას ვიცნობ იმ დღიდან, როდესაც "ქართული ოცნება" ჩემთვის გახდა ის პოლიტიკური ძალა, სადაც მე ვარ ამჟამად და მიმაჩნია, რომ ეს არის საუკეთესო კანდიდატურა, რომელიც შეიძლებოდა დანიშნულიყო შს მინისტრის პოსტზე. ამას ხაზგასმით ვამბობ, თავისი განათლებით, ღირსებით, პატიოსნებით, წესიერებით, რეფორმატული სულით, საქმისადმი ერთგულებით, რადგან ამ საქმეს ერთგულება და საქმის სიყვარული სჭირდება, მუნდირის პატივისცემა სჭირდება და ძალიან ღირსეული უნდა იყო. ჩემთვის ასეთია ბატონი მინისტრი და მიმაჩნია, რომ გომელაური იქნება მართლაც ერთ-ერთი საუკეთესო მინისტრი ამ თანამდებობაზე, ვინც გვინახავს", - განაცხადა საგანელიძემ.
რაც შეეხება ოპოზიციის ნაწილის განცხადებას, რომ ვახტანგ გომელაური შს მინისტრად იმიტომ დაინიშნა, რომ ის ყოფილი პრემიერის ბიძინა ივანიშვილის დაცვის უფროსი იყო, დავით საგანელიძის თქმით, ვახტანგ გომელაურს სხვა ვერაფერი მოუძებნეს და ეს რაც მოუძებნეს, ძალიან კარგია.
"აბა რა უნდა თქვან, სხვა ვერაფერი მოუძებნეს და ეს მე მგონი, ყველაზე კარგი რაღაც მოუძებნეს, რადგან ბიძინა ივანიშვილთან სამსახური ნიშნავს, რომ გამოცდილებაც მეტი ექნება, ღირსეული მუშაობაც კარგად ეცოდინება და წესიერების ფარგლებშიც იქნება ძალიან კარგი. წინააღმდეგ შემთხვევაში, ბიძინა ივანიშვილი თავის დაცვის სამსახურში სხვანაირ ადამიანს არ აიყვანდა", - განაცხადა დავით საგანელიძემ.
