სასამართლო პროცესზე საქართველოს ყოფილი პრემიერ-მინისტრის ზურაბ ჟვანიას დაცვის ყოფილმა უფროსმა კობა ხარშილაძემ განაცხადა, რომ ზურაბ ჟვანიამ ტუჩთან დაზიანება მაშინ მიიღო, როდესაც ხელოვნურ სუნთქვას უტარებდა.
ხარჩილაძის განცხადებით, როდესაც იმ ბინაში შევიდა, სადაც ზურაბ ჟვანია გარდაიცვალა, ყოფილ პრემიერ-მინისტრს არანაირი დაზიანება არ ჰქონია.
„შიგნით შევედი ფანჯრის გისოსების გამოგლეჯვის შემდეგ, რადგან კარი იყო ურდულით ჩაკეტილი და გასაღებით მას ვერ გავაღებდი. როდესაც შიგნით შევედი, ზურაბ ჟვანია უგონო მდგომარეობაში იჯდა სავარძელში. არც შეხებაზე და არც ყვირილზე რეაგირება არ ჰქონია და არანაირი სიცოცხლის ნიშანწყალი არ ეტყობოდა, არც პულსი არ ესინჯებოდა. ამის შემდეგ გადმოვაწვინე იატაკზე და გადავწყვიტე, ჩამეტარებინა ხელოვნური სუნთქვა. ხელოვნურმა სუნთქვამ შედეგი არ გამოიღო და მივხვდი, რომ გარდაცვლილი იყო, რის შესახებაც ვუთხარი მიხეილ ძაძამიასაც. პრემიერი გარეგნულად დავათვალიერე და მას არანაირი დაზიანება არ ჰქონდა. ასევე არ ჰქონდა დაზიანება უსუპოვსაც. ტუჩთან დაზიანება ზურაბ ჟვანიამ მას შემდეგ მიიღო, რაც ხელოვნურ სუნთქვას ვუტარებდი. მას ასევე არანაირი სისხლის ლაქა არ ჰქონდა", - განაცხადა კობა ხარშილაძემ.
მისივე თქმით, ბინაში, სადაც ჟვანია და უსუპოვი გარდაიცვალნენ, საკმაოდ არაორდინარული სიტუაცია იყო და ამ სიტუაციის გამოსასწორებლად გადაწყვიტა, უსუპოვი შემთხვევის ადგილიდან მოეშორებინა.
„უსუპოვი პრემიერისგან მოშორებით ეგდო, იყო არაორდინარული სიტუაცია და ამ სიტუაციის გამოსასწორებლად, მოვიფიქრე შემდეგი გეგმა: რაულ უსუპოვის ცხედარი მე და მიხეილ ძაძამიამ გავიტანეთ ბინიდან და ჩავდეთ მანქანაში. როდესაც მანქანაში ჩავსხედით, შემდეგ მივხდი, რომ ეს იყო აბსურდული გეგმა და ცხედარი ისევ უკან შევიტანეთ. დავაწვინეთ იმავე ადგილზე და იმავე მდგომარეობაში, როგორც იყო. ფეხსაცმელი, სავარაუდოდ, ამ გატანის დროს გაძვრა და ასევე შარვალიც, სავარაუდოდ, ამ დროს დაესვარა", - განაცხადა ხარშილაძემ.
მისივე თქმით, მომხდარის შემდეგ მიღებული გადაწყვეტილება იყო გიორგი ბარამიძესთან დარეკვა და ამბის შეტყობინება. ხარშილაძემ ასევე გაიხსენა, თუ თავად როგორ შეიტყო ეს ამბავი და როგორ მივიდა შემთხვევის ადგილზე.
„მე ვიყავი სახლში. დამირეკა მიხეილ ძაძამიამ და მითხრა, რომ ზურა იყო უგონო მდგომარეობაში. გავემართე შემთხვევის ადგილზე, თუმცა, გზაზე მანქანა გამიფუჭდა. ამის შემდეგ ბინიდან მოშორებით მომაკითხა ძაძამიამ და შემთხვევის ადგილზე მიმიყვანა. როდესაც მივედი, ფანჯრიდან დავინახე, რომ ბატონი პრემიერი უგონოდ გამოიყურებოდა. ვერ გავაღეთ კარი, შემდეგ ავძვერი გისოსებზე და ძაძამიას დახმარებით მოვაგლიჯე ეს გისოსები და შევედი ბინაში", - აღნიშნა ხარშილაძემ.
დღევანდელ პროცესზე დაიკითხა ზურაბ ჟვანიას დაცვის კიდევ ორი წევრი - დავით დაღელაშვილი და ალექსანდრე გოგოხია. აღნიშნული მოწმეები დაცვის მხარემ წარმოადგინა.
შემდეგი სასამართლო პროცესი 2 თებერვალს, 17:00 საათზე, გაიმართება, სადაც მიხეილ ძაძამიას და დაცვის სხვა წევრებს დაჰკითხავენ.