უკრაინაში რუსეთის ქმედებებმა მსოფლიო წესრიგი დაარღვია, რომელიც მეორე მსოფლიო ომის შემდეგ ჩამოყალიბდა. "დოიჩე ველეს" ინფორმაციით, ამის შესახებ გერმანიის კანცლერმა ანგელა მერკელმა დავოსში, მოფლიო ეკონომიკურ ფორუმზე გამოსვლისას განაცხადა.
"ყირიმის ანექსია - ეს არ არის უბრალოდ ანექსია. ეს არის ფასეულობების დარღვევა, რომელთა დამსახურებითაც შეიქმნა ევროპული მსოფლიო წესრიგი მეორე მსოფლიო ომის დასრულების შემდეგ, კონკრეტულად კი საზღვრებისა და ტერიტორული მთლიანობის აღიარებით", - აღნიშნა მერკელმა.
მისივე თქმით, რუსეთისთვის ეკონომიკური სანქციების გაუქმება შეუძლებელია ბერლინში "ნორმანდიული ოთხეულის" მოლაპარაკებების შემდეგაც კი. მერკელის აზრით, არსებობს მცირე პროგრესი, მაგრამ გადადგმულია მთელი რიგი ნაბიჯები უკუმიმართულებით", - განაცხადა კანცლერმა.
მისივე მტკიცებით, რუსეთის წინააღმდეგ შემზღუდავი ზომები მაშინ მოიხსნება, როდესაც ის მიზეზები აღარ იარსებებს, რის გამოც ეს სანქციები დაწესდა. "თუმცა, სამწუხაროდ, ეს ჯერ ასე არ არის", - აღნიშნა ანგელა მერკელმა.
