გამოკიდებული ყველამ კარგად იცის, რომ ჩვენ არ ვართ თანამდებობებზე გამოკიდებული, -ასეთი კომენტარი გააკეთა "თავისუფალი დემოკრატების" ლიდერმა ირაკლი ალასანიამ, რომელმაც პარლამენტში კომიტეტების ხელმძღვანელობიდან თანაგუნდელების სავარაუდო გადაყენების საკითხზე ისაუბრა.
"ეს არის ის პროცესი, რომელშიც მოუწევთ გასვლა უმრავლესობის წარმომადგენლებს. მე ძალიან მაინტერესებს ვინ დაუჭერს მხარს თუნდაც ვიქტორ დოლიძის გადაყენების საკითხს, ან ვის შეარჩევენ ამ პოსტისთვის. ჩემთვის ასევე მნიშვნელოვანია ვის წარადგენს უმრავლესობა სხვა კომიტეტებში. ჩვენ ამ ხალხს დავარქვით "ნაციონალური ოცნების" წარმომადგენლობა. ყველამ კარგად იცის, რომ ჩვენ არ ვართ თანამდებობებზე გამოკიდებული. ჩვენ დავტოვეთ პოსტები "ნაციონალური მოძრაობის" ხელისუფლების პერიოდშიც. ქვეყანაში არის სწორი და გამართული გადაწყვეტილების მიღების დეფიციტი. ქვეყანა მიჰყავთ ავტორიტარიზმისკენ და ეს პროცესი ჩვენთვის მიუღებელია", - განაცხადა ირაკლი ალასანიამ ბათუმში გამართულ შეხვედრაზე.
