ამერიკელი სენატორი ერიკ შმიტი აცხადებს, რომ აშშ-ში ბოლო ათ წელიწადში ორგანიზებულმა, სისტემურმა პოლიტიკურმა ძალადობამ მასშტაბური ხასიათი მიიღო და ამ პროცესებს არასამთავრობო ორგანიზაციების, ფონდებისა და აქტივისტი ჯგუფების ფართო ქსელი აფინანსებს.

სენატორმა იურიდიულ კომიტეტში გამოძიების ფედერალური ბიუროს (FBI) დირექტორის კეშ პატელის მოსმენის დროს განმარტა, რომ სწორედ ეს სისტემა იმალება ყველა რადიკალი მემარცხენე მოძრაობის უკან, რომელთა ერთ-ერთი მსხვილი დამფინანსებელი ჯორჯ სოროსია.

„ბოლო ათწლეულია პოლიტიკური ძალადობის აფეთქებას ვუყურებთ, ორგანიზებულ სისტემურ პოლიტიკურ ძალადობას ფართო მასშტაბით. ეს არის იმ ბნელი და საიდუმლო სისტემის ნაყოფი, რომელსაც ნაწილობრივ ჩვენვე ვაფინანსებთ. ეს მოიცავს ფონდების, არასამთავრობო ორგანიზაციებისა და აქტივისტი ორგანიზაციების ფაქტორსაც. ეს სისტემა დგას ყველა რადიკალური მემარცხენე მოძრაობის უკან. ჯორჯ სოროსის იმპერია აფინანსებს რადიკალების დიდ ეკოსისტემას. იმ რადიკალების, რომლებიც არეულობების დროს აგურებს ისვრიან. მიზანია, რომ ჩვენს ქუჩებში გამოუშვან ძალადობრივი ანარქისტების მთელი ტალღა. ამ დროს მემარჯვენეებს გვეძახიან ექსტრემისტებს, ნაცისტებს, ფაშისტებსა და და დემოკრატიის ეგზისტენციალურ საფრთხეს“, - თქვა შმიტმა.