უკრაინაში, ზაკარპატიეს ოლქში, სამართალდამცავებმა ტერაქტის მცდელობა აღკვეთეს.
უკრაინული მედიის ინფორმაციით, უკრაინის შინაგან საქმეთა მინისტრის მოადგილემ, სერგეი იაროვოიმ ბრიფინგზე განაცხადა, რომ ტერაქტის მცდელობა შინაგან საქმეთა სამინისტროს ოპერატიული ქვედანაყოფის თანამშრომლებმა, ერთ-ერთ საარჩევნო უბანზე აღკვეთეს.
"25 ოქტომბერს, ზაკარპატიეს ოლქში, ოპერატიული ქვედანაყოფის წარმომადგენლებმა დააკავეს ჯგუფი, რომლებიც გეგმავდნენ ტერაქტს არჩევნების მიმდინარეობის დროს. ამ დროისთვის მიმდინარეობს ოპერატიულ-საგამოძიებო ქმედებები, რომლის შედეგებიც საზოგადოებისთვის უახლოეს პერიოდში იქნება ცნობილი", - განაცხადა უკრაინის შინაგან საქმეთა მინისტრის მოადგილემ.
უკრაინაში დღეს რიგგარეშე საპარლამენტო არჩევნები მიმდინარეობს. საარჩევნო უბნები ქვეყნის მასშტაბით დილის 08:00 საათზე გაიხსნა და 20:00 საათზე დაიხურება.
