უკრაინის სამთავრობო ძალებმა რუსული ტანკების შეტევის შედეგად ლუგანსკის ოლქის ქალაქ ლუტუგინოდან უკან დაიხიეს.
უკრაინული მედიის ინფორმაციით, როგორც ერთ-ერთმა მოხალისე უკრაინელმა მებრძოლმა განაცხადა, ლუტუგინოს ანტიტერორისტული ოპერაციის ძალები ვეღარ აკონტროლებენ.
"ქალაქი ჩვენი აღარ არის, ქუჩებში ტანკები, ჯავშანტრანსპორტიორები და სეპარატისტები გადაადგილდებიან. უკრაინელ ძალოვნებს შორის ბევრი დაჭრილია", - დაწერა "ფეისბუქზე" მოხალისე უკრაინელმა მებრძოლმა იური კასიანოვმა.
უკრაინის ანტიტერორისტული ოპერაციის პრესსამსახურის ინფორმაციით, სამთავრობო ძალებმა გუშინ უკან დაიხიეს ლუგანსკის აეროპორტიდანაც. მათივე განცხადებით, ლუგანსკის აეროპორტზე შეტევა რუსეთის შეიარაღებული ძალების სატანკო ბრიგადამ განახორციელა.
