"დღევანდელი დღე კიდევ ერთი ნათელი დადასტურება იმისა, რომ ჩვენ გვაქვს ამერიკის მთავრობის მტკიცე მხარდაჭერა", _ ამის შესახებ საქართველოს პრემიერ-მინისტრმა, ირაკლი ღარიბაშვილმა აშშ-ის საზღვაო ძალების მეექვსე ფლოტის კრეისერ ,,ველლა გალფზე" გამართული საზეიმო მიღების დასრულების შემდეგ განაცხადა.
საქართველოს პრემიერ-მინისტრის პრესსამსახურის ინფორმაციით, მთავრობის მეთაურს აშშ-ის ელჩმა რიჩარდ ნორლანდმა და ხომალდის კაპიტანმა კატციმ უმასპინძლეს. ირაკლი ღარიბაშვილმა ამერიკული კრეისერი დაათვალიერა და საზეიმო მიღების მონაწილეებს სიტყვით მიმართა.
საქართველოს პრემიერ-მინისტრის განცხადებით, ხომალდის შემოსვლა ამერიკის შეერთებული შტატების მხარდაჭერას საქართველოსა და მთლიანად შავი ზღვის რეგიონის უსაფრთხოებისადმი კიდევ ერთხელ ადასტურებს.
"ამერიკის შეერთებულ შტატებთან პარტნიორობა ჩვენი ქვეყნის საგარეო პოლიტიკის ერთ-ერთი მთავარი პრიორიტეტია. ჩვენთვის ძალიან მნიშვნელოვანია ამერიკის შეერთებული შტატების მხარდაჭერა საქართველოს სუვერენიტეტის, ტერიტორიული მთლიანობის, დემოკრატიის განვითარებისა და ევროპულ და ევროატლანტიკურ სტრუქტურებში ინტეგრაციის საქმეში", - განაცხადა პრემიერ-მინისტრმა სიტყვით გამოსვლისას.
მან აშშ-ის მთავრობას მადლობა გადაუხადა საქართველოს შეიარაღებული ძალების, სამართალდამცავი უწყებების მოდერნიზაციისა და სახელმწიფო საზღვრის უსაფრთხოების მიმართულებით გაწეული დახმარებისთვის და აღნიშნა, რომ შინაგან საქმეთა სამინისტროს სასაზღვრო პოლიციის სანაპირო დაცვის სამსახური მსოფლიოს წამყვან საზღვაო სახელმწიფოებში დამკვიდრებულ სტანდარტებს დღითიდღე უახლოვდება.
პრემიერმა ასევე ხაზი გაუსვა ამერიკის შეერთებული შტატების თავდაცვის დეპარტამენტსა და სასაზღვრო პოლიციის სანაპირო დაცვის დეპარტამენტს შორის გაფორმებული დეკლარაციის საფუძველზე შემუშავებულ მნიშვნელოვან პროექტს, რომელიც ამერიკის საელჩოს საფრთხეების შემცირების სამსახურმა განახორციელა - საქართველოს გადასცა გემების ამოსაღები ამწე, მიმდინარეობს პირსების, დახურული ნავსადგურის მშენებლობა ბათუმში, მცურავი ერთეულებისათვის შეძენილია სათადარიგო ნაწილები, გემთსარემონტო სახელოსნოში დამატებითი დაზგა-დანადგარების მონტაჟი განხორციელდა და პერსონალი მომზადდა.
პრემიერის პრესსამსახურის ინფორმაციით, 2014 წლის 24 ივნისს სადგურ "სუფსის" ტერიტორიაზე გაიხსნა საზღვაო ოპერაციების მართვის ცენტრი, რომელიც მნიშვნელოვან როლს შეასრულებს სახელმწიფო საზღვრის დაცვის სუბიექტებისა და სასაზღვრო რეჟიმის განმახორციელებელი სამსახურების კოორდინირებულ საქმიანობაში.
"ამერიკის მეგობრობა და დახმარება ჩვენთვის უაღრესად მნიშვნელოვანია. ჩვენ კარგად ვიცით მეგობრობის ფასი და ყოველთვის ვიდგებით მათ გვერდით, ვინც საქართველოს მხარდამჭერი და ერთგულია", - აღნიშნა ირაკლი ღარიბაშვილმა.
