სასჯელაღსრულების სამინისტროს სამედიცინო დეპარტამენტის ინფორმაციით, პატიმრობაში მყოფი პირები საკუთარი ოჯახის წევრებსა და ახლობლებს უკავშირდებიან და სამედიცინო მომსახურებისთვის თანადაფინანსებას სთხოვენ.
„იქნებ გამომიგზავნოთ ფული, ძვირადღირებული ოპერაცია მჭირდება და სამინისტრო მხოლოდ 8 500 ლარს მიფინანსებს“ - ამ ტიპის თხოვნა რამდენიმე მსჯავრდებულის ოჯახს მიუვიდა. მსგავსი სპეკულაციისგან თავის დაზღვევის მიზნით, სამინისტრო მოქალაქეებს ურჩევს ინფორმაცია გადაამოწმონ სამედიცინო დეპარტამენტში შემდეგ ტელეფონის ნომერზე - 231-27-47 .
საჭიროების შემთხვევაში სამედიცინო დეპარტამენტი ოჯახთან დაკავშირებას თავად უზრუნველყოფს. გამოცდილება, როდესაც ოჯახები პატიმრებს საკვების და სამედიცინო მომსახურების ფულს იძულებით უგზავნიდნენ, წარსულს ჩაბარდა.
2013 წლის 1 იანვრიდან დღემდე 5139-მა მსჯავრდებულმა მიიღო სამედიცინო მომსახურება პენიტენციური სისტემისა და სამოქალაქო ჯანდაცვის საავადმყოფოებში და არცერთ ამ შემთხვევაში თანადაფინანსებას ადგილი არ ჰქონია - მათი მომსახურება სახელმწიფო ბიუჯეტმა 100%-ით დააფინანსა. სამედიცინო რეფერალის თითოეული შემთხვევა ელექტრონულ სამედიცინო პროგრამაში რეგისტრირდება და ინტერესის შემთხვევაში, ინფორმაციის გადამოწმება ადვილია.
პატიმარს აქვს უფლება თავად შეიძინოს მედიკამენტები, რომელიც იმ 500-მდე მედიკამენტის ჩამონათვალში არ შედის, რომელსაც სახელმწიფო 100%-ით აფინანსებს, ასევე აქვს უფლება მოითხოვოს მეორე სამედიცინო აზრი ან სასჯელაღსრულების დეპარტამენტის თანხმობის შემთხვევაში, თავად აირჩიოს სამედიცინო მომსახურების გამწევი საკუთარი ხარჯებით, რაც იშვიათად ხდება, თუმცა თანადაფინანსება ამ შემთხვევებშიც შეუძლებელია.