ბიზნესმენ ავთანდილ ადუაშვილის მკვლელობის საქმეზე, რომელიც ნაფიცი მსაჯულების პირობებში განიხილეს, ნაფიცმა მსაჯულებმა გადაწყვეტილება ერთხმად ვერ მიიღეს, შესაბამისად, მათ დამატებით 6 საათის სათათბირო დრო განესაზღვრათ.

ნაფიცმა მსაჯულებმა ავთანდილ ადუაშვილის მკვლელობის საქმეში ბრალდებულ სამ პირთან მიმართებაში 8 სხვადასხვა ბრალდებაზე ინდივიდუალური გადაწყვეტილება უნდა მიიღონ.
როგორც ადუაშვილის ახლობლები ვარაუდობენ, არ არის გამორიცხული, რომ ნაფიცი მსაჯულები 8 ბრალდების განხილვისას სამსაათიან სათათბირო ვადაში ვერ ჩაეტივნენ და ამის გამო მათ დამატებით ექვსსაათიანი დრო განესაზღვრათ.

კანონით დადგენილია, რომ თუკი ნაფიცი მსაჯულები ვერდიქტს პირველად დროში, 3-საათიან ვადაში ერთხმად ვერ გამოიტანენ, მათ ემატებთ 6-საათიანი დრო, რის შემდეგაც სათათბირო დრო კიდევ განსაზღვრულია 3 საათის განმავლობაში.

ნაფიცმა მსაჯულებმა დღეს უნდა გადაწყვიტონ ადუაშვილის მკვლელობაში ბრალდებულების კობა ყურუას, ვახტანგ ჩხაპელიასა და გელა უბილავას სასჯელის ზომა.