პრემიერის პრესსამსახური უარყოფს პრეზიდენტის განცხადებას, თითქოს დღეს პრემიერ-მინისტრმა და თავდაცვის მინისტრმა ევროპარლამენტარებთან შეხვედრა გააუქმეს, - ამის შესახებ ნათქვამია საქართველოს პრემიერ–მინისტრის პრესსამსახურის განცხადებაში.
"საქართველოს პრემიერ-მინისტრის პრესსამსახური ხაზგასმით აცხადებს, საქართველოს პრეზიდენტ მიხეილ სააკაშვილის განცხადება იმის თაობაზე, რომ პრემიერ-მინისტრმა და თავდაცვის მინისტრმა გააუქმეს შეხვედრა ევროპარლამენტარებთან, რომელიც თითქოს დღეს, 17 ივლისს უნდა გამართულიყო, არ შეესაბამება სიმართლეს.
პრემიერ-მინისტრის შეხვედრა ევროპარლამენტარებთან ჩანიშნული არ ყოფილა და, შესაბამისად, ვერ გაუქმდებოდა. საქართველოს პრემიერ-მინისტრი ემზადება უმნიშვნელოვანესი ვიზიტისთვის, რომელიც გაიმართება პოლონეთსა და ლიტვაში, რის გამოც ასეთი შეხვედრა ვერც დაიგეგმებოდა.
რაც შეეხება თავდაცვის მინისტრ ირაკლი ალასანიას, მისი შეხვედრა ევროპარლამენტარებთან ასევე არ იყო დაგეგმილი, რადგან დღეს მინისტრი მასპინძლობს თავის კოლეგას, სომხეთის თავდაცვის მინისტრს და ეს შეხვედრა დიდი ხნის წინ დაიგეგმა", - ნათქვამია პრემიერის პრესსამსახურის განცხადებაში.
