საქართველოს პარლამენტის თავმჯდომარე მინისტრთა კაბინეტში ცვლილებების საჭიროებასა და აუცილებლობას ვერ ხედავს. როგორც დავით უსუფაშვილმა ჟურნალისტებს თემის კომენტირებისას განუცხადა , უჭირს გაარკვიოს მთავრობაში ვინ სუსტია და ვინ ძლიერი, რადგან მისი გადასახედიდან ყველა საკმაოდ კარგად მუშაობს.
პარლამენტის თავმჯდომარის თქმით, მინისტრების დანიშვნა-გათავისუფლება პრემიერ-მინისტრის ექსკლუზიური უფლებაა და იგი ამას დამოუკიდებლად განახორციელებს. იმ შემთხვევაში კი თუ ექვსი-შვიდი მინისტრი შეიცვლება, პრემიერს პარლამენტში ახალი მთავრობის წარდგენა მოუწევს, რათა მათ საკანონმდებლო ორგანოს ნდობა მიიღონ.
"მთავრობის ფორმირებიდან დღემდე არც ერთი მინისტრი არ შეცვლილა. ჩემი გადმოსახედიდან ამის საჭიროება-აუცილებლობას ვერც ახლა ვხედავ. თუმცა ჩემი გადმოსახედი საკამარისი არ არის, რადგან პრემიერ-მინისტრია თანამდებობის პირი, რომელიც ყოველდღიურად ადევნებს თვალს მინისტრების საქმიანობას" , – აღნიშნა დავით უსუფაშვილმა.
საქართველოს პრემიერ-მინისტრმა განაცხადა, რომ ერთ-ერთ მინისტრთან არსებობს კითხვები, რომლის გუნდში მოგვარების იმედი აღარ აქვს.
