ვაჟი გიტარით ხელში გოგონების განსაკუთრებულ სიმპათიას იწვევს. ასეთ დასკვნამდე მივიდნენ მეცნიერები სამხრეთ ბრეტანის ფრანგული უნივერსიტეტიდან.
გამოკვლევაში მონაწილეობდა ერთი 20 წლის ახალგაზრდა ვაჟი და 18-დან 22 წლამდე ასაკის 300 გოგონა. ახალგაზრდა, რომელიც მკვლევართა მიერ იყო შეფასებული ”მომხიბლავად”, ეცნობოდა გოგონებს და სთხოვდა მათ ტელეფონის ნომრებს.
ცდები სამ ჯგუფად იყო დაყოფილი: პირველ შემთხვევაში მას ხელში ეკავა გიტარის ბუდე, მეორეში - სპორტული ჩანთა და მესამეში - ცარიელი ხელებით მიდიოდა გოგონებთან. გაირკვა, რომ ”მუსიკოსის” ამპლუაში ყმაწვილის მომხიბვლელობა რამდენიმეგზის იზრდებოდა - გიტარისტს ტელეფონის ნომერს აძლევდა გოგონათა 31%, ხელცარიელს - 14%, ხოლო სპორტულ ხელჩანთიანს - 9%.
მიღებული შედეგების საფუძველზე მეცნიერები ასკვნიან: რადგან მუსიკა წარმოიშვა უძველესი საქორწინო რიტუალებიდან, ის მნიშვნელოვან როლს თამაშობს პარტნიორის არჩევაში. ამას გარდა, მუსიკალურ ინსტრუმენტზე დაკვრის უნარი მიუთითებს ადამიანის ინტელექტუალურ განვითარებაზე.
