ფრაქცია „ქართული ოცნების“ წევრი ზაქარია ქუცნაშვილი მიიჩნევს, რომ ყოფილი პრეზიდენტი მიხეილ სააკაშვილი გლობალური უსაფრთხოების ინტერესებს ამოეფარა და ამას ქართული მართლმსაჯულების ინტერესები ეწირება. კანონმდებელი მთავარ პროკურატურას მოუწოდებს, რომ უწყებამ ინტერპოლის სიიდან ზურაბ ადეიშვილის ამოღება ინტერპოლის გენერალურ ასამბლეაზე გაასაჩივროს და კითხვა დასვას - რამ განაპირობა ის, რომ დანაშაულში ეჭვმიტანილი პირები საერთაშორისო ინსტიტუტების დახმარების მიღმა რჩებიან.

ყოფილი ხელისუფლების მაღალჩინოსნების საქმეებთან დაკავშირებით, for.ge დეპუტატ ზაქარია ქუცნაშვილს ესაუბრა:

ინტერპოლის საძიებო სისტემიდან ზურაბ ადეიშვილი ამოიღეს. რითი ხსნით ამას?

- ინტერპოლის იმ კონსტიტუციიდან გამომდინარე, რომელიც 1956 წელს იქნა მიღებული, ეს სტრუქტურა ვალდებულია, დამნაშავეების ძებნა-დაკავების საქმეში ყველა წევრ ქვეყანას დაეხმაროს. ინტერპოლის კონსტიტუციის მიხედვით, ის გამონაკლისი, რაც დაშვებულია, სამხედრო დანაკლისს ეხება. თუკი სამხედრო დანაშაულში პირი ეჭვმიტანილია, ინტერპოლი იმ საქმეში არ ერევა. თუკი ინტერპოლის გენერალური სამდივნო ევროპის ერთი-ორი ქვეყნის მოთხოვნის საფუძველზე, ეჭვმიტანილი პირის ცირკულარიდან ამოღების თაობაზე გადაწყვეტილებას იღებს, მთავარ პროკურატურას მოვუწოდებ, რომ ეს ინტერპოლის გენერალურ ასამბლეაზე გაასაჩივროს, რომელიც ამ ორგანიზაციის ხელმძღვანელი ორგანო გახლავს. გენერალური ასამბლეა ყოველ წელს იკრიბება და ვფიქრობ, რომ მთავარმა პროკურატურამ ამ უფლებით უნდა ისარგებლოს და ასამბლეის სხდომაზე ეს საკითხი დასვას. პროკურატურის ადგილზე რომ ვიყო, იქ შეკითხვას ხმამაღლა დავსვამდი - რამ განაპირობა ის, რომ ბევრ საკმაოდ ცხად და ნათელ დანაშაულში ეჭვმიტანილი პირები საერთაშორისო ინსტიტუტების დახმარების მიღმა რჩებიან?! 1923 წელს, ვენაში ინტერპოლი სწორედ იმ მიზნით შეიქმნა, რომ სხვა ქვეყნის ტერიტორიებზე პოლიციელების არასანქცირებული გადასვლა და იქ ადგილობრივი სტრუქტურების გარეშე დაკავებები არ ყოფილიყო.

საფრანგეთიდან დავით კეზერაშვილის ექსტრადირება არ მოხდა და ითქვა, რომ პროკურატურამ ფრანგულ სასამართლოს შესაბამისი მტკიცებულებები არ წარუდგინა. მიხეილ სააკაშვილზე საერთაშორისო ძებნაა გამოცხადებული, თუმცა, ის მსოფლიოს გარშემო თავისუფლად გადაადგილდება. ზურაბ ადეიშვილი კი, ინტერპოლის სიიდან ამოიღეს. დანაშაულში ბრალდებული პირები ასე თავისუფალად რომ მოძრაობენ, ეს ვისი ბრალია თუ არა პროკურატურის?

- თქვენი კითხვა ლეგიტიმურია. ის, რომ სააკაშვილი გლობალური უსაფრთხოების ინტერესებს ამოეფარა და ამას ქართული მართლმსაჯულების ინტერესები ეწირება, ეს ცხადი და ნათელია. გლობალური უსაფრთხოების ინტერესებს „ნაციონალური მოძრაობის“ ყველა ლიდერი ვერ ამოეფარება და შეკითხვები იმ ხალხის მიმართ არსებობს, რომელიც ამ უბანზე პასუხისმგებელია. საზოგადოებას აინტერესებს, რაშია საქმე?! ისეთი რა ხდება, რომ რამდენიმე პირის მიმართ მტკიცებულებები დაუშვებლად და უარყოფილად ხდება.

მეჩვენება, თუ მთავარი პორკურატურის კრიტიკისგან თავს იკავებთ? მათი მუშაობით კმაყოფილი ხართ?

- ჩემი შეფასებით კითხვები დავსვი. სერიოზულ დანაშაულში ბრალდებული პირები გლობალური უსაფრთხოების ინტერესებს როგორ ამოეფარნენ, ამას კარგად ვაცნობიერებ. როცა ვხედავ, რომ ამ პროცესის უკან სააკაშვილის გარდა, ადეიშვილი, კეზარაშვილი, ახალაია, მერაბიშვილი და თბილისის ერთი გამგებელიც კი იმალებიან, კითხვა მიჩნდება, რაშია საქმე? ერთი-ორი შემთხვევა გასაგებია, მაგრამ ოთხი-ხუთი ფაქტი რაღაც დასკვნის გამოტანის ვალდებულებას წარმოშობს.

ანუ, დეპუტატები ფიქრობთ, რომ პროკურატურა სუსტად მუშაობს?

- პროკურატურას თავისთავად აქვს ვალდებულება, რომ საზოგადოებას განუმარტოს თუ რა ხდება და აპირებს თუ არა ინტერპოლის გენერალური ასამბლეა გამოიყენოს როგორც ინსტრუმენტი ადეიშვილის საქმეზე. მესმის, რომ გენერალური ასამბლეის გამოყენება საერთაშორისო სკანდალია, მაგრამ ამას დიდ დანაშაულში ბრალდებული პირები იყენებენ, ისინი გლობალურ უსაფრთხოებას ეფარებიან და ქართულ მართლმსაჯულებას გაურბიან.

როგორც ცნობილია, ადეიშვილს პოლიტიკური თავშესაფარი უნგრეთმა მისცა. მთავარმა პროკურატურამ იუსტიციის ყოფილი მინისტრის მამხილებელი მტკიცებულებები არც უნგრეთს წარუდგინა?

- პროკურატურის სამზარეულო არ ვიცი, მტკიცებულებებს არ ვიცნობ და არ უნდა ვიცოდე, რადგან დეპუტატებს ამის უფლება არ გვაქვს. კითხვებს ვსვამთ, რა ხდება და ინტერპოლის ქმედებების სანაცვლოდ, პროკურატურა რა ნაბიჯებს გადადგამს?!

სამართლიანობის აღდგენის ეგიდით პროკურატურაში შესაბამისი დეპარტამენტია შექმნილი და როგორც ხელმძღვანელი პირები აცხადებენ, საქმეების გამოძიება უკვე დაიწყო. პროკურატურის მუშაობის ტემპით კმაყოფილი ხართ?

- კმაყოფილი არ ვარ. პროკურატურის ჭრილში სამართლიანობის აღდგენას ასე მარტივად არ ვუყურებ. სხვა ორგანოებიც ვალდებულნი არიან, რომ ამ პროცესში ჩაერთონ და მათ შორის, საერთო სასამართლოები.

„თავისუფალ დემოკრატებს“ ამ დეპარტამენტის საქმიანობის თაობაზე კითხვები აქვთ, თქვენ?

- მართებულად არ ვთვლი, რომ სამართლიანობის აღდგენაზე მთელი პასუხისმგებლობა მხოლოდ პროკურატურის ქვედანაყოფზე დავიყვანოთ.

ვინაიდან, სამართლიანობის აღდგენას ბევრი ადამიანი ელოდება და თქვენ როგორც აცხადებთ, ამ პროცესის დაწყების პოლიტიკური ნებაც გაქვთ, პროცესს რატომ აჭიანურებთ და თუნდაც, სახელმწიფო სტრუქტურებს შორის კონსოლიდირებული მუშაობა რატომ არ მიდის?

- ამ საკითხზე პასუხის გაცემა რთულია, რადგან პრობლემა ბევრია. თუმცა, პარლამენტი ამ საკითხზე სამუშაოდ მონდომებულია, უწყებებთან თანამშრომლობისთვის მზად ვართ და იმ პასუხისმგებლობას ვგრძნობთ, რომელიც 1-ელ ოქტომბერს ხალხის მხარდაჭერის კვალობაზე დაგვეკისრა. სასურველია, რომ ამ პროცესის ტემპი მაღალი იყოს და ამ პროცესში ჩართული მხოლოდ ერთი უწყება არ იყოს. კიდევ ერთხელ გიმეორებთ, ამ პროცესის მონაწილეები უნდა იყვნენ - პროკურატურა, შსს, სასამართლო და ადვოკატთა ასოციაცია.

რაც შეეხება სირიაში მიმდინარე საომარ მოქმედებებს, იქ ქრისტიანი ბავშვები იხოცებიან და საქართველოში ითხოვენ, რომ ქვეყანამ მათ დახმარება აღმოუჩინოს. ქართული მხარე ასურელი ბავშვებისთვის დახმარების გაწევას აპირებს?

- გვაქვს თუ არა რესურსი სირიელი ბაშვები შევიფაროთ? - ცოტა მორიდებულად მოვიქცეოდი, რადგან ჩვენი ლტოლვილები გვყავს გაჭირვებული. ჰუმანური მოსწრების გარდა, რაიმე სახელმწიფო ან პოლიტიკურ მოსაზრებას ვერ ვხედავ, რომელიც ამ ტიპის გადაწყვეტილებას წაახალისებდა. ამ ქვეყანასთან არანარი ვალდებულება არ გვაქვს.

სირიაში ქრისტიან ბავშვებს ხოცავენ და რეაგირება არ უნდა მოვახდინოთ?

- რელიგიური შეხედულებებიდან გამომდინარე, ადამიანის დახმარება კარგია, მაგრამ პოლიტიკური თვალსაზრისით, ამის არანაირი ვალდებულება არ გვაქვს. ქვეყანაში უამრავი ლტოლვილი და გაჭივრებული გვყავს. საზოგადოებრივმა ჯგუფებმა შეიძლება პასუხისმგებლობის ტვირთი აიღონ.