„ინტერპოლიდან მიღებული წერილის საფუძველზე შეიძლება ვიფიქროთ, რომ მათ საქართველოს ხელისუფლებიდან მიიღეს დასტური ზურაბ ადეიშვილის ძებნილთა სიიდან ამოღების თაობაზე. ეს სრულებითაც არ არის სავალდებულო ყოფილიყო რომელიმე მინისტრი ან მთავრობის წევრი - ეს შეიძლება ყოფილიყო პროკურატურის წარმომადგენელი, ან ინტერპოლის ეროვნული ბიურო, რომელიც სინამდვილეში საქართველოს შსს-ს სტრუქტურაა“, - აცხადებს for.ge-სთან ექსკლუზიურ ინტერვიუში, ედუარდ შევრდნაძის ხელისუფლების ყოფილი ვიცე-პრემიერი, თემურ ბასილია, რომელსაც აშშ-მა პოლიტდევნილის სტატუსი მიანიჭა, თუმცა, ამის მიუხედავად, საქართველოს მთავრობის წინააღმდეგობის გამო, ძებნილთა სიიდან მისი ამოღება ვერ ხერხდება.

რა უთხრეს მთავარ პროკურატურაში და რატომ ვერ ხერხდება მისი ძებნილთა სიიდან ამოღება? ამ საკითხებთან დაკავშირებით for.ge თემურ ბასილიას ესაუბრა.

ბატონო თემურ, როგორც ცნობილია, თქვენ ისევ ძებნაში იმყოფებით და ვერ ახერხებთ ქვეყანაში დაბრუნებას, მიმართეთ ქვეყნის პრემიერ-მინისტრს, რომელიც დაგპირდათ საქმის ვითარებაში გარკვევას. თუ გქონდათ ამის შემდეგ კომუნიკაცია პროკურატურასთან, დაინტერესდა თქვენი საქმით პრემიერი?

- გასული წლის 26 თებერვალს როდესაც პრემიერ-მინისტრი ირაკლი ღარიბაშვილი აშშ-ში, ვაშინგტონში, ატლანტიკის საბჭოში იმყოფებოდა, მას შევხვდი. შეხვედრის დროს მქონდა საშუალება მისთვის დამესვა კითხვა პოლიტიკური მოტივით დევნილთა პრობლემების მოგვარების კუთხით. პრემიერი დამპირდა, რომ სააკაშვილის რეჟიმის დროს, ჩემს მიმართ პოლიტიკურად მოტივირებული საქმის გადახედვას შესაბამის უწყებებს დაავალებდა. გარდა ამისა, პარლამენტის შესაბამისმა კომიტეტმა რომელსაც ეკა ბესელია ხელმძღვანელობს, ასევე შეისწავლა ჩემი საქმე და მათაც მიმართეს პროკურატურას ამ საქმის გადახედვის რეკომენდაციით.

თქვენთვის ალბათ ცნობილია, რომ აშშ-ის ხელისუფლებამ 2011 წლის 26 მაისს მომანიჭა პოლიტიკური დევნილის სტატუსი. მათ დეტალურად შეისწავლეს ჩემი საქმე და დარწმუნდნენ, რომ სააკაშვილის რეჟიმი ახორციელებდა ჩემს მიმართ პოლიტიკური მოტივით დევნას, რომ რეჟიმი ამ პროცესში იყენებდა სამართალდამცავ ორგანოებს და სასამართლო სისტემას და, რომ ჩემს წინააღმდეგ აღძრული საქმე იყო პოლიტიკურად მოტივირებული და სასამართლოს განაჩენი - უკანონო.

მას შემდეგ რაც პრემიერი დაინტერესდა თქვენი საქმით, როგორ განვითარდა მოვლენები?

- პროკურატურიდან მართლაც დაგვიკავშირდნენ, მაგრამ გვითხრეს, რომ საქმის გადახედვაზე არც იოცნებოთ, თუ გინდათ აღიარეთ ბრალი და მერე საპროცესო შეთანხმებას გაგიფორმებთო. ამ და სხვა მსგავს „შემოთავაზებებზე“ მათ კატეგორიული უარი ვუთხარი და მოვთხოვე პრემიერის დაპირების შესაბამისად, დაეწყოთ საქმის გადახედვა, რაც დაიწყეს კიდეც. მიუხედავად იმისა, რომ ამ პროცესში პროკურატურას არაერთი დოკუმენტი მიეწოდა, სადაც დასტურდებოდა სააკაშვილის რეჟიმის მაღალჩინოსნების და მათ შორის პროკურატურის წარმომადგენლების მიერ ჩადენილი სერიოზული დანაშაული, პროკურატურას უნდა წარმოაჩინოს, რომ მათ ვერ „აღმოაჩინეს“ ეს დანაშაული და აპირებენ ამ მიზეზით უარი თქვან საქმის გადახედვაზე.

თქვენ თვლით, რომ დღევანდელი პროკურატურა ცდილობს დაამტკიცოს, რომ სააკაშვილის დროს პროკურატურას კანონი არ დაურღვევია?

- პრაქტიკულად, დღევანდელი პროკურატურა ხელს აფარებს სააკაშვილის რეჟიმის კრიმინალებს, რომლებიც „თხზავდნენ“ სისხლის სამართლის საქმეებს, პოლიტიკური და სხვა მოტივით ციხეში უშვებდნენ უდანაშაულო ადამიანებს, ართმევდნენ მათ ქონებას და ა.შ. კიდევ უფრო უარესი, პროკურატურა ცდილობს დაარწმუნოს საერთაშორისო ორგანიზაციები, რომ სააკაშვილის რეჟიმის დროს პროკურატურა და სხვა სამართალდამცავი ორგანოები კანონის სრული დაცვით მუშაობდნენ. ამ აბსურდზე საუბრობენ ისეთ საქმეებთან დაკავშირებით, რომლებიც ამ საერთაშორისო ორგანიზაციებს დეტალურად აქვთ შესწავლილი და ძალიან კარგად იციან, სინამდვილეში რა დარღვევებს ჰქონდა ადგილი.

პრაქტიკულად, პროკურატურა თავად ულახავს საკუთარ თავს რეპუტაციას ამ ორგანიზაციების თვალში და რაც მთვარია, რეპუტაციას ულახავს ხელისუფლებას. ამიტომაც, ხელისუფლებას თუ უნდა თავიდან აიცილოს მოვლენების არასასურველი სცენარით განვითარება, დროულად უნდა ჩაიხედოს ასეთ საქმეებში და დაინტერესდეს რა მოტივების გამო ულახავს პროკურატურა რეპუტაციას ხელისუფლებას - ეს არის კორუფცია, რაც ასე იყო გავრცელებული სააკაშვილის დროინდელ პროკურატურაში.

როდის მიმართეთ ინტერპოლს და რა პასუხი მიიღეთ?

- ინტერპოლს მივმართე ჩემი ამერიკელი იურისტების მეშვეობით, გვქონდა რამდენიმეთვიანი მიმოწერა და ბოლოს მივიღეთ პასუხი, რომ საქართველოს ხელისუფლება წავიდა წინააღმდეგი, რომ ინტერპოლს ამოეღო ჩემი გვარი ძებნილთა სიიდან. როდესაც უცხოელები საუბრობენ ხელისუფლებაზე ისინი გულისხმობენ სახელმწიფო უწყებების წარმომადგნელებსაც. ამიტომ, ვისაც ინტერპოლი საქართველოში ესაუბრა ჩემს საქმესთან დაკავშირებით, შეიძლება ისინი ყოფილიყვნენ პროკურატურის ან ინტერპოლის ეროვნული ბიუროს თანამშრომლები, რაც შინაგან საქმეთა სამინისტროს დეპარტამენტია.

ამ წერილში ინტერპოლმა დეტალურად აღწერა ძებნილთა სიაში პიროვნების ჩასმის და იქედან მისი ამოღების პროცედურა, საიდანაც ნათელი იყო, რომ ეს მათ კომპეტენციას აღემატებოდა და ეს მთლიანად იყო საქართველოს ხელისუფლების პრეროგატივა. მაქვს ოფიციალური წერილი ინტერპოლის ცენტრალური ოფისიდან, სადაც ბოდიშს მიხდიან, რომ მართლია, აშშ-მა პოლიტდევნილის სტატუსი მოგანიჭათ, მაგრამ საქართველოს მთავრობა არის წინააღმდეგი, რომ ძებნილთა სიიდან ამოგიღოთო.

თქვენ, წერდით, რომ ოფიციალურ წერილში ინტერპოლის ბიურომ „სხვა რაღაცეები შემომთავაზეს“, რა შემოგთავაზეს?

- მათ შემომთავაზეს მექანიზმი, რომლითაც დაცული იქნებოდა ჩემი უსაფრთხოება საზღვარგარეთ მოგზაურობის დროს. ბუნებრივია, ამ მექანიზმის დეტალებზე აქ ვერ ვისაუბრებ.

როგორ ფიქრობთ, რა მოხდა ადეიშვილის შემთხვევაში, რატომ ამოიღეს ის ძებნილთა სიიდან? პროკურატურის როლი რამდენად დიდი ამაში?

- შეუძლებელია ინტერპოლს ჩემთვის ერთი მექანიზმი ჰქონდეს და მეორე მექანიზმი ადეიშვილისთვის. ინტერპოლიდან მიღებული წერილის საფუძველზე შეიძლება ვიფიქროთ, რომ მათ საქართველოს ხელისუფლებიდან მიიღეს დასტური ზურაბ ადეიშვილის ძებნილთა სიიდან ამოღების თაობაზე. ეს სრულებითაც არ არის სავალდებულო ყოფილიყო რომელიმე მინისტრი ან მთავრობის წევრი - ეს შეიძლება ყოფილიყო პროკურატურის წარმომადგენელი ან ინტერპოლის ეროვნული ბიურო, რომელიც სინამდვილეში საქართველოს შინაგან საქმეთა სამინისტროს სტრუქტურაა.